దండయాత్రకీ.. వినతి పత్రానికీ తేడా తెలియట్లేదా.?

టీడీపీ అధినేత నారా చంద్రబాబునాయుడు ఇంటిపై ‘దండయాత్ర’ కోసం వెళ్ళారు వైసీపీ నేతలు, కార్యకర్తలు. ఈ ఘటన వెనుక ‘పొలిటికల్ స్కెచ్’ ఏంటి.? అన్నది వేరే చర్చ. కానీ, ఆ దాడినీ.. దండయాత్రనీ, అధికార పార్టీ ఇంకోలా అభివర్ణిస్తోంది. చంద్రబాబుకి వినతి పత్రం అందించేందుకే వైసీపీకి చెందిన ఓ ప్రజా ప్రతినిథి ప్రయత్నించారట. చంద్రబాబు ఏమన్నాముఖ్యమంత్రి పదవిలో వున్నారా.. ఆయనకు వినతిపత్రం ఇవ్వడానికి.?

ముఖ్యమంత్రి వైఎస్ జగన్ మీద జుగుప్సాకరమైన వ్యాఖ్యలు చేసిన టీడీపీ నేత అయ్యన్న పాత్రుడి మీద గుస్సా అవుతూ, చంద్రబాబుకి వినతి పత్రం ఇచ్చే ప్రయత్నం వైసీపీ ప్రజా ప్రతినిథి చేశాడన్నది వైసీపీ వెర్షన్. ముఖ్యమంత్రి మీద జుగుప్సాకరమైన వ్యాఖ్యలు టీడీపీ నేత చేస్తే, ఆయన మీద కేసులు పెట్టే అవకాశం అధికార పార్టీకి వుంది. అంతకు మించిన బండ బూతులు వైసీపీ నేతలు, సదరు టీడీపీ నేతని తిట్టేశారనుకోండి.. అది వేరే సంగతి. అలాంటప్పుడు, వినతిపత్రం.. అనే ప్రస్తావన ఎందుకు వస్తుంది.?

‘అది వినతి పత్రం ఇచ్చేందుకు జరిగిన ప్రయత్నం మాత్రమే.. అది దాడి కాదు, దండయాత్ర అసలే కాదు..’ అంటూ పోలీస్ ఉన్నతాధికారులూ వివరణ ఇచ్చారు. వైసీపీ వాదనా, పోలీసుల వాదన ఒకేలా ఎలా వుంది.? అంటే, పోలీసులు పూర్తిగా వైసీపీ వెర్షన్‌ని వినిపిస్తున్నారని అనుకోవాలేమో.

ప్రతిపక్ష నేతకు వినతిపత్రం ఇవ్వడానికి పదుల సంఖ్యలో అనుచరుల్ని వెంటేసుకుని అధికార పక్షానికి చెందిన నేత వెళ్ళడమా.? దీన్ని దండయాత్ర అని కాక ఇంకేమనాలి.? ప్రతిపక్ష నేత చంద్రబాబుగానీ, విపక్షాలకు చెందిన ఇంకెవరైనా నేతలుగానీ, పెద్ద మొత్తంలో అనుచరుల్ని వెంటేసుకుని, ముఖ్యమంత్రికి వినతిపత్రం ఇస్తామంటే, పోలీసులు.. అనుమతిస్తారా.? అక్కడ గలాటా జరిగితే, దాన్ని కూడా ‘దాడి కాదు, దండయాత్ర కాదు..’ అని అనగలరా.? అసలు ఆంధ్రప్రదేశ్‌లోనే ఎందుకిలా మాటలు ట్విస్ట్ అవుతున్నాయి.? ప్రభుత్వంలో వున్నవారు, ప్రభుత్వ వ్యవస్థల్ని నడుపుతున్నవారు, అధికారులు కూడా ఈ ‘ట్విస్టింగ్’ మాటలు ఎలా చెప్పగలుగుతున్నారు.? అన్నదే మిలియన్ డాలర్ల ప్రశ్న.

గతంలో తమిళనాడు రాజకీయాల్లో కక్ష సాధింపుల గురించి విన్నాం.. ఇప్పుడు అంతకన్నా దారుణంగా ఏపీలో కక్ష సాధింపు రాజకీయాలు నడుస్తున్నాయ్.. వ్యవస్థల్ని నిర్వీర్యం చేసే ఈ కక్ష సాధింపు చర్యలకు ఇప్పట్లో ముగింపు పడేలా లేదు. వచ్చే ఎన్నికల తర్వాత తాము అధికారంలోకి వస్తామనీ, ఇంతకు ఇంత బదులు తీర్చుకుంటామని టీడీపీ హెచ్చరిస్తున్న దరిమిలా.. రాష్ట్రం ఇప్పట్లో బాగుపడే అవకాశాలైతే లేవన్నది నిర్వివాదాంశం.