మహిళా దినోత్సవాన.. అమరావతి మహిళా రైతులపై దాష్టీకం.!

కూకట్‌పల్లి ఆంటీలంటూ ఎగతాళి చేశారు.. రైతుల ముసుగులో ఖరీదైన చీరలు కట్టుకుని ఫ్యాషన్ షో చేస్తున్నారంటూ వెటకారం చేశారు.. ఎన్ని చేసినా, రాజధాని అమరావతి కోసం భూములిచ్చిన మహిళా రైతుల పోరాటంలో ఉధృతి తగ్గడంలేదు. ఓ దశలో అమరావతి మహిళా రైతులపై లాటీలు తమ ప్రతాపం చూపించాయి.. రక్తం చిందించారుగానీ, ఉద్యమం నుంచి వెనక్కి తగ్గే ప్రసక్తే లేదని అమరావతి మహిళా రైతులు స్పష్టం చేశారు.

‘రాష్ట్ర రాజధాని అమరావతి కోసం భూములిచ్చాం.. అప్పటి ప్రతిపక్ష నేత వైఎస్ జగన్ కూడా ఒప్పుకున్నాకే, అప్పటి చంద్రబాబు ప్రభుత్వానికి భూములు ఇచ్చాం. మాకు న్యాయం కావాలి..’ అంటూ అమరావతి రైతులు నినదిస్తూనే వున్నారు.

తాజాగా, అంతర్జాతీయ మహిళా దినోత్సవం నేపథ్యంలో అమరావతి మహిళా రైతులు మరోమారు కదం తొక్కారు. అమరావతి కోసం దేవుళ్ళను వేడుకొనేందుకు.. కొందరు దుర్గమ్మ దర్శనం కోసం.. కొందరు చర్చిలకు వెళ్ళేందుకు.. పయనమయ్యారు. ఈ క్రమంలో పోలీసులు వారిని అడ్డుకున్నారు. పోలీసుల దాష్టీకాన్ని అమరావతి మహిళా రైతులు తీవ్రంగా తప్పు పట్టారు. ఈ క్రమంలో ఉద్రిక్త పరిస్థితులు చోటు చేసుకున్నాయి.

ఓ వైపు, అంతర్జాతీయ మహిళా దినోత్సవం నేపథ్యంలో మహిళలు స్మార్ట్ ఫోన్లు కొనుగోలు చేస్తే డిస్కౌంట్లు ఇస్తామని ప్రకటించిన ప్రభుత్వం, రైతుల మీద పోలీసులు దాడి చేస్తోంటే ఏం చేస్తున్నట్లు.? విశాఖ ఉక్కు కోసం వైసీపీ నేతల ఆధ్వర్యంలో ర్యాలీలు జరగొచ్చు.. అధికార పక్షం – ప్రతిపక్షం మాటల యుద్ధం నేపథ్యంలో దేవుళ్ళ మీద ప్రమాణాలంటూ హంగామా చేయొచ్చు.. కానీ, అమరావతి మహిళా రైతులు.. తమ హక్కుల కోసం పోరాడితే, న్యాయం కోసం రోడ్డెక్కితే.. వారి ఆందోళనల్ని ఉక్కుపాదంతో అణచివేయాలని ప్రభుత్వం చూడటాన్ని ఎలా అర్థం చేసుకోవాలి.?

అమరావతిలో కుంభకోణం జరిగితే, ఆ కుంభకోణానికి పాల్పడినవారిపై చర్యలు తీసుకోవాలి. అంతే తప్ప, అమరావతి మీద కక్ష సాధింపు చర్యలకు దిగితే ఎలా.? మూడు రాజధానులన్నారు.. ఆ ప్రక్రియ మూడడుగులు కూడా ముందుకు కదల్లేదు. ఎందుకీ మొండితనం.? ఎవరికోసమీ పొలిటికల్ డ్రామా.? అధికార పార్టీ సమాధానం చెప్పాల్సిందే.