రఘురామ కొత్త ‘అస్త్రం’: వైసీపీని సరికొత్తగా ఇరకాటంలో పడేశారే.!

‘మాట మార్చం.. మడమ తిప్పం..’ అని చెబుతుంటాం కదా.. యువజన శ్రామిక రైతు కాంగ్రెస్‌ పార్టీ, రాజధాని విషయంలో గతంలో ఏం నిర్ణయం తీసుకున్నాం.. ఇప్పుడు ఏం మాట్లాడుతున్నాం.? అని ప్రశ్నిస్తూ సొంతపార్టీపైనా తనదైన స్టయిల్లో విమర్శనాస్త్రాలు ఎక్కుపెట్టారు నర్సాపురం వైసీపీ ఎంపీ రఘురామకృష్ణరాజు.

‘అప్పుడు అమరావతికి కట్టుబడి వున్నామని చెప్పాం. అందుకే, అమరావతి పరిధిలోనే వైఎస్‌ జగన్‌ ఇల్లు కట్టుకున్నారని కూడా చెప్పాం. అప్పటి ముఖ్యమంత్రి కనీసం రాజధానిలో ఇల్లు కట్టుకోలేకపోయారని ఎగతాళి చేశాం. ఇప్పుడు మనం ఏం చేస్తున్నాం.?’ అని ప్రశ్నించారు రఘురామకృష్ణరాజు.

తాజాగా రఘురామకృష్ణరాజు, రాష్ట్రపతి రామ్ నాథ్‌ కోవింద్‌తో భేటీ అయ్యారు. ఈ భేటీ సందర్భంగా అమరావతిలోనే రాజధాని వుంచేలా చూడాలని కోరారు. ఆంధ్రప్రదేశ్‌ పునర్‌ వ్యవస్థీకరణ చట్టంలో ఒక్క రాజధాని ప్రస్తావన మాత్రమే వుందన్న విషయాన్ని రాష్ట్రపతి దృష్టికి తీసుకెళ్ళారు. మరోపక్క, ఆంధ్రప్రదేశ్‌లో తనకు రక్షణ లేకుండా పోయిన విషయాన్నీ రాష్ట్రపతి వద్ద ప్రస్తావించారు నర్సాపురం ఎంపీ. ‘నా సమస్యల్ని రాష్ట్రపతి దృష్టికి తీసుకెళ్ళాను. నాకు ఆయన నుంచి సాంత్వన లభించినట్లయ్యింది. నా సమస్యల్ని ఆయన దగ్గర విన్నవించుకోగా, అన్ని సమస్యల్నీ ఆయన అర్థం చేసుకున్నారు..’ అని చెప్పారు రఘురామకృష్ణరాజు.

అమరావతి కోసం భూములిచ్చినవారిలో కమ్మ సామాజిక వర్గం వారికంటే, రెడ్డి సామాజిక వర్గానికి చెందినవారే ఎక్కువగా వున్నారనీ, ఆ రెడ్డి సామాజిక వర్గానికి చెందినవారికంటే దళితులు ఇంకా ఎక్కువమంది వున్నారని, వారంతా ఇప్పుడు ఆందోళన చెందుతుండడం ప్రభుత్వానికి మంచిది కాదనీ చెప్పిన రఘురామకృష్ణరాజు, ఇప్పటికైనా రాజధాని విషయంలో ‘మూడు రాజధానుల’ ఆలోచన మానుకోవాలని రాష్ట్ర ప్రభుత్వానికి సూచించారు.

‘పార్టీ అధినేత, ఆంధ్రప్రదేశ్‌ ముఖ్యమంత్రి మీద నాకు అపారమైన ప్రేమాభిమానాలు వున్నాయి..’ అంటూ మరోమారు రఘురామ తనదైన స్టయిల్లో వ్యాఖ్యానించడం గమనార్హం. ఇదిలా వుంటే, ‘ఒకవేళ మూడు రాజధానులు చేయాలనే ఆలోచనకే మీరు కట్టుబడి వుంటే, ఆ ఎగ్జిక్యూటివ్‌ క్యాపిటల్‌ని అమరావతికి పరిమితం చేయాలి..’ అని రఘురామ సూచించడం గమనార్హం. శాసన సభ, శాసన మండలిలో మూడు రాజధానుల బిల్లు నేపథ్యంలో జరిగిన పరిణామాల్నీ రాష్ట్రపతి రామ్ నాథ్‌ కోవింద్‌కి ఇచ్చిన లేఖలో రఘురామకృష్ణరాజు ప్రస్తావించారు.