జస్ట్ ఆస్కింగ్: అభ్యర్థులు దొరకరట.. దొంగ ఓటర్లైతే దండిగా దొరుకుతారా.?

వైఎస్సార్ కాంగ్రెస్ పార్టీ ముఖ్య నేత, ఆ పార్టీ జాతీయ ప్రధాన కార్యదర్శి, రాజ్యసభ సభ్యుడు విజయసాయిరెడ్డి సోషల్ మీడియా వేదికగా భలే కామెంట్లు చేస్తుంటారు. ‘ఆశలన్నీ చెల్లాచెదురైన తర్వాత తండ్రీ కొడుకుల భాష మారడంలో వింతేమీ లేదు. పార్టీ లేదు బొక్కా లేదు అని స్వయంగా పార్టీ అధ్యక్షుడే అన్నాక వీళ్ళ సంస్కార హీన వీరంగాలు ఇలాగే వుంటాయి. వచ్చే ఎన్నికల నాటికి తెలంగాణలో లాగే అభ్యర్థులు కూడా దొరకరు. రాసి పెట్టుకోబాబూ..’ అంటూ విజయసాయిరెడ్డి తాజాగా ట్వీటేశారు.

ఇందులో ‘అభ్యర్థులు కూడా దొరకరు..’ అంటూ టీడీపీ మీద విజయసాయిరెడ్డి వేసిన సెటైర్ బాగా పేలింది.. కానీ, అది అధికార వైసీపీకి షాకిచ్చింది. ఎక్కడో ఏదో జరిగితే, దాని ఫలితం ఇంకెక్కడో ఇంకెలాగో వుంటుందన్నట్టు, ‘అభ్యర్థులు కూడా దొరకరా.? దొంగ ఓటర్లైతే దొరుకుతారా.?’ అంటూ నెటిజనులు విజయసాయిరెడ్డిని ప్రశ్నిస్తున్నారు.

తిరుపతి ఉప ఎన్నిక కోసం వైఎస్సార్ కాంగ్రెస్ పార్టీ ఎలా దొంగ ఓటర్లను పురమాయించిందీ సభ్యసమాజమంతా చూసింది కదా. అయినా, ఓటు హక్కుని దోచెయ్యడం, దొంగలకు ఆ ఓట్లను కట్టబెట్టడమేంటి.? పంచాయితీ, మునిసిపల్ ఎన్నికల్లో టీడీపీకే కాదు, విపక్షాలకు అభ్యర్థులు కరవయ్యారు. ఇందులో ఇంకో మాటకు తావు లేదు. ఇలాంటి దుస్థితి విపక్షాలకు వచ్చినప్పుడు అధికారపక్షం ఎంత ధైర్యంగా వుండాలి.? కానీ, అదికార వైసీపీకి ధైర్యం లేదు. అందుకే, గెలుస్తామో.. ఓడతామోనన్న సందిగ్ధం నడుమ దొంగ ఓటర్లను దించిందన్నది విపక్షాల వాదన.

ఉత్త వాదన కాదు, సాక్షాలు పోలింగ్ రోజునే కనిపించాయి. భర్త పేరు తెలియని భార్య. దొంగ ఓటు వెయ్యడానికి తండ్రి పేరు మార్చేసుకున్న తనయుడు.. ఇవన్నీ కళ్ళ ముందే కనిపించాయి కదా.? వ్యవస్థల్ని ఇంతలా దిగజార్చేస్తే, విపక్షాలకు అభ్యర్థులు వున్నా ఏం లాభం.? తదుపరి ఎన్నికలకు అసలు ఓటర్లంటూ లేకుండా, దొంగ ఓటర్లతోనే మేనేజ్ చేసేస్తారో.. అసలు ఎన్నికల ప్రక్రియే లేకుండా ఏకగ్రీవాలే చేసేసుకుంటారో. ఇలాంటోళ్ళు సోషల్ మీడియాలో నీతులు చెబుతోంటే, ప్రత్యర్థులపై విమర్శలు చేస్తోంటే.. నవ్వాలో ఏడవాలో తెలియడంలేదు జనానికి.