మళ్ళీ తెరపైకి గ్రేటర్‌ రాయలసీమ రగడ.!

‘మా డిమాండ్ల పట్ల సానుకూలంగా స్పందించండి.. లేదంటే, మా రాష్ట్రం మాకు ఇచ్చెయ్యండి..’ అంటున్నారు మాజీ మంత్రి మైసూరారెడ్డి. గ్రేటర్‌ రాయలసీమలోనే రాజధాని వుండాలన్నది మైసూరారెడ్డి డిమాండ్‌. మైసూరారెడ్డితోపాటు పలువురు రాజకీయ ప్రముఖులు, మాజీ ఐపీఎస్‌ అధికారులూ గ్రేటర్‌ రాయలసీమ విషయమై ముఖ్యమంత్రి వైఎస్‌ జగన్‌ మోహన్‌రెడ్డికి లేఖాస్త్రం సంధించారు.

ఆంధ్రరాష్ట్రం, అప్పటి హైద్రాబాద్‌ రాష్ట్రంతో (తెలంగాణ ప్రాంతం) కలిసినప్పుడు అప్పటికే రాజధానిగా వున్న కర్నూలుని త్యాగం చేసిన ఘన చరిత్ర రాయలసీమ ప్రాంతానిదనీ, ఇంకోసారి రాయలసీమ నష్టపోవాలని సీమవాసులెవరూ కోరుకోవడంలేదని మైసూరారెడ్డి చెబుతున్నారు.

రాష్ట్రంలో మూడు రాజధానుల వ్యవహారంపై ముఖ్యమంత్రి వైఎస్‌ జగన్‌, అసెంబ్లీలో వ్యాఖ్యానించిన తర్వాత ప్రాంతాల మధ్య విభేదాలు తెరపైకొచ్చిన విషయం విదితమే. ఉత్తరాంధ్ర వైసీపీ నేతలు, అమరావతిపై అవాకులు చెవాకులు పేలుతున్నారు. తాజాగా, ఇప్పుడు రాయలసీమ వాసులు గ్రేటర్‌ రాయలసీమ నినాదాన్ని తెరపైకి తెస్తున్నారు.

ఉమ్మడి ఆంధ్రప్రదేశ్‌ విడిపోయి.. పాత పేరుతో కొత్తగా ఏర్పడ్డ 13 జిల్లాల ఆంధ్రప్రదేశ్‌ ఇంకోసారి విభజన సమస్యను ఎదుర్కోబోతోందా.? వైఎస్‌ జగన్‌ మోహన్‌రెడ్డి నాటిన ఈ విభజన బీజం, ముందు ముందు ఎలాంటి పరిణామాలకు దారి తీస్తుంది.? కర్నూలులో హైకోర్టు, కర్నూలుని జ్యుడీషియల్‌ క్యాపిటల్‌గా చేస్తామన్న జగన్‌ ప్రకటనని రాయలసీమ నేతలు స్వాగతిస్తూనే, రాజధాని కోసం డిమాండ్‌ చేయడాన్ని ఎలా అర్థం చేసుకోవాలి.?

ప్రతిపక్ష నేత, ముఖ్యమంత్రి సీమ ప్రాంతానికి చెందినవారు కావడంతో గ్రేటర్‌ రాయలసీమ వైపు మొగ్గు కన్పిస్తుందా.? మిగతా రాష్ట్రం పరిస్థితేంటి.? ఏమో, రానున్న రోజుల్లో రాష్ట్రం ఏమవుతుందోగానీ.. ఈ విభజన సెగలు, రాష్ట్రానికి అస్సలేమాత్రం మంచివి కావన్నది నిర్వివాదాంశం.