అసెంబ్లీ సమావేశాల బాయ్‌‌కాట్: అప్పుడు చేసిందేటి చెప్మా.!

కరోనా నేపథ్యంలో బడ్జెట్ సమావేశాల్ని సజావుగా నిర్వహించుకోలేని దుస్థితి ఏర్పడింది ఆంధ్రపదేశ్ రాష్ట్రానికి. దేశంలో చాలా రాష్ట్రాలు బడ్జెట్ సమావేశాల్ని ఒకింత సజావుగానే నిర్వహించుకోగలిగాయి. కేవలం ఆంధ్రపదేశ్ రాష్ట్రానికి మాత్రమే ఈ భిన్నమైన పరిస్థితి ఎందుకు.? అన్నదానిపై భిన్న వాదనలున్నాయి. ఇక్కడి రాజకీయ పరిస్థితులు అలాంటివి. కాదేదీ రాజకీయానికి అనర్హం.. అన్నట్టు తయారైంది పరిస్థితి ఏపీలో.

స్థానిక ఎన్నికలు సహా అనేక కారణాలతో అసెంబ్ల బడ్జెట్ సమావేశాలకు అడ్డంకులు ఏర్పడ్డాయి. ఈ కారణంగానే ఆర్డినెన్స్ ద్వారా తాత్కాలిక బడ్జెట్ పెట్టుకోవాల్సి వచ్చింది. పద్ధతి ప్రకారం అసెంబ్లీలో బడ్జెట్ పెట్టి, ఆమోదించుకోవాలి గనుక.. ఒక్క రోజు బడ్జెట్ సమావేశాలకు ప్రభుత్వం ఎట్టకేలకు నిర్ణయం తీసుకుంది. ఈ ఒక్కరోజు సమావేశానికి హాజరైతే ఎంత.? అవ్వకపోతే ఎంత.? అన్న కోణంలో ప్రధాన ప్రతిపక్షం తెలుగుదేశం పార్టీ, అసెంబ్లీ సమావేశాల్ని బాయ్‌‌కాట్ చేస్తున్నట్లు ప్రకటించడం గమనార్హం. అయితే, టీడీపీ తీరుని వైసీపీ తీవ్రంగా ఖండిస్తోంది. ఇది హేయమైన చర్య.. అంటోంది. ఇదెక్కడి వింత వాదన.?

చంద్రబాబు హయాంలో వైసీపీ, కారణం లేకుండా అసెంబ్లీ సమావేశాల్ని బహిష్కరించేసినప్పుడు ఈ ‘హేయం’ అన్న ప్రస్తావన ఎందుకు రాలేదట.? అప్పట్లో వైసీపీకి చెప్పుకోదగ్గ సంఖ్యలో శాసనసభ్యులున్నారు. కానీ, వైఎస్ జగన్ పాదయాత్ర నేపథ్యంలో అసెంబ్లీ సమావేశాలకు మొత్తం వైసీపీ శాసనసభ్యులంతా డుమ్మా కొట్టేశారు. సరే, అది తప్పా.? ఒప్పా.? అన్నది వేరే చర్చ. నైతికత అయితే కాదు. ఇప్పుడు టీడీపీ విషయంలోనూ అంతే.

అయితే, టీడీపీకి అసెంబ్లీలో ప్రాతినిథ్యం తక్కువ వుండడం, అధికార పార్టీ సభ్యులు కేవలం వ్యక్తిగత ధూషణలకే ఎక్కువ సమయాన్ని వినియోగిస్తుండడం.. ఈ కారణాలతోనే, అసెంబ్లీ బడ్జెట్ సమావేశాల్ని బాయ్‌‌కాట్ చేస్తున్నామని టీడీపీ చెబుతోంది. టీడీపీ బాయ్‌‌కాట్ చేయడం వల్ల అధికార పార్టీకి వచ్చే నష్టం ఏమీ లేదు. సభను సజావుగా జరుపుకోవచ్చు. కానీ, టీడీపీ ఎందుకు బాయ్‌‌కాట్ చేస్తోంది.? అంటూ వైసీపీ నేతలు అమాయకంగా ప్రశ్నించడం ఏదైతే వుందో, అది అధికార పార్టీ అసహనాన్ని బయటపెట్టేస్తోంది.