అమరావతిలో బొత్స టూర్‌ వెనుక ‘రియల్‌’ యాంగిల్‌.?

రాజధానిని అమరావతి నుంచి విశాఖపట్నంకి తరలించేందుకు వైఎస్‌ జగన్‌ ప్రభుత్వం రకరకాల ప్రయత్నాలు చేస్తోన్న విషయం విదితమే. రాష్ట్రం వున్న క్లిష్ట పరిస్థితుల్లో ఒక్క రాజధానిని అభివృద్ధి చేసుకోవడమే కుదరట్లేదు. అలాంటిది, ఏకంగా మూడు రాజధానులంటూ.. ‘ప్రాజెక్ట్‌ అమరావతి’ని వైఎస్‌ జగన్‌ సర్కార్‌ అటకెక్కించింది. గడచిన ఏడాది కాలంలో అమరావతిలో ఒక్క నిర్మాణమూ జరగకపోవడమే ఇందుకు నిదర్శనం.

ఇదిలా వుంటే, ఇటీవలే మంత్రి బొత్స సత్యనారాయణ అమరావతిలో పర్యటించారు.. చంద్రబాబు హయాంలో నిర్మితమైన పలు అధికారిక భవనాల్ని ఆయన పరిశీలించారు. అంతకు ముందు ఆయనే, అమరావతిని స్మశానంతో పోల్చారు.. అమరావతిని ముంపు ప్రాంతంగా అభివర్ణించారు. ఈ నేపథ్యంలో బొత్స, అమరావతిలో పర్యటించడంపై పలు అనుమానాలు వ్యక్తమయ్యాయి.

‘అమరావతిపై వైఎస్‌ జగన్‌ ప్రభుత్వం సరికొత్త కుట్రకు తెరలేపింది’ అంటూ టీడీపీ ఆరోపిస్తోన్న విషయం విదితమే. ఇక, తాజాగా రాజకీయ వర్గాల్లో మరింత ఆసక్తికరమైన గాసిప్స్‌ అమరావతికి సంబంధించి సర్క్యులేట్‌ అవుతున్నాయి. ‘అమరావతిలో నిర్మితమైన భవనాల్ని విక్రయించేందుకోసం ప్రభుత్వం ప్రయత్నిస్తోంది. వాస్తవ ధర కంటే కాస్త తక్కువ ధరకు ఆయా భవనాల్ని విక్రయిస్తే ప్రభుత్వానికి మూడు వేల కోట్లకు పైగా ఆదాయం వచ్చే అవకాశముంది.. ఈ నేపథ్యంలోనే ప్రభుత్వం, అమరావతిపై కొత్త ప్రేమ ప్రదర్శిస్తోంది..’ అంటూ టీడీపీ నేతలు ఆరోపిస్తున్నారు.. అందుకే తగ్గట్టే టీడీపీ అనుకూల మీడియాలోనూ కథనాలొస్తున్నాయి.

సోషల్‌ మీడియా వేదికగా అమరావతిపై ఈ అంశం చుట్టూ కుప్పలు తెప్పలుగా పోస్టింగ్స్‌ దర్శనమిస్తున్నాయి. ‘సేవ్‌ అమరావతి’ అంటూ ఆయా అంశాల్ని నెటిజన్లు ప్రస్తావిస్తుండడం గమనార్హం. ఇంతకీ, అమరావతిపై ప్రభుత్వం ఆలోచన ఏంటి.? ‘శాసన రాజధాని మాత్రమే కాదు, అమరావతి మరింత అభివృద్ధి చెందుతుంది.. విశాఖకు ఎగ్జిక్యూటివ్‌ క్యాపిటల్‌ వెళ్ళడం ఒకింత ఆలస్యమయ్యేలా వుంది..’ అంటూ వైసీపీ వర్గాల నుంచి వస్తోన్న ప్రచారంలో నిజమెంత.?

అమరావతిపై కొత్త కుట్ర.. అంటూ టీడీపీ చేస్తోన్న ఆరోపణల్లో నిజమెంత.? ఏమోగానీ, రాజధానిని అమరావతిని తరలించొద్దంటూ రాజధాని కోసం భూములిచ్చిన రైతులు మాత్రం తమ ఉద్యమాన్ని యధాతథంగా కొనసాగిస్తూనే వున్నారు.