తిరుగులేని లేడీ సూపర్ స్టార్.. విజయశాంతి కెరీర్ కు 40 ఏళ్లు పూర్తి..

తెలుగు సినిమా పరిశ్రమలో టాప్ రేంజ్ హీరోయిన్లు ఎందరో ఉన్నారు. కానీ హీరోతో సమానమైన స్టార్ ఇమేజ్ పొందిన హీరోయిన్ మాత్రం ఖచ్చితంగా విజయశాంతి మాత్రమే. హీరోలతో డ్యూయెట్లు ఎంత అందంగా చేసారో.. వీరోచితమైన ఫైట్లు కూడా అలానే చేశారు విజయిశాంతి. 80వ దశకంలో అప్రతిహతంగా కొనసాగింది ఆమె కెరీర్. తిరుగులేని ఆమె ఆధిపత్యానికి నేటితో 40 ఏళ్లు పూర్తయ్యాయి.

విజయనిర్మల దర్శకత్వంలో సూపర్ స్టార్ కృష్ణతో చేసిన ఆమె తొలి సినిమా ‘కిలాడీ కృష్ణుడు’ 1980 సెప్టెంబర్ 12న విడుదలైంది. హీరోయిన్ గా టాప్ లో ఉండగానే ప్రతిఘటన, రేపటి పౌరులు, కర్తవ్యం, వంటి సినిమాల్లో ప్రభావవంతమైన పాత్రలు చేశారు. ప్రతిఘటనలో ఆమె నటనకు ప్రేక్షకులు ముగ్దులైపోయారు. అప్పట్లోనే బ్లాక్ లో టికెట్ 500 అమ్ముడయిందంటే అతిశయోక్తి కాదు. కర్తవ్యం సినిమాలో పోషించిన పోలిస్ పాత్రకు జాతీయ ఉత్తమనటి అవార్డు దక్కింది. ఒసేయ్.. రాములమ్మ సృష్టించిన కలెక్షన్ల ప్రభంజనం.. ఓ కథగా చెప్పుకోవచ్చు. అమితాబ్ బచ్చన్, రజినీకాంత్, చిరంజీవితో విజయశాంతి నటించారు. చిరంజీవితో 19 సినిమాల్లో నటించారు.

కర్తవ్యం సినిమాతో లేడీ అమితాబ్, లేడీ సూపర్ స్టార్ అనిపించుకున్నారు. 2006లో నాయుడమ్మ సినిమా తర్వాత సినిమాల్లో నటించ లేదు. 14 ఏళ్ల గ్యాప్ తర్వాత మహేశ్ తో సరిలేరు నీకెవ్వరు మూవీలో నటించారు. కెరీర్ 40 ఏళ్లు పూర్తైన సందర్భంగా ఆమె ట్విట్టర్లో స్పందించారు. తొలి అవకాశం ఇచ్చిన విజయనిర్మల ఆంటీకి ఇన్నేళ్లూ ఆదరించిన ప్రేక్షకులకు ధన్యవాదాలు తెలిపారు లేడీ సూపర్ స్టార్.