వారెవ్వా.! రాజకీయమంటే ఇలాగుండాలె.!

తల్లీ లేదు, చెల్లీ లేదు.. తమ రాజకీయ అవసరాల కోసం ఎవరి మీదనైనాసరే, ‘రాజకీయ ప్రత్యర్థి’ అనే ముద్ర వేసెయ్యొచ్చు. వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డికి తెలిసే ఇదంతా జరుగుతోందా.? లేదంటే, అధినేత మెప్పు కోసమే వైసీపీ నేతలు అడ్డగోలు రాజకీయాలు చేస్తున్నారా.? అన్న చర్చ జరగడానికి బలమైన కారణం లేకపోలేదు.

వైఎస్ వివేకానందరెడ్డి దారుణ హత్యకు సంబంధించి సీబీఐ విచారణ జరుగుతున్న దరిమిలా, అధికార వైసీపీలో కలవరం బయల్దేరింది. ఆ పార్టీకి చెందిన నేతలు, ప్రత్యర్థి పార్టీల నుంచి వస్తున్న ప్రశ్నలకు సమాధానం చెప్పలేక కిందా మీదా పడుతున్నారు. ఈ క్రమంలో తప్పటడుగులు వేస్తున్నారు.

ఏ స్థాయికి వైసీపీ రాజకీయం దిగజారిపోయిందంటే, వైఎస్ వివేకానందరెడ్డి కుమార్తె సునీతా రెడి, తెలుగుదేశం పార్టీ కోసం పనిచేస్తున్నట్టుగా వుందనే స్థాయికి. 2019 ఎన్నికల సమయంలో సునీతారెడ్డి, వైసీపీ గెలుపు కోసం తనవంతుగా కృషి చేశారు.. అదీ పరోక్షంగా.

తన తండ్రి వైఎస్ వివేకానందరెడ్డి హత్య కేసుకు సంబంధించి ఆమె ఎక్కే గడప.. దిగే గడప.. అన్న చందాన న్యాయం కోసం పోరాడారు. ఈ క్రమంలో ఆమెను అడ్డం పెట్టుకుని వైసీపీ చేసిన రాజకీయాలు అన్నీ ఇన్నీ కావు. అధికారంలోకి వచ్చాక వైసీపీ, వైఎస్ వివేకానందరెడ్డి హత్యకు సంబంధించి దోషుల్ని శిక్షించాలన్న కనీస విజ్ఞతని పక్కన పడేసింది.

దాంతో, సునీతారెడ్డి సీబీఐ విచారణ కోసం హైకోర్టును ఆశ్రయించారు.. ఆమె పోరాటం ఫలించి, సీబీఐ విచారణ జరుగుతోంది. సీబీఐ దాఖలు చేసిన చార్జిషీటు నేపథ్యంలో వైసీపీ ఉలిక్కిపడింది. ఈ క్రమంలో సునీతారెడ్డిపై ఆరోపణలు చేస్తున్నారు వైసీపీ నేతలు. సునీతారెడ్డి వచ్చే ఎన్నికల్లో టీడీపీ నుంచి పోటీ చేస్తారంటూ జోస్యం చెప్పేస్తున్నారు. ఇదీ ఈ స్థాయికి దిగజారింది వైసీపీ రాజకీయం.