రిషికొండ ఔర్ చాలీస్ చోర్.! సముద్రం పోటెత్తితే పరిస్థితేంటి.?

విశాఖపట్నం ప్రకృతి అందాలకు నెలవు. ఒకప్పుడు విశాఖ అనగానే, ఎర్రమట్టి దిబ్బలు గుర్తుకొచ్చేవి. చాలా సినిమాల షూటింగులు ఆ ప్రాంతంలో జరిగాయి. ఇప్పుడు ఆ ఎర్రమట్టి దిబ్బల ఆచూకీ ఎక్కడా కనిపించడంలేదు. అడ్డంగా దోచేశారు ఆ ఎర్రమట్టి దిబ్బలి రాజకీయ నాయకులు. ఇంతకీ, రిషికొండ పరిస్థితేంటి.? వైసీపీ సర్కారు, ఈ రిషి కొండ మీద పెద్ద రిసార్టు కడుతోందిట. దీన్నే ముఖ్యమంత్రి కార్యాలయంగా వినియోగిస్తారనే ప్రచారం జరుగతోంది. పర్యావరణం కోణంలో చూస్తే, ఇది అత్యంత ప్రమాదకరమైన వ్యవహారం అన్నది నిపుణుల వాదన. సముద్రానికి ఆనుకుని వుంటుంది రిషికొండ. కొండ పైనుంచి చూస్తే, ప్రకృతి కడు రమణీయంగా వుంటుంది.

ఇక్కడ గతంలోనే ఓ రిసార్టు వుండేది. దాన్ని పూర్తిగా పడగొట్టి, కొత్త నిర్మాణాలు చేపడుతున్నారు.. చాలా ఎక్కువ ప్రాంతం ఇందుకోసం వినియోగిస్తున్నారు. ఇదంతా నాణానికి ఓ వైపు మాత్రమే. ఇంకో వైపు, రిషికొండ కాస్తా బోడిగుండు అయిపోతోంది. రిషికొండ అంటే ఒకప్పుడు పచ్చగా కనిపించేది. కానీ, ఇప్పుడది గుండు కొట్టేయబడుతోంది. కొండని పిండి చేసి పారేస్తున్నారు. ముందు ముందు ఇక్కడ రిషికొండ అనే ఓ కొండ వుండేదని విశాఖ వాసులు చెప్పుకోవాల్సి వస్తుందేమో.! ‘కొండచరియలు విరిగి పడటం’ అనే మాట తరచూ వింటుంటాం. కొండని తవ్వుకుంటూ పోతే, ముందు ముందు జరిగేది అదే. కొన్నాళ్ళకు కొండ ప్రాంతం పూర్తిగా మాయమైపోతే, ఆ తర్వాత సముద్రం, విశాఖను ముంచెత్తేయడం పెద్ద విషయమేమీ కాదు.

సరే, టీడీపీ – వైసీపీ మధ్య రాజకీయంగా ఆరోపణలు ప్రత్యారోపణలు జరగడం అనేది వేరే చర్చ. రాజకీయ పార్టీలు రాజకీయమే చేస్తాయ్. కానీ, విశాఖలో చాలా భూ భాగానికి రిషికొండ సముద్రం నుంచి రక్షణ కల్పిస్తోంది. ఆ రక్షణకొండ లేకపోతే.? అసలెందుకిదంతా జరుగుతోంది.? ‘రిషికొండ ఔర్ చాలీస్ చోర్’ అంటూ జనసేన పార్టీ ఓ కార్టూన్ విడుదల చేయడాన్ని ఇక్కడ ప్రస్తావించుకోవాలి. కొండని దొంగిలిస్తే, సముద్రం దూసుకొచ్చేయకుండా వుంటుందా.? అన్నట్టుంది ఆ కార్టూన్.