నిమ్మగడ్డ వ్యవహారంలో ట్విస్ట్.. ఒకటి కాదు రెండు లేఖలు?

ఆంధ్రప్రదేశ్ రాష్ట్ర ఎన్నికల కమిషనర్ నిమ్మగడ్డ రమేశ్ కుమార్ లేఖ వ్యవహారం కొత్త మలుపు తిరిగింది. ఆయన కేంద్ర హోంశాఖకు లేఖ రాయడం నిజమేనంటూ కేంద్ర హోంశాఖ సహాయ మంత్రి కిషన్ రెడ్డి స్పష్టంచేసిన సంగతి తెలిసిందే. అంటే ఎస్ఈసీ నుంచి హోంశాఖకు లేఖ వెళ్లడం నూటికి నూరు శాతం నిజం. అలాగే మీడియాలో సర్క్యులేట్ అయిన లేఖ తాను రాసింది కాదంటూ ఎస్ఈసీ రమేశ్ కుమార్ చెప్పినట్టుగా ఏఎన్ఐ వార్తాసంస్థ పేర్కొంది. అది కూడా నిజమే. అదెలా సాధ్యం అంటారా? ఇక్కడే ఉంది అసలు ట్విస్ట్. అది ఇప్పుడిప్పుడే బయట పడుతోంది.

స్థానిక సంస్థల ఎన్నికలు వాయిదా పడగానే సీఎం జగన్ నుంచి మంత్రులు, స్పీకర్, ఎమ్మెల్యేలు వరుసగా రమేశ్ పై విరుచుకుపడ్డారు. దీంతో ఆయన తనకు ప్రాణహాని ఉందని, కేంద్రం భద్రత కల్పించాలని కోరుతూ కేంద్ర హోంశాఖకు లేఖ రాశారు. సరిగ్గా ఇక్కడే అధికార పార్టీ వ్యతిరేకులు రంగంలోకి దిగారు. నిమ్మగడ్డ రాసిన లేఖ ఇదేనంటూ మీడియా ప్రతినిధులకు దాని ప్రతులు పంపించారు. దీనిని పంపించడానికి ముందు ఓ కీలక నేత ఆయా మీడియా సంస్థల ప్రతినిధులతో మాట్లాడినట్టు సమాచారం.

ఈ లేఖను బాగా హైలైట్ చేయాలని సదరు నేత సూచించినట్టు తెలుస్తోంది. వాస్తవానికి ఎస్ఈసీ రాసిన లేఖలో తనకు భద్రత కల్పించాలని మాత్రమే ఉండే అవకాశం ఉంది. కానీ మీడియాకు వచ్చిన లేఖలో సీఎం జగన్ తో సహా అధికార పార్టీపై తీవ్ర ఆరోపణలు ఉన్నాయ. ఆ లేఖ చూసినవారికి ఎవరికైనా ఓ సీనియర్ బ్యూరోక్రాట్ అలా రాయడమేంటి అనే సందేహం రాక మానదు. అందులో ఉపయోగించిన భాష దగ్గర నుంచి చివరకు లేఖ నెంబరు, ఎస్ఈసీ సంతకంలో కూడా తేడాలున్నాయి.

అయితే, ఈ వ్యవహారం ఎస్ఈసీకి తెలుసా లేదా అనేది ప్రస్తుతం సందిగ్ధంగా మారింది. లేఖ ఒక సెక్షన్ మీడియాలో బాగా హైలైట్ అయింది. మరుసటి రోజు పత్రికల్లో కూడా పతాక శీర్షికలో వచ్చింది. కానీ ఈ లేఖ రాసింది తానేనని ఎస్ఈసీ ఎక్కడా ధ్రువీకరించలేదు. దీనిపై మీడియా ప్రతినిధులు ప్రశ్నించినా ఆయన స్పందించలేదు. మరుసటి రోజు మీడియాలో సర్క్యులేట్ అవుతున్న లేఖ తాను రాసింది కాదని మాత్రమే చెప్పినట్టు వార్తలొచ్చాయి. అంటే ఆయన భద్రత కోరడం వాస్తవమే.

కానీ మీడియాకు విడుదల అయిన లేఖ మాత్రం ఫేక్. ప్రజల్ని తప్పుదోవ పట్టించడానికే ఈ దారుణ దురాగతానికి తెరతీసినట్టు తెలుస్తోంది. కేంద్ర హోంశాఖకు రాసిన లేఖ బయటకు వస్తే అసలు విషయం క్లియర్ గా తెలుస్తుంది. ప్రస్తుతం జగన్ సర్కారు అదే పనిలో ఉన్నట్టు సమాచారం. మీడియాకు వచ్చిన లేఖ ఫేక్ అని ఆధారాలతో సహా తేలితే సంబంధిత వ్యక్తులకు కష్టాలు తప్పకపోవచ్చనే అభిప్రాయం అధికార పార్టీ వర్గాల్లో వ్యక్తమవుతోంది.