బర్త్‌డే స్పెషల్‌: షష్టిపూర్తి అయినా బాలయ్య తిరుగులేని నట సింహమే.!

నందమూరి బాలకృష్ణ ఈ పేరును తెలుగు ప్రేక్షకులకు ప్రత్యేకంగా పరిచయం చేయనక్కర్లేదు. తెలుగు సినిమా బతికి ఉన్నంత కాలం నందమూరి తారక రామారావు ఎలా అయితే నిలిచి పోతారో అలాగే ఆయన వారసుడిగా తెలుగు సినిమాను సుమారు మూడు దశాబ్దాలుగా ఏలేస్తున్న బాలకృష్ణ కూడా నిలిచి పోతారు అనడంలో ఎలాంటి సందేహం లేదు.

సుదీర్ఘ కాలంగా టాప్‌ స్టార్‌ హీరోగా నిలిచి ఇప్పటికి కూడా స్టార్‌ హీరోగానే వెలుగు వెలుగుతున్న బాలకృష్ణ సాధించిన విజయాలు, నెలకొల్పిన రికార్డులు, పొందిన ప్రశంసలు అతి కొద్ది మందికే సాధ్యం అయ్యాయి. కొన్ని పాత్రలు కేవలం ఆయన కోసమే పుట్టాయా అనిపిస్తుంది. ముఖ్యంగా ఫ్యాక్షన్‌ పాత్రలు అయిన నరసింహనాయుడు మరియు సమరసింహారెడ్డి పాత్రల్లో ఆయన కనిపించిన తీరు మరే హీరోకు అది సాధ్యం కాదేమో అన్నట్లుగా ఉంటుంది. ఫ్యాక్షన్‌ హీరోగా చేతిలో గొడ్డలి పట్టుకుని విలన్స్‌ను నరుకుతూ ఉంటే ఆయన బాడీలాంగ్వేజ్‌ నిజంగా ఈయన ఫ్యాక్షనిస్ట్‌ అయ్యి ఉంటాడా అన్నట్లుగా అనుమానం వచ్చేది.

ఈ తరం హీరోల్లో పౌరాణిక పాత్రలు వేయగల సత్తా కేవలం బాలకృష్ణకు మాత్రమే ఉందని ప్రతి ఒక్కరు ఒప్పుకునే విషయం. తండ్రి ఎన్టీఆర్‌ ఉన్నప్పటి నుండి మొన్నటి గౌతమి పుత్ర శాతకర్ణి చిత్రం వరకు బాలయ్య ఎన్నో అద్బుతమైన పౌరాణిక పాత్రలు చేయడంతో పాటు అలరించాడు. అన్ని విధాలుగా తనకు పౌరాణిక పాత్రలు నప్పుతాయని నిరూపించుకున్నాడు.

బాలకృష్ణ సినీ కెరీర్‌లో దాదాపుగా అన్ని రకాల పాత్రల్లో నటించడంతో పాటు ఎన్నో విలక్షణ పాత్రల్లో నటించి మెప్పించాడు. ముఖ్యంగా భైరవ ద్వీపం చిత్రంలో కురూపిగా నటించేందుకు బాలయ్య ఒప్పుకోవడం అప్పట్లో రికార్డుగా చెప్పుకుంటారు. ఒక స్టార్‌ హీరో అంతే కాకుండా అందగాడిగా పేరున్న బాలయ్య అలాంటి పాత్రల్లో నటించడం అంటే నిజంగా సాహస నిర్ణయంగా అభివర్ణించారు.

