24 గంటల జనతా కర్‌ఫ్యూ: కేసీఆర్‌ అందుకే గ్రేట్‌.!

తెలంగాణ ఉద్యమంలో ప్రతి ఒక్కర్నీ కలుపుకుపోయారు తెలంగాణ రాష్ట్ర సమితి అధినేత కల్వకుంట్ల చంద్రశేఖర్‌రావు. చంటి పిల్లాడి నుంచి ముదుసలివరకూ తెలంగాణ ఉద్యమంలో పాల్గొన్నారంటే, అది కేసీఆర్‌ ఉద్యమ సత్తా. ఆ ఉద్యమ నాయకుడు ఇంకోసారి తన విశ్వరూపం ప్రదర్శిస్తున్నారు.

అవును, తెలంగాణ రాష్ట్రానికీ.. భారతదేశానికీ.. ఆ మాటకొస్తే, యావత్‌ ప్రపంచానికీ కరోనా ముప్పు వాటిల్లుతున్న వేళ, తెలంగాణ ముఖ్యమంత్రి కేసీఆర్‌ సంచలన నిర్ణయాలు తీసుకుంటున్నారు. ‘అవసరమైతే తెలంగాణ షట్‌ డౌన్‌ చేస్తాం.. ప్రతి ఇంటికీ రేషన్‌ అందే ఏర్పాట్లు చేస్తాం..’ అని తాజాగా కేసీఆర్‌ ప్రకటించారు. భారత ప్రధాని నరేంద్ర మోడీ, ఆదివారం ఉదయం 7 గంటల నుంచి రాత్రి 9 గంటల వరకు జనతా కర్‌ఫ్యూ చేపట్టాలని పిలుపునిస్తే, తెలంగాణ ముఖ్యమంత్రి కేసీఆర్‌, ఆదివారం ఉదయం 6 గంటల నుంచి సోమవారం ఉదయం 6 గంటల వరకు.. అంటే మొత్తం 24 గంటల పాటు జనతా కర్‌ఫ్యూ పాటించాలని పిలుపునిచ్చారు.

‘కరోనా వైరస్‌కి ఆత్మాభిమానం ఎక్కువ.. దాన్ని వెళ్ళి పలకరిస్తే తప్ప అది మన ఇంటికి రాదు..’ అని ఈ రోజు ప్రెస్‌మీట్‌లో నవ్వులు పూయించిన కేసీఆర్‌, బయటకు వెళ్ళకపోవడం తాలూకు ప్రాముఖ్యతను అందరికీ అర్థమయ్యేలా చెప్పారు. ‘ఒక్క రోజు ఇంట్లో కూర్చుంటే ప్రాణాలు పోతాయా.? భూకంపం వచ్చేస్తుందా.?’ అని ప్రశ్నించారు కేసీఆర్‌.

ప్రెస్‌మీట్‌లో అర్థం పర్థం లేని ప్రశ్నలు సంధించే జర్నలిస్టులకు ఎలా క్లాస్‌ తీసుకోవాలో అలా క్లాస్‌ తీసేసుకున్నారు. కరోనా వైరస్‌ ప్రపంచ మహమ్మారి అనీ, ఈ మహమ్మారిపై పోరాటం చేసే క్రమంలో పాలకులపై సోషల్‌ మీడియాలో సెటైర్లు వేయడం దారుణమన్న కేసీఆర్‌, అలాంటి వెకిలి వేషాలు వేసేవారిని తక్షణం అరెస్ట్‌ చేయాలని ప్రెస్‌మీట్‌లోనే పోలీస్‌ బాస్‌ని ఆదేశించడం గమనార్హం.

కరోనా వైరస్‌ సోకకుండా జాగ్రత్తలు తీసుకోవడం ప్రతి ఒక్కరి బాధ్యత అన్న కేసీఆర్‌, సోకినవారికి వైద్య చికిత్స కోసం పూర్తిగా ప్రభుత్వమే ఖర్చు చేస్తుందని చెప్పారు. 5 వేల కోట్లు కాదు, అవసరమైతే 10 వేల కోట్లు అయినా ఖర్చు చేస్తామని ప్రకటించిన కేసీఆర్‌, వైద్యుల్ని కాపాడుకోవాల్సిన బాధ్యత ప్రతి ఒక్కరి మీదా వుందన్నారు. ఆదివారం సాయంత్రం 5 గంటలకు తాను కూడా ఇంట్లోని బాల్కనీ నుంచి బయటకు వచ్చి ‘చప్పట్లు’ కొడతానని, ప్రతి ఒక్కరూ అలాగే చేయాలని పిలుపునిచ్చారు తెలంగాణ ముఖ్యమంత్రి కల్వకుంట్ల చంద్రశేఖర్‌రావు.