రివ్యూ : రక్తాంచల్ (వెబ్ సిరీస్)

నటీనటులు : నికితిన్ ధీర్, క్రాంతి ప్రకాష్ ఝా, సౌందర్య శర్మ, రోంజిని చక్రవర్తి, చిత్తరంజన్ త్రిపాఠి తదితరులు.
నిర్మాణం : ఎంఎక్స్ ప్లేయర్
దర్శకత్వం: రితమ్ శ్రీవాస్తవ్
నిడివి : 86 నిముషాలు
విడుదల తేది : మే 28, 2020
ఓటీటీ ప్లాట్ ఫాం : ఎంఎక్స్ ప్లేయర్

మీర్జాపూర్, సేక్రేడ్ గేమ్స్ సిరీస్ లు వచ్చిన తర్వాత బాలీవుడ్ లో ఉత్తరప్రదేశ్ లోని దేశీయ నేర వ్యవస్థలపై తెరకెక్కే వెబ్ సిరీస్ లు ఎక్కువయ్యాయి. ఆ కోవలోనే తాజాగా ‘రక్తాంచల్’ అనే వెబ్ సిరీస్ ఓటీటీ ప్లాట్ ఫాం ‘ఎంఎక్స్ ప్లేయర్’లో తెలుగు, హిందీ, తమిళ భాషల్లో విడుదలయింది. పేరులోనే రక్తం నింపుకున్న ఈ సిరీస్ ఎలా ఉందో చూద్దాం.

కథ :

80వ దశకంలో ఉత్తరప్రదేశ్ రాష్ట్రంలోని పూర్వాంచల్ ప్రాంతంలో జరిగిన టెండర్ మాఫియా నేపధ్యంలో తెరకెక్కిన ఈ సిరీస్ రాష్ట్ర ప్రభుత్వ టెండర్ అనౌన్స్ మెంట్ తో మొదలవుతుంది. ఎప్పట్లానే టెండర్ పూర్వాంచల్ ను గడగడలాడిస్తున్న వసీం ఖాన్ (నికితిన్ ధీర్)కు వెళుతుంది. హఠాత్తుగా విజయ్ సింగ్ (క్రాంతి ప్రకాష్ ఝా) అధికారులకు అడ్డుపడి బెదిరించి టెండరును తన వైపుకు తిప్పుకుంటాడు. అప్పటి నుండి వసీం, విజయ్ ల ఆధిపత్య పోరు మొదలవుతుంది. ఈ పోరులో ఎవరు గెలిచారనేది సిరీస్ చూసి తెలుసుకుంటేనే ఆ ‘కిక్’ ఉంటుంది.

తెర మీద స్టార్స్

చెన్నై ఎక్స్ ప్రెస్, జోధా అక్బర్, దబంగ్ 2 వంటి చిత్రాల్లో ప్రతినాయక పాత్రలు పోషించిన నికితిన్ వసీం ఖాన్ గా సరిగ్గా సరిపోయాడు. పాత్రలోకి పరకాయ ప్రవేశం చేసి మరీ నటించాడు. ఎంఎస్ ధోనీ వంటి చిత్రాల్లో సహాయక పాత్రల్లో నటించిన క్రాంతి ప్రకాష్ ఈ సిరీస్ లో విజయ్ సింగ్ గా కీలక పాత్ర పోషించి తానేమిటో నిరూపించుకున్నాడు. సౌందర్య శర్మ, రోంజిని చక్రవర్తి తమ తమ పాత్రలకు న్యాయం చేసారు.

తెర వెనుక

గతంలో ‘జై గంగాజల్’ తీసిన రితమ్ శ్రీవాస్తవ్ ఈ సిరీస్ తెరకెక్కించటంలో తనదైన ప్రతిభ కనపరిచాడు. ఎక్కువగా డార్క్ మోడ్ లోనే తీస్తున్డటం వల్ల కెమెరా పనితనం ఒకేలా అనిపిస్తూ ఉంటుంది. సంగీతం విషయానికి వస్తే అక్కడక్కడ వచ్చే పాటలు పర్లేదు అనిపించినా బ్యాక్ గ్రౌండ్ స్కోర్ యావరేజ్ అనిపిస్తుంది. కథకు తగినంత ఇంటెన్సిటీ కలిగించలేదనిపిస్తుంది.

విశ్లేషణ :

వాస్తవ సంఘటనల ఆధారంగా తెరకెక్కిన ఈ సిరీస్ సందేహం లేకుండా మనల్ని 80వ దశకంలోకి తీసుకెళుతుంది. మొదటి సీన్ లోనే వసీం ఖాన్ కు విజయ్ సింగ్ అడ్డు పడటంతోనే నేరుగా కథ మొదలయిపోతుంది. ఈ సిరీస్ 80వ దశకంలోని సినిమాల్లోని ముఠా కక్షలను ఆధిపత్య పోరుకై ఎంతకైనా తెగించే నాయకులను గుర్తు చేస్తుంది. కథలోని పాయింట్ థ్రిల్లింగ్ గా మొదలయినా రాను రాను కథాగమనం అక్కర్లేని దారుల్లో ప్రయాణం చేయటం వల్ల కొంత గతి తప్పినట్లుగా అనిపించినా మొత్తంగా చూస్తే మంచి మార్కులే సాధించింది. 80వ దశకంలో పూర్వాంచల్ నేపధ్యంలో కథను ఎంచుకోవటంలోనే సగం మార్కులు కొట్టేసిన మేకర్స్ కథనాన్ని పకడ్బందీగా నడిపించటం కోసం పడిన శ్రమ తెరపై తెలుస్తూ ఉంటుంది. ప్రతి పాత్రను నడిపిన విధానం బాగుంది. అయితే ఇటీవలి కాలంలో వచ్చే సిరీస్ లు దాదాపు ఉత్తర భారతంలోని దేశీయ మాఫియా నేపధ్యంలో తెరకెక్కుతున్నవే కావటంతో ఈ సిరీస్ పరుగు పందెంలో వెనక పడే అవకాశం లేకపోలేదు.

పంచ్ లైన్ : ఆధిపత్య దాహానికి నెత్తుటి ధారలే సాక్ష్యం

తెలుగు బులెటిన్ రేటింగ్ : 2.5/5

సూర్య ప్రకాష్ వేద