అన్‌ లాక్‌ 2: పూర్తిగా నిరాశపర్చిన మోడీ ప్రసంగం.!

‘వర్షాకాలం.. అనేక అనారోగ్య సమస్యలకు కారణమయ్యే సీజన్‌.. కరోనా వైరస్‌ పట్ల ఇంకాస్త ఎక్కువ అప్రమత్తంగా వుండాలి..’ అంటూ ప్రధాని నరేంద్ర మోడీ దేశ ప్రజల్ని ఉద్దేశించి ఈ రోజు ప్రసంగించిన సందర్భంలో వ్యాఖ్యానించారు. లాక్‌డౌన్‌తో లక్షలాదిమంది ప్రజల్ని కరోనా వైరస్‌ బారిన పడకుండా కాపాడుకున్నామనీ.. కేసుల సంఖ్య మరీ ఎక్కువగా పెరగకుండా చూసుకోగలిగామనీ.. ప్రధాని నరేంద్ర మోడీ చెప్పుకొచ్చారు.

‘మాస్క్‌లు ప్రతి ఒక్కరూ ధరించాల్సిందే.. మాస్క్‌ ధరించకపోతే దేశ ప్రధానికి సైతం జరీమానా పడే స్థాయిలో ఇక్కడా పరిస్థితులు వుండాలి’ అని ప్రధాని అభిప్రాయపడ్డారు. నిజమే, మాస్క్‌ ధరించకపోతే జరీమానాలు విధిస్తున్నారు.. కానీ, అవి సామాన్యులకే. ముఖ్యమంత్రులు మాస్క్‌ పెట్టుకోకుండా తిరిగేస్తున్నారు.. ప్రజా ప్రతినిథులు తమ వెంట అనుచరుల్ని వేసుకుని నానా హంగామా చేస్తున్నారు. కోర్టు మొట్టికాయలేసినా రాజకీయ నాయకుల్లో మార్పు రావడంలేదు. మరి, అలాంటివారిపై ఎలాంటి చర్యలు కేంద్రం తీసుకుంటుంది.? అన్న ప్రశ్న ప్రజల నుంచి ఉత్పన్నమవుతోంది.

‘అసలే కరోనా దెబ్బకి ఆర్థికంగా చితికిపోయాం. పొరపాటున మాస్క్‌ ధరించకపోతే, ఆ కారణంగా పెద్దమొత్తంలో జరీమానా చెల్లించాల్సి వస్తే పరిస్థితి ఏంటి.?’ అన్న ఆవేదన కూడా సాధారణ ప్రజానీకం నుంచి వ్యక్తమవుతోంది. ఓ పక్క, కరోనా పాజిటివ్‌ కేసులు గణనీయంగా పెరుగుతున్నాయని ప్రధాని స్వయంగా చెబుతున్నారు. మరి, లాక్‌డౌన్‌ నుంచి ఈ సడలింపులేంటి.? రేపట్నుంచి అన్‌ లాక్‌ 2 ప్రకటించడమేంటి.? అన్నిటికీ మించి, దేశంలో మద్యం షాపుల్ని తెరవాల్సిన అవసరమేంటి.? అవును, దేశంలో కరోనా పాజిటివ్‌ కేసులు పెరగడం మొదలయ్యింది మద్యం దుకాణాల్ని తెరవడంతోనే. ఆ తర్వాతే రోడ్డు ప్రమాదాలూ పెరిగాయి.. ఇతరత్రా సమస్యలూ పెరిగాయి.

నిజానికి, ప్రధాని ప్రసంగంపై దేశ ప్రజానీకం చాలా ఆశలు పెట్టుకున్నారు. కానీ, నెలవారీ ఇస్తోన్న ‘ఉచిత రేషన్‌’ నవంబర్‌ వరకు పొడిగిస్తున్నట్లు ప్రకటించడం మినహా.. దేశ ప్రజల్ని ఉద్ధరించే ఒక్క కొత్త కార్యక్రమాన్నీ ప్రధాని ప్రకటించలేకపోయారు. కరోనా కట్టడికి ఏం చర్యలు తీసుకుంటున్నదీ ప్రజలకు వివరించడంలో ప్రధాని విఫలమయ్యారు. నేటితో అన్‌ లాక్‌ 1 ముగుస్తుంది గనుక, రేపట్నుంచి అన్‌ లాక్‌ 2 మొదలవుతుందని చెప్పడానికే ప్రధాని ‘ప్రసంగం’ డిజైన్‌ చేసినట్లుంది పరిస్థితి. చైనా – భారత్‌ మధ్య సరిహద్దు వివాదం, చైనా యాప్స్‌పై వేటు.. వంటి అంశాలపైనా ప్రధాని మాట్లాడకపోవడం చాలామందిని విస్మయానికి గురిచేసింది. ఒక్కటి మాత్రం నిజం.. కరోనా వైరస్‌ ఓ పక్క కబళించేస్తోంటే.. కేంద్రం మాత్రం పూర్తిగా చేతులెత్తేసింది.