బాలకృష్ణ 9వ తరగతి చదువుతున్న సమయంలోనే అంటే 14 ఏళ్ల వయసులోనే తాతమ్మకల అనే సినిమాతో నటుడిగా తెరంగేట్రం చేశాడు. ఆ సినిమాకు ఎన్టీఆర్‌ దర్శకత్వం వహించారు. తండ్రి ఎన్టీఆర్‌ దర్శకత్వంలో ఎన్నో సినిమాలు చేసిన బాలకృష్ణ హీరోగా 1984వ సంవత్సరంలో సాహసమే జీవితం అనే చిత్రంతో హీరోగా పరిచయం అయ్యాడు. మొదటి సినిమా నిరాశ పర్చినా ఆ తర్వాత ఎన్నో సూపర్‌ హిట్స్‌ చేశాడు.

బాలకృష్ణ సెన్షేషనల్‌ సూపర్‌ హిట్స్‌ సుల్తాన్‌ చిత్రం నుండి ఆరంభం అయ్యాయి. మంగమ్మగారి మనవడు, టాప్‌ హీరో చిత్రాలతో మాస్‌ ఆడియన్స్‌కు మరింతగా చేరువయ్యాడు. ఇక నరసింహనాయుడు సినిమాతో టాప్‌ స్టార్‌గా నిలిచిపోయాడు. ఆ సినిమాతో ఇండస్ట్రీ రికార్డులను బద్దలు కొట్టాడు. కోదండరామిరెడ్డి, రాఘవేంద్ర రావుల దర్శకత్వంలో అత్యధిక సినిమాలు చేసిన బాలకృష్ణ తండ్రితో కలిసి పలు చిత్రాల్లో నటించాడు. ఆ తర్వాత ఇతర హీరోల సినిమాల్లో పెద్దగా స్క్రీన్‌ షేర్‌ చేసుకోలేదు.

బాలకృష్ణ నటించిన ఆధిత్య 369, భైరవ ద్వీపం చిత్రాలు తెలుగు సినిమా ఉన్నంత కాలం నిలిచిపోయే సినిమాలు. తండ్రి ఎన్టీఆర్‌ బయోపిక్‌ ను రెండు పార్ట్‌లుగా తెరకెక్కించిన బాలకృష్ణ హీరోగా, నిర్మాతగా రెండు విధాలుగా నష్టపోయాడు. గత కొన్నాళ్లుగా బాలయ్య కెరీర్‌ పరంగా ఒడిదొడుకులు ఎదుర్కొంటున్నాడు. ఈ షష్టి పూర్తి నుండి మళ్లీ మునుపటి సక్సెస్‌లను దక్కించుకుంటాడని అభిమానులు ఆశిస్తున్నారు.

బాలయ్య నేడు తన 60వ పుట్టిన రోజు అంటే షష్టి పూర్తి జరుపుకుంటున్నారు. షష్టి పూర్తి అయినా కూడా బాలయ్య ఇంకా నటసింహమే అంటూ అభిమానులు అంటున్నారు. ప్రస్తుతం బాలకృష్ణ బోయపాటి దర్శకత్వంలో ఒక సినిమాను చేస్తున్నాడు. బర్త్ డే సందర్భంగా రిలీజైన ఈ సినిమా ఫస్ట్ రోర్ నిజంగా ‘సింహా గర్జన’ లానే ఉందని బాలయ్య అభిమానులు పండగ చేసుకుంటున్నారు. ఇప్పటికే వీరిద్దరి కాంబో లో రెండు సినిమాలు వచ్చి సూపర్ హిట్ అయ్యాయి. టీజర్ చూసాక ఈ సినిమా కుడా మరో బ్లాక్ బస్టర్ అవుతుందనే నమ్మకాన్ని అంతా వ్యక్తం చేస్తున్నారు.

ఈ సందర్బంగా బాలయ్యకు తెలుగుబుల్లెటిన్.కామ్ తరపున,‌ ఇంకా ఆయన అభిమానుల తరపున పుట్టిన రోజు శుభాకాంక్షలు తెలియజేస్తున్నాం. బాలకృష్ణ మరిన్ని మంచి పాత్రల్లో నటించి మెప్పించాలని ఆశిస్తున్నాం.