జనసమీకరణ.! వైసీపీకి ఎందుకు కష్టమవుతోంది.?

ఇప్పుడున్న రాజకీయాల్లో ఏ పార్టీ చేపట్టిన కార్యక్రమానికైనా జనాన్ని తరలించాలంటే అది చాలా ఖర్చుతో కూడుకున్న వ్యవహారమే. ఒక్క జనసేన పార్టీకే ఆ సమస్య లేదు. అది జగమెరిగిన సత్యం.

గతంలో వైసీపీ జనాన్ని సమీకరించడంలో తమకెవరూ సాటి రారన్నట్లు వ్యవహరించేది. ప్రజా సంకల్ప యాత్ర సందర్భంగా పెద్దమొత్తంలో ఖర్చు చేసి జనాన్ని సమీకరించడం చూశాం. అప్పుడు వైసీపీ ప్రతిపక్షంలో వుంది. కానీ, ఇప్పుడు అధికార పక్షంలో వుండి కూడా జనాన్ని తరలించడానికి నానా తంటాలూ పడాల్సి వస్తోంది వైసీపీ.

అత్త కొట్టినందుకు కాదు, తోటికోడలు నవ్వినందుకు.. అన్న చందాన, తమ సభలకు రానందుకు కాదు.. విపక్షాల సభలకు జనం వస్తుండడంపై వైసీపీ ఆందోళన చెందుతోంది.

జన సమీకరణ విషయమై వైసీపీ గతంలో అనుసరించిన వ్యూహాల్ని ప్రస్తుత ప్రతిపక్షం తెలుగుదేశం పార్టీ అనుసరిస్తోంది. ప్రభుత్వ వైఫల్యాల్ని ఎండగట్టే క్రమంలో టీడీపీ అధినేత చంద్రబాబు, ఆయన తనయుడు ఎమ్మెల్సీ నారా లోకేష్ కూడా జనంలో వుంటున్నారు.

చంద్రబాబు, నారా లోకేష్ ఎక్కడికి వెళ్ళినా.. వేలల్లో జనం వుండేలా టీడీపీ శ్రేణులు పనిచేస్తున్నాయి. మరోపక్క, వైసీపీ సభలకు జనం వెలవెలబోతున్నారు. గతంలో ఏ నేతలైతే వైసీపీ కార్యక్రమాలకు జనం పోగేశారు, ఇప్పుడు అదే నేతలు తమ వ్యూహాలు జన సమీకరణ విషయంలో పని చేయకపోవడంతో కంగారు పడాల్సి వస్తోంది.

ప్రభుత్వంలో వున్నవారికి ఇలాంటి విషయాల్లో అడ్వాంటేజ్ వుంటుందిగానీ, అది కూడా పనిచేయడంలేదిక్కడ. ముఖ్యమంత్రి మాట్లాడుతోంటే, బలవంతంగా తెచ్చిన జనం.. వుండలేక పారిపోతున్నారు. ఈ విషయమై అధినేత వైఎస్ జగన్ ఎంతలా పార్టీ శ్రేణులకు క్లాస్ పీకుతున్నా ‘పని’ జరగడంలేదు.!

ప్రతి బహిరంగ సభా ఓ ఖర్చు దండగ వ్యవహారంగా మారిపోవడంతో, స్థానిక నాయకులూ ఆర్థికంగా నష్టపోతున్నారు.