చంద్రబాబుపై విరుచుకుపడ్డట్టు కేసీఆర్ మీద నోరు పారేసుకోలేదేం.?

రాష్ట్ర ప్రయోజనాల కంటే, రాజకీయ ప్రయోజనాలే ఆంధ్రపదేశ్ రాష్ట్రంలో అధికార వైఎస్సార్ కాంగ్రెస్ పార్టీకి ముఖ్యమయ్యాయా.? ప్రతిపక్ష నేత చంద్రబాబుని తూలనాడేందుకు పోటీ పడే మంత్రులు, రాష్ట్ర ప్రయోజనాల విషయమై తెలంగాణ ముఖ్యమంత్రిని నిలదీసే క్రమంలో సుతిమెత్తగా మాత్రమే ఎందుకు వ్యాఖ్యానిస్తున్నట్లు.? ఇప్పుడీ చర్చ ఆంధ్రపదేశ్ రాష్ట్రంలో జరుగుతోంది.

తెలంగాణ ప్రభుత్వం కృష్ణా నదిపై శ్రీశైలం ప్రాజెక్టు ఎగువన, జూరాల ప్రాజెక్టు దిగువన ఓ ఆనకట్ట నిర్మించబోతోన్న విషయం విదితమే. 55 టీఎంసీ సామర్థ్యంతో ఈ ప్రాజెక్టుని నిర్మించనుంది తెలంగాణ ప్రభుత్వం. ఆంధ్రపదేశ్ రాష్ట్రం, ఆర్డీఎస్.. రాయలసీమ లిఫ్ట్ ద్వారా కృష్ణా నది నుంచి నీటిని దొంగలిస్తున్నందున, తెలంగాణ ప్రభుత్వం తనవంతుగా ఈ కార్యక్రమం చేపట్టక తప్పడంలేదన్నది తెలంగాణ రాష్ట్రంలో వినిపిస్తోన్న వాదన.

ఇప్పటికే కృష్ణా నదిపై కర్నాటకలో నీటి దోపిడీ కారణంగా.. ఆంధ్రపదేశ్ రాష్ట్రంలో నీటి లభ్యత దారుణంగా తయారైంది. కర్నాటకపై విమర్శలు చేయడానికి తెలంగాణ సాహసించదు. ఆంధ్రపదేశ్ సంగతి సరే సరి. చంద్రబాబు హయాంలో నీటి వివాదాలు పొరుగు రాష్ట్రాలతో వస్తే నానా యాగీ చేసిన వైసీపీ, ఇప్పుడు.. రాష్ట్రానికి ఇంత అన్యాయం జరుగుతున్నా తెలంగాణ రాష్ట్రాన్ని నిలదీసే పరిస్థితి లేదు. పైగా, తెలంగాణ ప్రభుత్వం అక్రమంగా కొన్ని ప్రాజెక్టుల్ని కృష్ణా నదిపై కట్టిందంటూ ఏపీ మంత్రి అనిల్ కుమార్ యాదవ్ చెబుతున్నారు. అదే నిజమైతే, గడచిన రెండేళ్ళలో వైఎస్ జగన్ ప్రభుత్వం ఏం చేసినట్టు.? ప్రతిపక్షంగా అంతకు ముందు ఐదేళ్ళు ఏం చేసినట్లు.?

తెలంగాణ ముఖ్యమంత్రి కేసీఆర్ – ఆంధ్రపదేశ్ ముఖ్యమంత్రి వైఎస్ జగన్ మోహన్ రెడ్డి కొన్నాళ్ళ క్రితం అధికారికంగా నీటి ప్రాజెక్టుల విషయమై చర్చలు జరిపినప్పుడు ఆ అంశాలపై ఏపీ నుంచి ఎందుకు అధికారికంగా నిరసన లేదు.? ఆంధ్రపదేశ్ రాష్ట్రంలో ప్రతిపక్షంపై బూతులతో విరుచుకుపడ్డానికి తెగ అత్యుత్సాహం చూపించే మంత్రులు, వైసీపీ ముఖ్య నేతలు.. తెలంగాణ విషయమై కనీసం గొంతు పెగిల్చి నిరసన వ్యక్తం చేయలేకపోవడం శోచనీయం.