సైరా’పై ‘పెయిడ్‌’ ఏడుపు.. సోషల్‌ ఫ్రస్ట్రేషన్‌!

సినిమా ఫ్లాపవుతుందని తెలిసి ఎవరైనా కోట్లు గుమ్మరిస్తారా.? చిన్న సినిమా అయినా, పెద్ద సినిమా అయినా.. సూపర్‌ హిట్‌ అవుతుందనే నమ్మకంతోనే సినిమా తీస్తారు. రిజల్ట్‌ ఎలా వున్నా, తమ సినిమా చాలా బావుందని పబ్లిసిటీ చేసుకుంటారు.. చేసుకోవాలి కూడా. కొన్ని సినిమాలకు అంచనాలు తారుమారవుతుంటాయి. కొన్ని అనూహ్యంగా విజయాలు అందుకుంటుంటాయి.

తెలుగు సినీ పరిశ్రమలో హీరోల మధ్య పెద్దగా విభేదాల్లేవు. కానీ, హీరోల అభిమానుల్లో కొందరు మాత్రం కులగజ్జితోనో, ఇతరత్రా మానసిక సమస్యలతోనో తమకు నచ్చని హీరోల్ని ట్రోలింగ్‌ చేసేస్తుంటారు. ఆ హీరో, ఈ హీరో అన్న తేడాల్లేవు.. దాదాపు అందరు హీరోలూ ఈ ‘హేటర్స్‌’ కారణంగా ఇబ్బందులు పడుతున్నవారే. ‘సైరా నరసింహారెడ్డి’ సినిమా ఫస్ట్‌ లుక్‌ వచ్చిన దగ్గర్నుంచి, ఓ ‘పెయిడ్‌ బ్యాచ్‌’, నెగెటివ్‌ క్యాంపెయిన్‌ చేస్తూ వస్తోంది.

‘హను’ పేరుతో ఓ సోషల్‌ మీడియా అకౌంట్‌ అయితే, మరీ జుగుప్సాకరంగా ‘సైరా నరసింహారెడ్డి’కి వ్యతిరేకంగా పనిచేస్తుండడం గమనార్హం. ఎన్టీఆర్‌ మీద అభిమానం ముసుగులో చేస్తున్న దురాగతం ఇది. ‘సైరా నరసింహారెడ్డి’ వసూళ్ళ విషయమై ఎలాంటి ప్రకటనా చేయకూడదని నిర్మాత రామ్‌చరణ్‌ నిర్ణయం తీసుకున్నాడు. బాక్సాఫీస్‌ ట్రాకర్స్‌ కొన్ని లెక్కల్ని ప్రచారంలోకి తెస్తున్న విషయం విదితమే. వాటిని ఇంతవరకూ ‘సైరా’ టీమ్‌ సమర్థించలేదు, తప్పుపట్టలేదు. చాలా సినిమాల విషయంలో ఈ బాక్సాఫీస్‌ ట్రాకర్స్‌ లెక్కలే నిజమవుతుంటాయి.

కానీ, ‘సైరా’ విషయంలో అదనంగా కలిపేశారంటూ రచ్చ షురూ చూస్తున్నారు హేటర్స్‌. ‘సైరా’ ఎంత వసూలు చేస్తుందన్నదానిపై పెద్దగా ఆలోచనల్లేవని సినిమా రిలీజ్‌కి ముందే ‘సైరా’ టీమ్‌ చెప్పేశాక, ఈ ‘కాకి గోల’ ఎందుకో అర్థం కాదు. చరణ్‌ – ఎన్టీఆర్‌ కలిసి ఓ సినిమా చేస్తున్నారు. మహేష్‌ – ఎన్టీఆర్‌ – చరణ్‌ మంచి ఫ్రెండ్స్‌. బాలయ్య – చిరంజీవి మధ్య సన్నిహిత సంబంధాలున్నాయి. ఏ హీరో కూడా ఈ హేటర్స్‌ని ఎంకరేజ్‌ చేసే పరిస్థితి వుండదు.

కేవలం కుల గజ్జితోనో, ఇతరత్రా వ్యక్తిగత విధ్వేషాలతోనో సినీ రంగంలో అంచలంచెలుగా ఎదిగినవాళ్ళని కించపర్చాలనుకుంటే.. అది ఆకాశం మీద ఉమ్మేసినట్లే అవుతుందన్నది నిర్వివాదాంశం. చిరంజీవి కావొచ్చు, విజయ్‌ దేవరకొండ కావొచ్చు.. మహేష్‌బాబు కావొచ్చు, నాని కావొచ్చు.. ఎవరైనాసరే, ప్రేక్షకుల్ని ఎంటర్‌టైన్‌ చేయడమే లక్ష్యంగా సినీ పరిశ్రమలో కొనసాగుతున్నారు. నచ్చితే సినిమా చూడొచ్చు, నచ్చకపోతే నచ్చలేదనొచ్చు.. అంతేగానీ, సిల్లీగా సోషల్‌ మీడియాలో వెర్రి తలలు వేస్తే మాత్రం దాన్ని సోషల్‌ వ్యభిచారం అనడం తప్పేమీ కాదు.!