గంటా ‘చిరు’ భజన అందుకేనా.?

తెలుగుదేశం పార్టీ అధినేత చంద్రబాబుకు గత కొద్ది కాలంగా ముఖం చాటేస్తున్న మాజీ మంత్రి టీడీపీ నేత గంటా శ్రీనివాసరావు, సినీ నటుడు చిరంజీవితో మాత్రం సన్నిహితంగా ఉంటున్నారు. ఇది తెలుగు దేశం పార్టీ శ్రేణులకు అస్సలు మింగుడు పడడం లేదు. చిరంజీవికీ, గంటా శ్రీనివాసరావుకీ ఉన్న బంధం ఈ నాటిది కాదు. ప్రజారాజ్యం పార్టీలో గంటా కీలక నేతగా పని చేశారు. చిరంజీవి కారణంగానే అప్పట్లో గంటా మంత్రి అయ్యారు. తెలుగు దేశం పార్టీలో ఉన్నా గంటా.. చిరంజీవితో సన్నిహిత సంబంధాలు కొనసాగిస్తూ వచ్చారు. ఇదంతా పాత కథ.

కొత్త విషయం ఏంటంటే, జనసేన వైపుగా గంటా శ్రీనివాసరావు అడుగులేస్తున్నారట. ఇందుకోసం చిరంజీవితో గంటా శ్రీనివాసరావు మరింత సన్నిహితంగా మెలుగుతున్నారు. వైసీపీలోకి వెళ్లాలనే ఆలోచన, బీజేపీతో సంప్రదింపులు ఉన్నా, గంటా శ్రీనివాసరావు ఇంకో పక్క మూడో స్కెచ్‌ కూడా రెడీ చేసుకున్నారు. అయితే, పవన్‌ కళ్యాణ్‌, గంటా శ్రీనివాసరావు పట్ల అంత సుముఖంగా లేరని తెలుస్తోంది.

ఈ నేపథ్యంలో పవన్‌ కళ్యాణ్‌తో భేటీ కోసం చిరంజీవిని మధ్యవర్తిగా ఉంచాలన్నదే గంటా తాజా ఆలోచనగా కనిపిస్తోంది. గతంలో ఎన్నడూ లేని విధంగా అన్నయ్యా.. అన్నయ్యా.. అంటూ చిరంజీవిని గంటా శ్రీనివాస రావు కాకా పడుతున్నది ఇందుకేనేమో. సామాజిక వర్గ సమీకరణాల ప్రకారం చూస్తే, గంటా వల్ల జనసేనకు లాభమే తప్ప, నష్టం లేదని చిరంజీవి కూడా భావిస్తున్నారట.

కానీ, ఆ ఈక్వేషన్స్‌ పట్ల పవన్‌ కళ్యాణ్‌కి పెద్దగా ఆసక్తి లేదు. ప్రస్తుతం పవన్‌ కళ్యాణ్‌ ప్రకృతి వైద్య చికిత్స కోసం దేశంలోని పలు రాష్ట్రాల్లో చక్కర్లు కొడుతున్నారు. పవన్‌ కళ్యాణ్‌ తిరిగొచ్చాక చిరంజీవితో కానీ, నాగబాబుతో కానీ కలిసి పవన్‌ కళ్యాణ్‌ వద్దకు వెళ్లాలని గంటా శ్రీనివాస రావు భావిస్తున్నారట.