బులుగు నాటకం: మండలిపై అలా.. మూడు రాజధానులపై ఇలా.!

శాసన మండలి రద్దు దిశగా ఆంధ్రప్రదేశ్ అసెంబ్లీలో వైఎస్ జగన్ సర్కార్ తీర్మానం చేసి కేంద్రానికి పంపిన సంగతి తెలిసిందే. శాసన మండలిని ఖర్చు దండగ వ్యవహారమని వైఎస్ జగన్ సర్కార్ భావించింది. ముఖ్యమంత్రి వైఎస్ జగన్ మోహన్ రెడ్డి, శాసన సభలో.. శాసన మండలి గురించి ఏం మాట్లాడారో ప్రపంచమంతా చూసింది.

మరిప్పుడు, ఆ శాసన మండలి కోసం వైసీపీ తరఫున అభ్యర్థుల్ని ఖరారు చేయడమేంటి.? అసలు సభ్య సమాజానికి వైసీపీ అధినేత, ముఖ్యమంత్రి వైఎస్ జగన్ మోహన్ రెడ్డి ఏం సంకేతాలు పంపదలచుకున్నారు.? మాట తప్పేది లేదు.. మడమ తిప్పేది లేదంటే.. చెప్పేది ఒకటి, చేసేది ఇంకొకటని బహుశా వైఎస్ జగన్ సరికొత్త అర్థం చెబుతున్నట్టుంది.

అసలు శాసన మండలి రద్దు వ్యవహారం ఎలా తెరపైకొచ్చింది. ఇంగ్లీషు మీడియం, మూడు రాజధానులు వంటి వ్యవహారాలపై శాసన మండలిలో వైసీపీ ప్రభుత్వానికి షాక్ తగిలింది. దాంతో, మండలినే రద్దు చేయాలని ముఖ్యమంత్రి వైఎస్ జగన్ మోహన్ రెడ్డి నిర్ణయం తీసుకున్నారు.

మరి, మూడు రాజధానుల వ్యవహారం ఏమైనట్టు.? అది ప్రస్తుతం కోర్టు పరిధిలో వుంది. కేంద్రం పరిధిలో శాసన మండలి రద్దు అంశం పెండింగులో వుంది గనుక.. చేసేది లేక, మండలికి సభ్యుల్ని ఖరారు చేస్తున్నారు వైసీపీ అధినేత, ఆంధ్రప్రదేశ్ ముఖ్యమంత్రి వైఎస్ జగన్ మోహన్ రెడ్డి.

బాగానే వుంది.. అదే దారిలో, మూడు రాజధానుల అంశం కోర్టులో వుంది గనుక, ప్రస్తుత రాజధాని అమరావతి విషయంలోనూ సానుకూల దృక్పథంతో ఆలోచన చేయొచ్చు కదా.? కానీ, చెయ్యరు. రాజధాని, రాష్ట్ర ప్రజల ఆత్మగౌరవం. ఒకటేం ఖర్మ.. అలాంటివి మూడుంటే మంచిదే. కానీ, ముందైతే ఒకటి వుండాలి కదా.?

ఒక రాజధాని కట్టుకున్న తర్వాత, మూడు రాజధానులేంటి.? మూడు వందల ముప్ఫయ్ మూడు.. ఇంకా కుదిరితే, మూడు వేల మూడు వందల ముప్ఫయ్ మూడు కూడా కట్టుకోవచ్చు రాజధానులు. ఈ మాత్రం లాజిక్ తెలియకుండానే అధికార వైసీపీ, రాష్ట్రాన్ని పాలించేస్తోందా.? జస్ట్ ఆస్కింగ్.