రఘురామకృష్ణరాజు ఉవాచ: లేపి తన్నించుకున్నదెవరబ్బా.?

వైసీపీ ఎంపీ ఒకరు, విశాఖ స్టీలు ప్లాంటు విషయమై పార్లమెంటు సాక్షిగా కేంద్రాన్ని ప్రశ్నించారు. ఈ ప్రశ్నకు కేంద్రం నుంచి లిఖిత పూర్వక సమాధానం వచ్చింది. విశాఖపట్నం ఉక్కు పరిశ్రమ ప్రైవేటీకరణ విషయమై రెండో ఆలోచన లేదని కేంద్రం ఈ సమాధానంలో తేల్చి చెప్పేసింది. ‘రేపో మాపో ముఖ్యమంత్రి వైఎస్ జగన్ మోహన్ రెడ్డి ఢిల్లీకి వెళతారు కదా.. ఆయనే, కేంద్రాన్ని ఈ విషయమై ప్రశ్నిస్తారు కదా.? ఈలోగా ఎందుకు తొందర.? లేపి తన్నించుకోవడమెందుకు.? కేంద్రం నుంచి సమాధానం రావడం రాష్ట్రానికి చెంప పెట్టు..’ అంటూ వైసీపీ రెబల్ ఎంపీ రఘురామకృష్ణరాజు ఎద్దేవా చేశారు.

‘హైకోర్టు చీవాట్లు పెట్టింది సలహాదారుల విషయమై. అయినా, సిగ్గు లేకుండా సలహాదారు రామకృష్ణారెడ్డి మీడియా ముందుకొచ్చి రాజకీయాలు మాట్లాడుతున్నారు..’ అంటూ మరో తీవ్ర విమర్శ చేశారు నర్సాపురం ఎంపీ. అంతేనా, విజయసాయిరెడ్డి మీదా విరుచుకుపడ్డారు. ‘నా మీద వున్న కేసుల సంగతి మీకు ముందే తెలుసు. తెలిసీ, టిక్కెట్ ఇచ్చారు. ఇప్పుడేమో, ఆ కేసుల్ని సాకుగా చూపించి, నన్ను విదేశాలకు వెళ్ళనీయకుండా అడ్డుకుంటారా.? మరి, మీ మీద వున్న కేసుల మాటేమిటి.? మీరేమో విదేశాలకు వెళ్ళేందుకు పర్మిషన్ అడుగుతారా.? సిగ్గుండాలి..’ అంటూ విజయసాయిరెడ్డిపైనా రఘురామకృష్ణరాజు మండిపడ్డారు.

‘నా మీద ట్విట్టర్ వేదికగా విజయసాయిరెడ్డి సెటైర్లు వేస్తున్నారు.. ఆయన మీదా సెటైర్లు పడబోతున్నాయ్.. మొదలు పెట్టబోతున్నా..’ అంటూ స్వీట్ వార్నింగ్ ఇచ్చేశారు రఘురామ, విజయసాయిరెడ్డికి. ‘విశాఖ స్టీలు ప్లాంటు విషయంలోనూ, పోలవరం విషయంలోనూ, ఇతరత్రా విషయాల్లోనూ కేంద్రాన్ని నిలదీయడానికీ, కేంద్రంపై ఒత్తడి తీసుకురావడానికీ, రాజీనామాతో నేను రెడీ.. వైసీపీ ఎంపీలందరితోనూ రాజీనామా చేయించెయ్యండి.. ఎలాగూ ఏలూరు కార్పొరేషన్ ఎన్నికల్లో మనమే గెలిచాం కాబట్టి.. ఎంపీలంతా రాజీనామా చేసినా, మళ్ళీ గెలిచేస్తాం..’ అంటూ రఘురామ, ముఖ్యమంత్రి వైఎస్ జగన్ మోహన్ రెడ్డికి ఉచిత సలహా ఇవ్వడం గమనార్హం.

రచ్చబండ కార్యక్రమం కొన్ని అనివార్య కారణాల వల్ల ఆగిపోయినా, ఆ రాజకీయ వినోదం మళ్ళీ మొదలైంది. రఘురామ మళ్ళీ రోజువారీ ప్రెస్‌మీట్లు పెడుతున్నారు. ఈసారి, రఘురామపై రాజద్రోహానికి మించిన కేసులేమైనా అధికార వైసీపీ ప్లాన్ చేస్తుందా.? వేచి చూడాల్సిందే.