జగనన్నకి గులాబీ ముల్లు గుచ్చేసుకుంటున్నా.. కాపాడేవారేరీ.?

‘అబ్బబ్బా.. గులాబీ ముల్లు చాలా గట్టిగా గుచ్చేసుకుంటున్నాది.. అయినా, వైఎస్ జగన్ మోహన్ రెడ్డిని కాపాడేందుకు వైఎస్సార్ కాంగ్రెస్ పార్టీలో సరైన నాయకులే లేరా.?’ అంటూ పాపం ఓ బులుగు కార్యకర్త గుస్సా అవుతున్నాడు. మామూలుగా అయితే, తెలంగాణ రాష్ట్ర మంత్రి వేముల ప్రశాంత్ రెడ్డి మీద వైసీపీ నేతలు, కార్యకర్తలు విరుచుకుపడిపోవాలి. అందుబాటులో బూతుల మంత్రిగారున్నారు.. నోటి పారుదల మంత్రి సంగతి సరే సరి.. చిడతలు వాయించే మంత్రి కూడా దుమ్ము రేపేయగలరు. కానీ, పాపం.. ఆంధ్రపదేశ్ నుంచి ఒక్కరంటే ఒక్కరు వైఎస్ జగన్ మోహన్ రెడ్డి తరఫున వకాల్తా పుచ్చుకోలేకపోయారు. కారణం.. అక్కడ గుచ్చుకున్నది గులాబీ ముల్లు.

ముఖ్యమంత్రి వైఎస్ జగన్ మోహన్ రెడ్డికే సమ్మగా వుందో.. లేదంటే, అధినేత ఆదేశించలేదు గనుక.. వైసీపీ నుంచి ఎవరూ ముందుకు రావడంలేదోగానీ.. వైసీపీ కార్యకర్తలకి మాత్రం ఎక్కడో కాలిపోతోంది.. సోషల్ మీడియాలో వైసీపీ దండు మిన్నకుండిపోయింది. ‘వైఎస్ రాజశేఖర్ రెడ్డి దొంగ.. వైఎస్ జగన్ మోహన్ రెడ్డి గజ దొంగ..’ అంటూ వేముల ప్రశాంత్ రెడ్డి విమర్శించిన విషయం విదితమే. ఆ తిట్లనే ఇంకోసారి రిపీట్ చేశారాయన ఈ రోజు తాజాగా.

అయినా, వైసీపీ నుంచి సరైన సౌండ్ లేదు. అయినా, 2019 ఎన్నికల సమయంలో తెలంగాణ రాష్ట్ర సమితి, ఆంధ్రపదేశ్ రాష్ట్రంలో వైసీపీకి మద్దతిచ్చింది. తెలంగాణ రాష్ట్ర సమితి ముఖ్య నేత, మంత్రి కేటీఆర్ స్వయంగా వైఎస్ జగన్ మోహన్ రెడ్డిని కలిసి మంతనాలు జరిపారు. అప్పట్లో ఆల్ ఈజ్ వెల్. ఆ తర్వాత.. అంటే, జగన్ ముఖ్యమంత్రి అయ్యాక.. కేసీఆర్, జగన్ కలిశారు.. కేసీఆర్ ఆహ్వానం మేరకు కాళేశ్వరం ప్రాజెక్టు ప్రారంభోత్సవంలో జగన్ పాల్గొన్నారు.. గోదావరి జలాల సద్వినియోగంపై పెద్ద ప్లాన్ కూడా వేసుకున్నారు.

అవన్నీ గతం. ఇప్పుడు సీన్ మారింది. జగన్ మీద తిట్ల వర్షం తెలంగాణ నుంచి కురుస్తోంది. కానీ, వైఎస్ జగన్ మోహన్ రెడ్డిని ఆ తిట్ల వర్షం నుంచి కాపాడే నాయకుడు లేకుండా పోయాడు. ఇదే విమర్శ తెలుగుదేశం పార్టీనో, జనసేన పార్టీనో.. ఇంకో పార్టీనో చేస్తే ఇంకేమన్నా వుందా.? కేసులు నమోదైపోతాయ్.. అరెస్టులూ జరిగిపోతాయ్.