వాటర్ బాటిల్ కంటే తక్కువ ధరకే వ్యాక్సిన్.. ఏదీ ఎక్కడ.?

‘కరోనా వైరస్ మీద పోరులో భాగంగా తమ సంస్థ నుంచి వచ్చే వ్యాక్సిన్.. వాటర్ బాటిల్ ధర కంటే తక్కువ ధరకే లభ్యమవుతుంది..’ అంటూ కొన్నాళ్ళ క్రితం దేశీయ టీకా తయారీ సంస్థ ఒకటి అభిప్రాయపడింది. ముందస్తు అంచనాలకీ, ఆ తర్వాత మార్కెట్ రేటుకీ అస్సలు పొంతన వుండదని తేలడానికి పెద్దగా సమయం పట్టలేదు. ఆ సంస్థ పేరు భారత్ బయోటెక్.. ఆ వ్యాక్సిన్ పేరు కోవాగ్జిన్.

దేశంలో ప్రస్తుతానికి మూడు వ్యాక్సిన్లు అందుబాటులో వున్నాయి. అందులో మొదటి స్థానం కోవి షీల్డ్ దక్కించుకుంటే, రెండో స్థానం కోవాగ్జిన్ సొంతమైంది. మూడోది స్పుత్నిక్-వి. మూడో వ్యాక్సిన్ స్పుత్నిక్ – వి చాలా తక్కువ సంఖ్యలో.. అదీ ఇటీవలే అందుబాటులోకి వచ్చింది. నిజానికి, స్వదేశీ తయారీ వ్యాక్సిన్ అయిన కోవాగ్జిన్ పెద్దయెత్తున దేశంలో తయారై, ప్రజలకు తక్కువ సమయంలోనే అందుబాటులోకి వచ్చి వుండాలి. కానీ, చాలా తక్కువ సంఖ్యలోనే కోవాగ్జిన్ టీకాలు దేశంలో తయారవుతున్నాయి. డిమాండ్ ఎక్కువ వుంటే, మార్కెట్ బావుంటుందని బహుశా కోవాగ్జిన్ తయారీదారు అయిన భారత్ బయోటెక్ భావిస్తోందేమో.

నిజానికి, కోవాగ్జిన్ పేరుని కమ్మ వ్యాక్సిన్ అంటూ వైసీపీ నేతలు అభివర్ణిస్తూ వస్తున్న విషయం విదితమే. మన తెలుగు నేల మీద తయారైన వ్యాక్సిన్, మన తెలుగు రాష్ట్రాల్లో అవసరమైన మేర అందుబాటులో లేకపోవడం మరో ఆశ్చర్యకరమైన విషయం. మన తెలుగు రాజకీయ ప్రముఖుల్లో కొందరికి ఈ సంస్థ అధిపతులతో సన్నిహిత సంబంధాలున్నాయి. బంధుత్వం బంధుత్వమే.. వ్యాపారం వ్యాపరమే.. ఇలాంటి విషయాల్లో.

నిజానికి, దేశం ఎదుర్కొంటున్న క్లిష్ట పరిస్థితులతో పోల్చితే, వ్యాక్సిన్ తయారీ సంస్థ అనుసరిస్తున్న వైఖరి అస్సలేమాత్రం సమర్థనీయం కాదు. కేంద్ర, రాష్ట్ర ప్రభుత్వాలకి సహకరించి, వాటి నుంచి సహకారం తీసుకుని.. పెద్ద మొత్తంలో వ్యాక్సిన్లు తయారు చేసి వుండాలి. ‘అబ్బే, వ్యాక్సిన్ తయారీకి అవసరమైన సౌకర్యాలు చాలా తక్కువగా వున్నాయి..’ అని కుంటి సాకులు చెప్పుకుంటూ పోతే, వేలాది ప్రాణాలు ఎలా కాపాడబడతాయి.? భారత్ బయోటెక్ సంస్థ ఇంతలా మొండికేస్తున్నా, కేంద్ర – రాష్ట్ర ప్రభుత్వాలూ స్పందించాల్సిన రీతిలో స్పందించకపోవడం మరింత ఆశ్చర్యకరమైన విషయం.