వైఎస్‌ జగన్‌ని పవన్‌ మెచ్చుకున్నా.. ఒప్పుకోవట్లేదెందుకో.!

‘ఎట్టకేలకు వైఎస్‌ జగన్‌ మోహన్‌రెడ్డిని ముఖ్యమంత్రిగా జనసేన అధినేత పవన్‌ కళ్యాణ్‌ గుర్తించారు..’ అనే చర్చ ఏపీ రాజకీయ వర్గాల్లో జరుగుతోంది. ఎవరు గుర్తించినా, గుర్తించకపోయినా వైఎస్‌ జగన్‌ మోహన్‌రెడ్డి ఆంధ్రప్రదేశ్‌కి ముఖ్యమంత్రి. అలాంటిది, పవన్‌ కళ్యాణ్‌ మాత్రం ఎందుకు జగన్‌ని ముఖ్యమంత్రిగా గుర్తించరు.? ఛాన్సే లేదు. ఇసుక కొరత నేపథ్యంలో భవన నిర్మాణ రంగ కార్మికులు బలవన్మరణాలకు పాల్పడితే, జగన్‌ ప్రభుత్వం స్పందించాలని పవన్‌ కళ్యాణ్‌ లాంగ్‌ మార్చ్‌ చేశారు. దానర్థం, జగన్‌ని ముఖ్యమంత్రిగా పవన్‌ గుర్తించినట్లే కదా.!

ఇంకా చాలా విషయాల్లోనూ పవన్‌, ‘ముఖ్యమంత్రిగారూ..’ అని సంబోదిస్తూనే వచ్చారు. కానీ, వైసీపీ శ్రేణులకి మాత్రం ‘జగన్‌ రెడ్డిగారూ..’ అన్న ప్రస్తావన మాత్రమే విన్పించింది, కన్పించింది. ఇక, తాజాగా సుగాలి ప్రీతి కేసు విషయమై ముఖ్యమంత్రి వైఎస్‌ జగన్‌ ఎట్టకేలకు స్పందించడం పట్ల పవన్‌ కళ్యాణ్‌ హర్షం వ్యక్తం చేశారు. సుగాలి ప్రీతి కుటుంబానికి న్యాయం జరగాలని ఆకాంక్షిస్తూ, ఆ దిశగా చర్యలు తీసుకోవాలని డిమాండ్‌ చేశారు జనసేన అధినేత పవన్‌ కళ్యాణ్‌. కానీ, వైసీపీ శ్రేణులకి ఇది కూడా నచ్చడంలేదు. ఇంకా ‘ప్యాకేజీ కళ్యాణ్‌’ అనీ, ఇంకోటనీ.. పవన్‌ కళ్యాణ్‌ మీద సెటైర్లు, జుగుప్సాకరమైన కామెంట్లు చేస్తూనే వున్నారు.

పవన్‌ కళ్యాణ్‌ని తిడితే, సుగాలి ప్రీతి కుటుంబానికి న్యాయం జరుగుతుందా.? సుగాలి ప్రీతి కేసులోనే కాదు, వైఎస్‌ వివేకానందరెడ్డి హత్య కేసులోనూ సీబీఐ విచారణకు ముఖ్యమంత్రి వైఎస్‌ జగన్‌ ఆదేశించాల్సి వుంది. ఇవి మాత్రమే కాదు, వైఎస్‌ జగన్‌పై గతంలో విశాఖ విమానాశ్రయంలో జరిగిన హత్యాయత్నం (కోడి కత్తి కేసుగా ప్రాచుర్యం పొందింది) కేసులోనూ సీబీఐ విచారణ జరిగి తీరాల్సిందే. ముఖ్యమంత్రి అయ్యాక, ఎనిమిదిన్నర నెలల పాటు, సుగాలి ప్రీతి కేసుపై పెదవి విప్పని వైఎస్‌ జగన్‌, ఎప్పుడైతే కర్నూలులో సుగాలి ప్రీతి తల్లి కోరిక మేరకు ‘జస్టిస్‌ ఫర్‌ సుగాలి ప్రీతి’ అంటూ ర్యాలీ చేశారో, ఆ తర్వాతే స్పందించారన్నది జగమెరిగిన సత్యం.

చంద్రబాబు హయాంలో ఆ ఘటన జరిగితే, వైఎస్‌ జగన్‌ మోహన్‌రెడ్డి ప్రభుత్వానికేంటి సంబంధం.? అని కొందరు అజ్ఞానులైన వైసీపీ నేతలు వ్యాఖ్యానించారు. కానీ, పవన్‌ ఒత్తిడి పనిచేసింది, వైఎస్‌ జగన్‌ దిగొచ్చారు. క్రెడిట్‌ పవన్‌ కళ్యాణ్‌కి ఇచ్చినా ఇవ్వకున్నా, సుగాలి ప్రీతి కుటుంబానికి న్యాయం జరిగితే అంతకన్నా కావాల్సిందేముంది.?