విజయసాయిరెడ్డికి ఢిల్లీ పెద్దల వార్నింగ్‌.!

పేరుకి వైఎస్సార్‌ కాంగ్రెస్‌ పార్టీ నేత అయినా, విజయసాయి రెడ్డి వాలకం చూస్తే, ఆయన భారతీయ జనతా పార్టీ భావజాలం నరనరాన జీర్ణించుకుపోయినట్లు కనిపిస్తోంది. తెలుగుదేశం పార్టీని దెబ్బ కొట్టే క్రమంలో బీజేపీకి చాలా దగ్గరైపోయారు ఈ రెడ్డిగారు. తెలుగుదేశం పార్టీ నుండి, సీఎం రమేష్‌ని బీజేపీలోకి తీసుకెళ్లడంలో విజయసాయి రెడ్డి పడ్డ పాట్లు అన్నీ ఇన్నీ కావు. ఈ కష్టమేదో, వైఎస్సార్‌సీపీ కోసం పడినా బాగుండేదనీ, వైసీపీ ముఖ్య నేత ఒకరు తనకు అత్యంత సన్నిహితుడైన ఓ మీడియా ప్రతినిధి వద్ద తన ఆవేదనను వెళ్లగక్కేసుకున్నారు.

నిజమే, విజయసాయి రెడ్డి, బీజేపీతో అంటకాగుతున్నారన్న దాంట్లో ఎవరికీ ఎలాంటి సందేహాలు లేవు. ఒకవేళ బీజేపీకీ, వైఎస్సార్‌సీపీకీ మధ్యన అనుకోని స్పర్ధలొస్తే, తాను తెలివిగా బీజేపీలోకి జంప్‌ చేసేయాలని విజయ్‌ సాయి రెడ్డి చూస్తున్నారేమో. ఇదిలా ఉంటే, బీజేపీలోకి టీడీపీ ఎంపీలు జంప్‌ చేయడం వెనక పెద్ద కుట్ర ఉందనీ, ఇదంతా చంద్రబాబు ఆడిస్తున్న నాటకమనీ, విజయ సాయి రెడ్డి చేసిన వ్యాఖ్యలు, బీజేపీ అధిష్టానానికి ఆగ్రహం తెప్పించాయట.

తెలుగు రాష్ట్రాలకు చెందిన ఢిల్లీ స్థాయి బీజేపీ నేత ఒకరు ఈ విషయమై విజయ సాయి రెడ్డికి స్ట్రాంగ్‌ వార్నింగ్‌ ఇచ్చినట్లు తెలుస్తోంది. ‘వాళ్లిప్పుడు బీజేపీ ఎంపీలు.. అదుపు తప్పి వారిపై వ్యాఖ్యలు చేస్తే కౌంటర్‌ గట్టిగా ఇవ్వాల్సి వస్తుంది.. ‘ అని సదరు బీజేపీ నేత విజయ సాయి రెడ్డికి క్లాసు తీసుకున్నారట. చేసేది లేక విజయ సాయి రెడ్డి మిన్నకుండి పోయారట. అయినా, సుజనా చౌదరి, సీఎం రమేష్‌, టీజీ వెంకటేష్‌లతో కలిసి సరదాగా డిన్నర్‌ చేసిన విజయ సాయి రెడ్డి వాళ్లని కోవర్టులుగా చిత్రీకరించడమేంటీ.?

నరేంద్రమోడీ కాస్త చనువిస్తున్న మాట వాస్తవం. చంద్రబాబుకు గతంలో మోడీ ఓ రేంజ్‌లో చనువిచ్చారు. ఆ తర్వాత ఏమైందో అందరం చూశాం. విజయ సాయి రెడ్డి కాస్తంత అతి తగ్గించుకోకపోతే, ఇటు వైఎస్సార్‌సీపీకీ, అటు బీజేపీకీ దూరమయ్యే పరిస్థితి రావచ్చు. ఆయనేమీ ప్రజాబలం ఉన్న నాయకుడు కాదు. ప్రత్యేక పరిస్థితుల్లో మాత్రమే వైఎస్‌ జగన్‌ విజయ సాయి రెడ్డికి పార్టీలో అంత ప్రాధాన్యత ఇస్తున్నారు. బీజేపీ విషయంలో తోక జాడిస్తే, సుజనా చౌదరి బెదిరినట్లు, విజయసాయి రెడ్డి లొంగిపోవడం పెద్ద విషయమేమీ కాదు.