మంత్రి రోజాగారూ.! స్పృహలో వుండే చిరంజీవి కుటుంబాన్ని తూలనాడుతున్నారా.?

సినీ నటి, వైసీపీ నేత, నగిరి ఎమ్మెల్యే.. పైగా మంత్రి కూడా అయిన ఆర్కే రోజా అలియాస్ రోజా సెల్వమని, రాజకీయాల్లో నోటి దురుసుతనానికి కేరాఫ్ అడ్రస్.! రాజకీయాలన్నాక విమర్శలు మామూలే. కానీ, రోజా విమర్శలు ‘బోర్డర్ క్రాస్ చేసేసి’ వుంటాయ్.!

ఏం, ఎవరైనా ఆ స్థాయికి దిగజారి మాట్లడలేరా.? ఎందుకు మాట్లాడలేరు. కాకపోతే, కాస్తంత సభ్యత, సంస్కారం గురించి ఆలోచిస్తారంతే. సరే, ఆ సంగతి పక్కన పెడితే, పవన్ కళ్యాణ్‌ని విమర్శించే క్రమంలో తాజాగా మెగాస్టార్ చిరంజీవిని విమర్శల్లోకి లాగారు రోజా. ‘చిరంజీవి, ఆయన తమ్ముళ్ళ వల్ల ప్రజలకు ఉపయోగం ఏమీ లేదు..’ అంటూ విమర్శించేశారు రోజా.

నవ్విపోదురుగాక నాకేటి.? అన్నట్టుంది మంత్రి రోజా వ్యవహారం. కొన్నాళ్ళ క్రితం, మంత్రి పదవి రాగానే రోజా స్వయంగా తన కుటుంబ సభ్యుల్ని వెంటేసుకుని, మెగాస్టార్ చిరంజీవి ఇంటికి వెళ్ళారు. అక్కడ భోజనం చేసి వచ్చారు. చిరంజీవితో నవ్వుతూ ఫొటోలు దిగారు కూడా.

అయినా, చిరంజీవి వల్ల ప్రజలకు ఉపయోగం లేదని రోజా చెప్పడమేంటి.? అసలు రోజా వల్ల ప్రజలకు ఉపయోగమేంటి.? ఆమె నుంచి ఏం నేర్చుకోవాలి భావి భారతం.? ఆమె మాట్లాడే ‘డిక్కీ బలిసిన కోడి’ లాంటి మాటలా.? ‘నన్ను రేప్ చేసే దమ్ము ఎవరికైనా వుందా.?’ లాంటి మాటలా.?

ఇలా నెటిజనం సోషల్ మీడియా వేదికగా రోజాని కడిగి పారేస్తున్నారు. అంతేనా, బ్లడ్ బ్యాంక్ మరియు ఐ బ్యాంక్ ద్వారా రక్తదానం, నేత్రదానం వంటి గొప్ప కార్యక్రమాల్ని చిరంజీవి చేపడుతున్న విషయాల్నీ ప్రస్తావిస్తున్నారు.. ఇవేవీ రోజాకి కనిపించడంలేదా.? అని ప్రశ్నిస్తున్నారు.

చిత్రమేంటంటే, ప్రతి విషయంలోనూ రోజాని వెనకేసుకొచ్చే బులుగు మీడియా కూడా చిరంజీవిపై రోజా విమర్శల్ని తప్పు పడుతుండడం. కోవిడ్ కష్ట కాలంలో, వైసీపీ నేతలు బాధ్యతారాహిత్యంగా వ్యవహరిస్తే, మెగాస్టార్ చిరంజీవి.. తాను రాజకీయాల్లో లేకపోయినా.. సేవా భావంతో ఆక్సిజన్ బ్యాంక్స్ నెలకొల్పారు. దటీజ్ మెగాస్టార్ చిరంజీవి.

సినీ పరిశ్రమలో ఎందరో కార్మికుల్ని చిరంజీవి ఆదుకున్నారు. సినీ నటిగా రోజా, సినీ పరిశ్రమలో ఎంతమంది కార్మికులకి సాయం చేశారు.? అన్‌స్టాపబుల్ టాక్ షోకి పవన్ కళ్యాణ్ వెళితే ప్యాకేజీ తీసుకున్నట్టు. ఈటీవీలో జబర్దస్త్ చేసిన రోజా ప్యాకేజీ తీసుకున్నట్టు కాదు. పవన్ కళ్యాణ్ సోదరుడు చిరంజీవి ఇంటికి రోజా వెళ్ళడం ద్వారా ఏ ప్యాకేజీకి ఆమె కక్కుర్తి పడినట్లు.?

తిన్న ఇంటి వాసాలు లెక్క పెట్టడమంటారే.. అలా చిరంజీవి ఇంటికి భోజనానికి వెళ్ళి.. చిరంజీవిని విమర్శించడం. ఇంతకన్నా దిగజారుడుతనం ఇంకేముంటుంది.? అంటూ చిరంజీవి అభిమానులు, మంత్రి రోజాపై మండిపడుతున్నారు.

చంద్రబాబు పంచన చేరి వైఎస్ రాజశేఖర్ రెడ్డిని తూలనాడిన రోజా, వైఎస్ జగన్ పంచన చేరి చంద్రబాబునీ, పవన్ కళ్యాణ్‌నీ తూలనాడుతున్నారు. రేప్పొద్దున్న పవన్ కళ్యాణ్ పంచన చేరాల్సిన అవసరం రావొచ్చు.! కానీ, ఆమె ఏమాత్రం మొహమాట పడదు. తనను తాను ఎప్పుడూ అద్దంలో చూసుకోదు.!