వైసీపీ నేతలతో సుజనా మంతనాల వెనుక ‘మతలబు’ ఏంటి.!

టీడీపీ నుంచి రాజ్యసభకు ఎన్నికైన సుజనా చౌదరి, ప్రస్తుతం బీజేపీలో వున్నారు. సుజనా చౌదరిని తీసుకొచ్చే క్రమంలో ఆయనకు కీలకమైన ‘బాధ్యతల్ని’ బీజేపీ పెద్దలు అప్పగించారంటూ అప్పట్లో ప్రచారం జరిగింది. ‘టీడీపీని దెబ్బకొట్టాల్సిన పనిలేదు.. ఎందుకంటే, ఆ పార్టీ పనైపోయింది. వైసీపీ విషయంలోనే స్పెషల్‌ ఫోకస్‌ పెట్టాలి..’ అంటూ బీజేపీ పెద్దలు సుజనాకి అప్పట్లో ‘అస్సైన్‌మెంట్‌’ ఖరారు చేశారంటూ రాజకీయ వర్గాల్లో ఇప్పటికీ ఆసక్తికరమైన చర్చ జరుగుతుంటుంది. మరి, సుజనా ఆ బాధ్యతల్ని సమర్థవంతంగా నిర్వహించేస్తున్నారా.? పార్క్‌ హయాత్‌ హోటల్‌లో అసలేం జరిగింది.? ఇప్పుడు ఈ అంశం చుట్టూ రాజకీయ వర్గాల్లో రకరకాల గుసగుసలు విన్పిస్తున్నాయి.

వైసీపీ లీక్‌ చేసిన ఓ వీడియోలో మాజీ మంత్రి కామినేని శ్రీనివాస్‌, రాష్ట్ర ఎన్నికల కమిషనర్‌గా పనిచేసిన నిమ్మగడ్డ రమేష్‌కుమార్‌, పార్క్‌ హయాత్‌ హోటల్‌లో సుజనా చౌదరితో భేటీ అయినట్లు కన్పిస్తోంది. అయితే, ఇక్కడ బయటకు రావాల్సిన ‘కథ’ చాలానే వుందంటున్నారు. వైసీపీ చెందిన 30 మందికి పైగా ప్రజా ప్రతినిథులు పార్క్‌ హయాత్‌ హోటల్‌లోనే సుజనా చౌదరితో భేటీ అయ్యారన్నది ఆ రోజే తెరపైకొచ్చిన ఓ సంచలన గాసిప్‌. ‘అబ్బే, అలాంటిదేమీ లేదు..’ అని కొందరు వైసీపీ నేతలు ఆ గుసగుసల్ని కొట్టి పారేసినా.. తాజాగా ఆ గాసిప్స్‌ మరింత జోరందుకుంటున్నాయి. ‘పలువురు ఎంపీలు, పలువురు ఎమ్మెల్యేలు సుజనా చౌదరితో టచ్‌లోకి వెళ్ళారు. పార్టీ అధిష్టానం ఆదేశాలతో సుజనా చౌదరి పెద్ద ఆపరేషన్‌కి శ్రీకారం చుట్టారు..’ అన్నది రాజకీయ వర్గాల్లో హల్‌చల్‌ చేస్తున్న హాటెస్ట్‌ గాసిప్‌. కాగా, వైసీపీ ఎంపీ విజయసాయిరెడ్డి, ‘పార్క్‌ హయాత్‌ హోటల్‌కి సంబంధించి మరిన్ని వివరాలు అతి త్వరలో..’ అని ఆ మధ్య ట్వీటేశారుగానీ, ఆ తర్వాత ఆ విషయాన్ని లైట్‌ తీసుకున్నారు.

‘వీడియో ఫుటేజ్‌లో వైసీపీ నేతల బాగోతం బయటపడింది.. అందుకే వైఎస్సార్సీపీ ఇప్పుడు కుక్కిన పేనులా వుండిపోయింది..’ అంటూ టీడీపీ అనుకూల మీడియాలో కథనాలు గుప్పుమంటున్నాయి. ఈ టీడీపీ అనుకూల మీడియాకి ఎంతో కొంత దన్ను బీజేపీ రూపంలో కూడా వుండడంతో, పార్క్‌ హయాత్‌ హోటల్‌లో నడిచిన, నడుస్తున్న రాజకీయంపై ఉత్కంఠ రోజు రోజుకీ పెరిగిపోతోంది. ఇదే సమయంలో బీజేపీ జాతీయ స్థాయి నేతలు, రాష్ట్రంలో వైఎస్‌ జగన్‌ సర్కార్‌పై విమర్శల దాడి షురూ చేయడంతో.. ఏదో జరుగుతోందన్న అనుమానాలైతే మరింత బలపడుతున్నాయి.