కొనసాగుతున్న రఘురామ లేఖాపర్వం.. ఈసారి అమరావతిపై..

సొంత పార్టీ, ప్రభుత్వంపై నేరుగా పోరాటం కొనసాగిస్తున్న వైఎస్సార్ సీపీ ఎంపీ రఘురామ కృష్ణరాజు తన లేఖాపర్వం కొనసాగిస్తున్నారు. ఒక్కో అంశంపై ప్రభుత్వ తీరును ప్రశ్నిస్తూ సీఎం జగన్ కు లేఖలు రాస్తున్న ఆయన.. తాజాగా మరో లేఖాస్త్రం సంధించారు. ఈసారి రాజధాని అమరావతిపై జగన్ కు లేఖ రాశారు. రాజధానిగా అమరావతి కొనసాగుతోందని ప్రతిపక్షంలో ఉన్నప్పుడు జగన్ హామీ ఇచ్చారని అందులో గుర్తుచేశారు. పాదయాత్ర, ఎన్నికల ప్రచారంలో అమరావతిపై జగన్ హామీ ఇచ్చారని.. కనీసం 30వేల ఎకరాల్లో రాజధాని ఉండాలని సూచించారని చెప్పారు. అయితే, అధికారంలోకి వచ్చిన తర్వాత నిర్ణయాన్ని మార్చుకోవడం సరికాదని రఘురామ పేర్కొన్నారు. ప్రజల తీర్పును దుర్వినియోగం చేయొద్దని హితవు పలికారు. మూడు రాజధానులపై సీఎం నిర్ణయం అందరినీ విస్మయానికి గురిచేసిందన్నారు. ప్రస్తుతం అమరావతికి భవిష్యత్తుకు లేకుండా చేశారని ఆయన ఆవేదన వ్యక్తంచేశారు. ప్రపంచస్థాయి హరిత నగరంగా అమరావతిని తీర్చిదిద్దాలని భూములిచ్చిన రైతులు 550 రోజులుగా ఆందోళన చేస్తున్నా.. ప్రభుత్వం పట్టించుకోవడం దారుణమని రఘురామ తన లేఖలో పేర్కొన్నారు.