అమరావతికి వెన్నుపోటు పొడుస్తున్నది వాళ్ళేనా.?

ఆంధ్రప్రదేశ్‌ రాజధాని అమరావతికి ‘వెన్నుపోటు’ ఖరారైంది. ఆ వెన్నుపోటులో భాగస్వాములు ఇంకెవరో కాదు, సాక్షాత్తూ కృష్ణా – గుంటూరు జిల్లాలకు చెందిన అధికార పార్టీ ముఖ్య నేతలేనట. ‘ముఖ్యమంత్రి వైఎస్‌ జగన్‌, అమరావతిపై తీసుకున్న నిర్ణయానికి మేమంతా మనస్ఫూర్తిగా మద్దతునిస్తున్నాం..’ అంటూ కృష్ణా – గుంటూరు జిల్లాలకు చెందిన ప్రజా ప్రతినిథులు ముక్త కంఠంతో తేల్చి చెప్పారు.. అదీ ముఖ్యమంత్రి వైఎస్‌ జగన్‌తో భేటీ అనంతరం.

ఓ పక్క రాజధాని అమరావతిని విశాఖకు తరలించేందుకు ఏర్పాట్లు జోరుగా సాగుతున్నాయి. ఇంకోపక్క, అమరావతిలో ఆందోళనలు తీవ్రరూపం దాల్చాయి. జీఎన్‌ రావు కమిటీ నివేదిక వచ్చిన మాట వాస్తవం.. అంతకన్నా ముందే అసెంబ్లీలో మూడు రాజధానులపై వైఎస్‌ జగన్‌ చూచాయిగా ప్రకటన చేసిన మాట వాస్తవం. అయితే, ప్రభుత్వం ఇంత పెద్ద నిర్ణయం తీసుకోవాలంటే, దానికి క్యాబినెట్‌ ఆమోదం అవసరం. క్యాబినెట్‌ ఆమోదానికంటే ముందే, విశాఖలో రాజధానికి అవసరమైన ఏర్పాట్లు జరిగిపోతున్నాయి.

అధికార పార్టీకి చెందిన విజయసాయిరెడ్డి, ఫలానా చోట రాజధాని.. అంటూ ప్రకటించేస్తారు. పైగా, ఏకంగా 3 గంటల పాటు 24 కిలోమీటర్ల మేర మానవహారంతో విశాఖలో వైఎస్‌ జగన్‌ మోహన్‌రెడ్డికి స్వాగత ఏర్పాట్లు అని వెల్లడించేస్తారు. అంటే, వ్యవహారం ఇప్పుడు కొత్తగా ఊపిరి పోసుకున్నది కాదన్నమాట. రాజధాని మార్పుపై ముందే వైఎస్సార్‌ కాంగ్రెస్‌ పార్టీ అధినేత వైఎస్‌ జగన్‌ ఓ నిర్ణయం తీసుకున్నారు. అధికారంలోకి రాగానే, సమయం చూసి అమరావతిని దెబ్బ కొట్టారు.. అని రాజకీయ వర్గాల్లో చర్చ జరుగుతోంది.

మామూలుగా అయితే, అమరావతి విషయంలో జరుగుతున్న ఈ ‘వెన్నుపోటు’పై ఆ ప్రాంత ప్రజా ప్రతినిథులు గళం విప్పాల్సి వుంది. కానీ, ఎవరికి అంత సీన్‌ వుంది.? అమరావతి రైతులకు అన్యాయం జరగనివ్వం.. అని మాత్రమే అధికార పార్టీ నేతలు చెబుతున్నారు. రాజధాని అమరావతిలో కొనసాగుతుందా.? అన్నదానిపై మాత్రం పెదవి విప్పడంలేదు. ఇదిలా వుంటే, రేపు అమరావతి ప్రాంతంలో పోలీసుల మోహరింపు కనీవినీ ఎరుగని స్థాయిలో వుండబోతోంది. క్యాబినెట్‌ భేటీ జరగనున్న దరిమిలా, ఇప్పటికే భారీయెత్తున పోలీసులు మోహరించారు. ‘యుద్ధ వాతావరణం’ నెలకొందంటూ అమరావతి ప్రాంత ప్రజలు భయాందోళనలకు గురవుతున్నారు.