అసలు సిసలు వెన్నుపోటు.. అప్పుడూ.. ఇప్పుడూ.!

ఉమ్మడి తెలుగు రాష్ట్రం రెండుగా విడిపోవడానికి కారణమెవరు.? మొట్టమొదటిగా విభజనకు అనుకూల నిర్ణయం తీసుకున్నది తెలుగుదేశం పార్టీ. తెలంగాణలో పర్యటిస్తున్న సందర్భంలో ‘మేమే తెలంగాణకు అనుకూలంగా మొట్టమొదట లేఖ ఇచ్చాం..’ అని చంద్రబాబు చెప్పుకున్నారు. కాంగ్రెస్‌ హయాంలో విభజన జరిగిందన్నది నిర్వివాదాంశం. ఆ విభజనకు బీజేపీ సహకరించిందన్నదాంటోనూ ఎవరికీ ఎలాంటి సందేహాల్లేవు. అలా, రాష్ట్ర విభజన విషయంలో రెండు నాల్కల ధోరణి ప్రదర్శించిన టీడీపీ, 2014 ఎన్నికల్లో, తెలంగాణలో దెబ్బతినేసినా.. ఆంధ్రప్రదేశ్‌లో అధికారంలోకి వచ్చింది.

ఇప్పుడు అమరావతికి వెన్నుపోటు పొడిచింది తెలుగుదేశం పార్టీ. ఐదేళ్ళు సరిపోలేదు టీడీపీ అధినేత నారా చంద్రబాబునాయుడికి, అమరావతిని నిర్మించడానికంటే.. అంతకన్నా హాస్యాస్పదం ఇంకేముంటుంది.? ఇక, ఇప్పుడు మూడు రాజధానుల ఎపిసోడ్‌ తెరపైకొచ్చింది. ‘మేం అమరావతికి కట్టుబడి వున్నాం..’ అని ఎన్నికల ప్రచారంలో వైఎస్సార్సీపీ అధినేత వైఎస్‌ జగన్‌ స్పష్టం చేశారు. కానీ, ఇప్పుడేం జరిగింది.? అమరావతి నుంచి ఎగ్జిక్యూటివ్‌ క్యాపిటల్‌నీ, జ్యుడీషియల్‌ క్యాపిటల్‌నీ తరలిస్తున్నారు. అమరావతి ఇకపై కేవలం శాసన రాజధాని మాత్రమే. అంటే, అక్కడ అసెంబ్లీ మాత్రమే వుంటుంది. అసెంబ్లీ అంటే, ఏడాదికి ఓ మూడు సార్లు.. అది కూడా ఇటీవలి కాలంలో ‘నామ్ కే వాస్తే’ అన్నట్టు తయారైంది. ఆ లెక్కన, సమీప భవిష్యత్తులో అమరావతి ఉనికి అనేది వుండకపోవచ్చు.

అసలు సిసలు వెన్నుపోటు అంటే ఇదే మరి.! ప్రత్యేక హోదా నినాదాన్ని అటు టీడీపీ, ఇటు వైసీపీ గాలి కొదిలేశాయి.. ఈ రెండూ ’60-40’ ఒప్పందాలతో అధికారం పంచుకుంటున్నాయన్న విమర్శలు లేకపోలేదు. ప్రత్యేక హోదా గురించి టీడీపీ అధికారంలో వున్నప్పుడు మాట్లాడలేదు.. వైసీపీ కూడా అధికారంలోకి వచ్చాక మాట్లాడటంలేదు. అధికారం లేనప్పుడు మాత్రం ఈ రెండు పార్టీలకీ ప్రత్యేక హోదా అవసరమైంది. ఇదొక్కటి చాలు.. టీడీపీ, వైసీపీ.. ఏ స్థాయిలో ‘వెన్నుపోటు’ రాజకీయాలు నడుపుతున్నాయో చెప్పడానికి. ఇదే, ఆంధ్రప్రదేశ్‌కి.. ఈ ‘వెన్నుపోటు రాజకీయమే’ పెను శాపంగా మారింది. ఐదేళ్ళలో ఒక్క రాజధానినే నిర్మించుకోలేకపోయిన ఆంధ్రప్రదేశ్‌, సమీప భవిష్యత్తులో మూడు రాజధానుల్ని నిర్మించుకునే పరిస్థితి వుంటుందా.? జనాన్ని మభ్యపెట్టడానికి కాకపోతే, ఈ మూడు రాజధానుల కాన్సెప్ట్‌లో ‘విజ్ఞత’ కాస్తంతైనా కన్పిస్తుందా.!

తాము ఏం చెప్పినా, జనం నమ్మి ఓట్లు వేస్తారనే నమ్మకం ఆయా పార్టీల్లో వున్నంత కాలం.. ఆ నమ్మకాలు నిజమవుతున్నంత కాలం.. ఆంధ్రప్రదేశ్‌ మళ్ళీ మళ్ళీ వెన్నుపోటుకి గురవుతూనే వుంటుంది. ఇందులో ఇంకో మాటకు తావు లేదు.