రవిశంకర్ ఉవాచ: సినిమాలాడితే సమస్యలు లేనట్టేనట!

‘‘ఈనెల 2న విడుదలైన మూడు సినిమాలు భారీ హిట్ కొట్టాయి. ఒక్కరోజే ఏకంగా రూ.120 కోట్లు వసూలు చేశాయి. ఇక దేశంలో ఆర్థికమాంద్యం ఎక్కుడుంది? నిరుద్యోగం ఎక్కడుంది? అవన్నీ గిట్టనివారు చేస్తున్న ప్రచారాలు మాత్రమే’’ – ఇవీ కేంద్ర ఐటీ శాఖ మంత్రి రవిశంకర్ ప్రసాద్ చేసిన వ్యాఖ్యలు. సినిమాలు ఆడితే సమస్యలు ఏమున్నాయంటూ ఆయన ప్రశ్నించడం గమనార్హం. దేశంలో నిరుద్యోగం పెరిగిపోయిందంటూ వస్తున్న వార్తల్లో ఎంతమాత్రం నిజం లేదని ఆయన స్పష్టంచేశారు. శనివారం ముంబైలో ఆయన విలేకరులతో మాట్లాడుతూ ఈ వ్యాఖ్యలు చేశారు.

ప్రపంచవ్యాప్తంగా మాంద్యం ప్రభావం ఉన్నప్పటికీ, మన ఆర్థిక వ్యవస్థ పటిష్టంగానే ఉందని.. పలు అంశాల్లో ముందుకే దూసుకెళ్తున్నామని తేల్చేశారు. ‘‘అక్టోబర్ 2న గాంధీజయంతి సెలవు రోజు. ఆ రోజున వార్, జోకర్, సైరా అనే మూడు సినిమాలు విడుదలయ్యాయి. అవన్నీ బ్లాక్ బస్టర్ హిట్ కోట్టి ఒక్కరోజులోనే రూ.120 కోట్లు వసూలు చేశాయట. దీన్నిబట్టి చూస్తే దేశంలో మాంధ్యం ప్రభావం లేనట్టేగా’’ అంటూ ఆయన ప్రశ్నించారు. తమ పాలనలో అంతా బాగానే ఉందని చెప్పడం వరకు ఓకే కానీ, సినిమాలతో వాటిని ముడిపెట్టి చెప్పడం ఏమిటంటూ సోషల్ మీడియాలో మంత్రిని ఏకేస్తున్నారు.

దేశంలో నిరుద్యోగం ప్రబలుతోందంటూ తాజాగా వచ్చిన నివేదికను మంత్రి తోసిపుచ్చారు. కొంతమంది వ్యక్తులు దేశాన్ని, ప్రజలను తప్పుదోవ పట్టించడానికి ప్రయత్నాలు చేస్తున్నారని ఆరోపించారు. వాస్తవానికి ప్రస్తుతం దేశ ఆర్థిక పరిస్థితి ఏమీ బాగోలేదు. ఆటోమొబైల్ రంగం సంక్షోభంలో కొట్టుమిట్టాడుతుండగా.. మాంద్యం ప్రతి రంగంపైనా ప్రభావం చూపిస్తోంది. అయినప్పటికీ కేంద్ర మంత్రివర్యులు మాత్రం అంతా బాగానే ఉందని చెప్పడంపై విమర్శలు వ్యక్తమవుతున్నాయి. పైగా సినిమాలకు, వాటికి ముడిపెట్టడం ఏమిటని ప్రశ్నలు గుప్పిస్తున్నారు. రవిశంకర్ వ్యవహారంపై సోషల్ మీడియాలో జోకులు వెల్లువెత్తుతున్నాయి.