జనసేనాని తీవ్ర హెచ్చరిక: దెబ్బ తిన్న పులి.. పంజా విసరబోతోంది.!

‘దెబ్బతిన్నాం.. కానీ, నిలబడ్డాం. సత్తా చూపిస్తాం. దెబ్బ తిన్న పులి విసిరే పంజా దెబ్బ ఎలా వుంటుందో తెలుసా.? అది చూపించబోతున్నాం. జనసేన అధికారంలోకి వస్తే, అవినీతికి పాల్పడినవారెవర్నీ వదిలే ప్రసక్తే లేదు..’ అంటూ జనసేన అధినేత పవన్ కళ్యాణ్ ఆసక్తికరమైన వ్యాఖ్యలు చేశారు.

ఉత్తరాంధ్ర పర్యటనలో భాగంగా, విజయనగరం జిల్లా గుంకాలం వెళ్ళారు జనసేనాని. వైఎస్ జగన్ సర్కారు, బోల్డంత హంగామా చేసి ప్రారంభించిన పేదలకి గృహాల సముదాయం పనుల పురోగతి గురించి అక్కడివారిని అడిగి తెలుసుకున్నారు.

అంతకు ముందు విశాఖ నుంచి విజయనగరం బయల్దేరిన జనసేనాని వెంట వేలాది మంది జనసేన కార్యకర్తలు, అభిమానులే కాదు, సామాన్య ప్రజానీకం కూడా తరలి వెళ్ళారు. దారిపొడవునా జనసేన అధినేత మీద పూల వర్షం కురిసింది. మార్గమధ్యంలో జనసేనానితో పేదలు తమ సమస్యల్ని చెప్పుకున్నారు. వైసీపీ హయాంలో తాము పడుతున్న కష్టాల గురించి జనసేనానికి వివరించారు.

కాగా, వైసీపీ ప్రభుత్వాన్ని కిందికి ఈడుస్తామని జనసేన అధినేత స్పష్టం చేశారు. జనసేన ప్రభుత్వాన్ని స్థాపించడం ఖాయమని నినదించారు. వృద్ధులకు సంక్షేమ పథకాల విషయంలో జనసేన పెద్ద మనసుతో వ్యవహరిస్తుందనీ, పేదలకు అందాల్సిన సంక్షేమ పథకాల విషయంలో జనసేన రాజీ పడబోదని కూడా జనసేనాని భరోసా ఇచ్చారు.

‘మీ కోసం ఏ పదవీ లేకుండానే కోట్లు ఖర్చు చేస్తున్నాను. అలాంటిది, అధికారంలోకి వస్తే ప్రభుత్వ ఖజానాని ఎంత బాధ్యతాయుతంగా ఉపయోగిస్తానో మీరు ఊహించుకోవచ్చు. జనసేనకు ఒక్క అవకాశమిచ్చి చూడండి అవినీతి రహిత పాలన ఎలా వుంటుందో చూపిస్తాను..’ అని జనసేన అధినేత వ్యాఖ్యానించారు.

కాగా, కార్యకర్తలెవరూ వైసీపీ హయాంలో జరుగుతున్న అక్రమ అరెస్టులపై ఆందోళన చెందాల్సిన పనిలేదనీ, ఈ సమూహాన్ని అరెస్టు చేసే శక్తి ప్రభుత్వానికి వుండదనీ, కార్యకర్తలతోపాటు జైలుకు వెళ్ళడానికి తానూ సిద్ధమేనని జనసేనాని ప్రకటించడం గమనార్హం.