అల వైకుంఠపురములో నిర్మాతలు మోసం చేసారా?

స్టైలిష్ స్టార్ అల్లు అర్జున్ నటించిన అల వైకుంఠపురములో చిత్రం ఎంత పెద్ద విజయం సాధించిందో ప్రత్యేకంగా చర్చించుకోవాల్సిన అవసరం లేదు. నాన్ బాహుబలి రికార్డులను తిరగరాసి తన పేరిట లిఖించుకుంది. బాహుబలి 2 తప్ప చాలా రికార్డులు ఇప్పుడు ఈ చిత్రం పేరిటే ఉన్నాయి. తెలుగు రాష్ట్రాల్లో 110 కోట్లకు పైగా వసూళ్లు, యూఎస్ లో 3 మిలియన్ డాలర్లకు పైగా కలెక్షన్స్ తో దుమ్మురేపింది అల వైకుంఠపురములో. ఈ చిత్రం ఇంత పెద్ద విజయం సాధించడానికి కంటెంట్ ఎంత కారణమో, పబ్లిసిటీ విషయంలో అవలంబించిన దూకుడు కూడా అంతే కారణం.

సామజవరగమన అనే పాటను సినిమా రిలీజ్ కు నాలుగు నెలల ముందే వదిలి సాహసం చేసారు మేకర్స్. అయితే అది మంచి ఫలితాలనే అందుకుంది. అంతే కాకుండా ఈ సినిమా పోస్టర్ పై అప్పట్లో “ఈ చిత్రం మీకు ప్రైమ్, నెట్ ఫ్లిక్స్ లో అందుబాటులో ఉండదు” అనే క్యాప్షన్ విశేషంగా జనాలను ఆకర్షించింది.

డిజిటల్ విప్లవం మొదలయ్యాక ప్రైమ్, నెట్ ఫ్లిక్స్ జనాలను ఆకర్షించడంలో ముందున్నాయి. ఏదైనా క్రేజీ సినిమా కనబడితే కొనేయడం నెల రోజులు పూర్తవ్వగానే తమ ఓటిటి ప్లాట్ ఫామ్ లో పెట్టేయడంతో థియేటర్లకు జనాలు రావడమే తగ్గిపోయింది. ప్రైమ్ లేదా నెట్ ఫ్లిక్స్ లో వచ్చినప్పుడు చూసుకుందాంలే అని అనుకుంటున్నారు ప్రేక్షకులు. దీనికి భిన్నంగా మీకు ఈ సినిమా ఈ రెండు ప్లాట్ ఫామ్స్ లో ఉండదు అనేసరికి జనాలకు ఇంప్రెషన్ మారిపోయింది. ఈ ఫ్యాక్టర్ కూడా ప్రేక్షకులు థియేటర్ల వైపు కదలడానికి సహాయపడింది.

ఇంతవరకూ బానే ఉంది వ్యవహారం. కట్ చేస్తే ఈరోజు సన్ నెక్స్ట్ లో సినిమా స్ట్రీమింగ్ అవుతోంది. దాంతో పాటు నెట్ ఫ్లిక్స్ లో కూడా స్ట్రీమ్ అవుతోంది. అల వైకుంఠపురములో చిత్రాన్ని నెట్ ఫ్లిక్స్ లో చూసి ఆశ్చర్యపోయారు జనాలు. మరి ఆ పోస్టర్ లో పెట్టింది జనాలను థియేటర్లకు రప్పించడం కోసమేనా? ఇది మోసమే కదా?