నారాయణ అరెస్ట్, బెయిల్ కథ: వైసీపీ ఏం సాధించింది.?

మాజీ మంత్రి, టీడీపీ నేత నారాయణను అరెస్టు చేశామన్న ‘శునకానందం’ తప్ప, వైసీపీకి ఏం లాభం చేకూరింది.? నాటకీయ పరిణామాల మధ్య కిడ్నాప్ తరహాలో మాజీ మంత్రి నారాయణను హైద్రాబాద్‌లో ఏపీ పోలీసులు అరెస్ట్ చేశారు.

విద్యా వ్యాపారంలో డక్కామక్కీలు తినేసిన నారాయణ, రాజకీయాల్లోనూ చాలా చాలా చూసేశారు. పదో తరగతి ప్రశ్నా పత్రం లీకేజీ కేసులో అరెస్టయ్యే పరిస్థితి వస్తుందా.? వస్తే ఏం చేయాలి.? ఆయన కనీసపాటి ఆలోచన చేయకుండా వుంటారా.? ఆ విషయం వైసీపీ అధిష్టనం అంచనా వేయకుండా వుంటుందా.? ఆ సంగతి కాస్సేపు పక్కన పెడదాం.

ఇంతకీ, ఈ మొత్తం వ్యవహారంలో పోలీసు శాఖ పని తీరు ఏంటి.? అన్నదానిపై సాధారణ ప్రజానీకంలో చర్చ జరుగుతోంది. రాజకీయ నాయకుల అరెస్టు, జైలు, బెయిలు.. ఇవన్నీ సర్వసాధారణమైన విషయాలే. చాలా కేసుల్లో రాజకీయ నాయకులు చాలా చాలా తేలిగ్గా తప్పించుకుంటారు. ఇది చరిత్ర చెబుతున్న సత్యం.

ఈ మొత్తం ఎపిసోడ్‌లో ఒకే ఒక్క విషయం స్పష్టంగా అర్థమవుతోంది. నారాయణ మీద కేసుల పేరుతో ఆయనకు అనూహ్యమైన పబ్లిసిటీ వచ్చిపడింది. వైసీపీ అధికారంలోకి వచ్చాక, నారాయణ పేరు పెద్దగా రాజకీయాల్లో వినిపించలేదు. ఇప్పడాయన పేరుకి బోల్డంత పాపులారిటీ వచ్చింది.. అది నెగెటివ్‌గానా.? పాజిటివ్‌గానా.? అన్నది వేరే చర్చ.

సో, వచ్చే ఎన్నికల్లో నారాయణ తిరిగి పోటీ చేయడానికి తగినంత బ్యాక్‌గ్రౌండ్ అయితే వైసీపీ పక్కాగా సెట్ చేసినట్లే భావించాలి. మంత్రిగా వున్న సమయంలోనే, విద్యా సంస్థల వ్యవహారాల్ని తాను చూసుకోవడంలేదనీ, దానికి దూరంగా వున్నాననీ నారాయణ ప్రకటించారు.

మరెలా, నారాయణ విద్యా సంస్థ అధినేతగా ఆయన్ని చూపిస్తూ, కేసు పెట్టగలిగినట్టు.? అరెస్టు చేసినట్టు.? మెజిస్ట్రేట్ ముందు మాజీ మంత్రి నారాయణను హాజరు పరిచాక, పెద్దగా నారాయణ తరఫు న్యాయవాదులు కష్టపడకుండానే తమ క్లయింటుకి బెయిల్ తెచ్చుకోగలిగారు.

నిజానికి, నారాయణ అరెస్టు గొప్ప విషయమేమీ కాదనీ, ఆయన తేలిగ్గానే బెయిల్ పొందుతారని చాలామంది అనుకున్నారు. అదే జరిగింది కూడా. అక్కడికేదో తాము ఘనకార్యం చేసేసినట్టు వైసీపీ శ్రేణులే అనవసర సంబరాలు చేసుకున్నాయి. ఏకంగా నారాయణకు పదేళ్ళ జైలు శిక్ష పడే అవకాశముందంటూ వైసీపీ భజన బ్యాచ్, మీడియా ద్వారా ప్రచారం చేయడం కొసమెరుపు.