కరోనా తరహాలోనే మరో వైరస్.. అదీ చైనా నుంచే..

ప్రపంచాన్ని వణికించేస్తున్న కరోనా తరహాలో మరో మహమ్మారి విజృంభిచడానికి సిద్ధంగా ఉందంటే వణుకు రావడం ఖాయం. కానీ.. చైనా పరిశోధకులు ఇందుకు అవకాశాలున్నాయనే సంకేతాలు ఇస్తున్నారు. ఈ వైరస్ కు జీ-4 అని పేరు కూడా పెట్టేశారు. 2009లో వచ్చిన హెచ్1ఎన్1 వైరస్ నుంచే ఇది వచ్చే అవకాశం ఉందని అంటున్నారు. ఈ వైరస్ కు మనుషులపై ప్రభావం చూపే లక్షణాలన్నీ ఉన్నాయని అంటున్నారు. ఈమేరకు చైనా వ్యాధి నియంత్రణ, నివారణ కేంద్రం శాస్త్రవేత్తలు అంటున్నారు. దీనిని యూఎస్ కు చెందిన ‘ప్రొసీడింగ్స్ ఆఫ్ ది నేషనల్ అకాడమీ ఆఫ్ సైన్సెస్’ జర్నలో ఈ విషయాలను తెలిపారు.

కరోనా నిర్ధారణ పరిక్షలకు తీసుకున్నట్టే చైనాలోని వివిధ ప్రావిన్సుల్లోని జంతువధశాలలు, పశు వైద్యశాలల్లో ఉన్న పందుల ముక్కుల్లో నుంచే 30వేల నమూనాలను సేకరించారు. వీటిపై జరిపిన పరిశోధనల్లో దాదాపు 179 రకాల వైరస్లు ఉన్నట్టు గుర్తించారు. వైరస్ వల్ల మనుషుల్లో కనబడే లక్షణాలే కనిపించే ముంగిస జాతికి చెందిన ‘ఫెర్రెట్’ అనే జంతువుపై పరిశోధనలు చేశారు. వీటిలో ప్రమాదకర లక్షణాలు కపిపించాయని అన్నారు. దీంతో ఇది మనుషులపై తీవ్ర ప్రభావం చూపే అవకాశం ఉందని అంటున్నారు.

చైనాలో పందుల పరిశ్రమల్లో పనిచేస్తున్న కొందరిలో ఇప్పటికే వైరస్ సోకడంతో జీ4 జంతువుల నుంచి మనుషులకు సోకుతుందని తేల్చారు. అయితే.. ఇది మనుషుల నుంచి మనుషులకు సోకుతుందా లేదా అనేది ఇంకా తేలాల్సిన అంశం అంటున్నారు. మనుషుల కణాల్లో వేగంగా వృద్ధి చెందే ఈ వైరస్ ప్రభావాన్ని రోగనిరోధక శక్తి కూడా కాపాడలేదని అంటున్నారు. కృత్రిమ జంతుపోషణ ఎక్కువైపోవడం వల్లే ఈ ముప్పు పెరుగుతోందని కేంబ్రిడ్జి యూనివర్శిటీ పశువైద్య విభాగాధిపతులు అంటున్నారు.