ప్రత్యేక హోదా వీళ్ళు అడిగేస్తారట.? వాళ్ళు ఇచ్చేస్తారా మరి.?

ప్రత్యేక హోదా డిమాండ్ విషయమై వెనక్కి తగ్గే ప్రసక్తే లేదని వైసీపీ అంటోంది. అరరె, వెనక్కి తగ్గరు సరే.. ముందుకు వెళతారా.? వెళ్ళరా.? అన్న ప్రశ్నకైతే సమాధానం చెప్పరుగాక చెప్పరు. ఎందుకంటే, ముందుకు వెళ్ళే ఉద్దేశ్యం లేదు గనుక.

ఆంధ్రప్రదేశ్‌కి ప్రత్యేక హోదా ఎందుకు రాదో చూస్తాం.. అంటూ ఎన్నికల వేళ, అంతకు ముందు వైసీపీ అధినాయకత్వం పలికిన ప్రగల్భాల గురించి ఎంత చెప్పుకున్నా తక్కువే. వావ్, ఇంత గట్టిగా మాట్లాడుతున్నారంటే ప్రత్యేక హోదా తెచ్చేస్తారేమోనని గుడ్డిగా నమ్మేసిన ఓటర్లు, వైసీపీకి అధికారం కట్టబెట్టారు.

అంతే, అధికార పీఠమెక్కేదాకా పులులు.. అధికార పీఠమెక్కాక పిల్లులైపోయాయి. ప్రత్యేక హోదా కోసం గతంలో ఎంపీలు రాజీనామాలు చేశారు. మరి, ఇప్పుడో.. ‘రాజీనామాలు చేస్తే ఏమొస్తది.?’ అంటూ అమాయకంగా ప్రశ్నించేస్తున్నారు. కేంద్ర హోంమంత్రి అమిత్ షా, తిరుపతి పర్యటన నేపథ్యంలో ప్రత్యేక హోదా వ్యవహారం ఘాటెక్కింది.

ఆగండాగండి.. ఘాటెక్కడమంటే, జనం ఉద్యమిస్తున్నారనో.. రాజకీయ పార్టీలు ఉద్యమిస్తున్నాయనో.. అధికార వైసీపీ, గట్టిగా కేంద్రాన్ని నిలదీసేస్తోందనో కాదు. దీన్నొక రాజకీయ పరమైన అంశాన్ని చేసి, తద్వారా రాజకీయ పబ్లిసిటీ పొందడానికి అధికార వైసీపీ ‘గుంట నక్క తెలివితేటలు’ ప్రదర్శించడంతోనే ఈ మాత్రం ఘాటైనా ఎక్కింది.

‘మేం ప్రత్యేక హోదా ఇచ్చేది లేదు..’ అని కుండబద్దలుగొట్టేస్తోంది కేంద్రంలోని నరేంద్ర మోడీ సర్కార్. ‘ప్రత్యేక హోదా ఇచ్చేది లేదు..’ అని చెప్పి మరీ, తిరుపతి ఉప ఎన్నికల్లో పోటీ చేసింద బీజేపీ. బీజేపీ గెలవలేదుగానీ, చెప్పుకోదగ్గ ఓట్లయితే వచ్చాయ్. ఆ సమయంలోనే వైసీపీ, బీజేపీని నిలదీసి వుంటే.. సీన్ ఇంకోలా వుండేదేమో.

ఇప్పుడు అదే తిరుపతి వేదికగా ముఖ్యమంత్రి వైఎస్ జగన్, కేంద్ర హోం మంత్రి దృష్టికి ప్రత్యేక హోదా అంశాన్ని తీసుకెళతారట. దృష్టికి తీసుకెళితే పనులు జరుగుతాయా.? నిలదీస్తే పనులు జరుగుతాయా.?