నాగార్జున బర్త్ డే స్పెషల్స్: అక్కినేని వారసుడిగా సినీ దిగ్గజం పేరు నిలబెట్టిన నాగార్జున

తెలుగు సినీ పరిశ్రమలో దిగ్గజ నటుడిగా అక్కినేని నాగేశ్వరరావు ప్రముఖ స్థానం ఉంది. అత్యధిక సినీ అనుభవం కూడా ఆయన సొంతం. తెలుగు సినీ పరిశ్రమ మద్రాసు నుంచి హైదరాబాద్ రావడానికి ప్రధాన కారకుడిగా, అన్నపూర్ణ స్టూడియో అధినేతగా అక్కినేని నాగేశ్వరరావు ఎంతో పేరు ప్రఖ్యాతులు గడించారు. ఇంతటి ప్రముఖ స్థానం ఉన్న అక్కినేని వంశ గౌరవాన్ని అంతే స్థాయిలో నిలబెట్టారు అక్కినేని నాగార్జున.

నాగేశ్వరరావు నట వారసుడిగా రాణించి అగ్రనటుల్లో ఒకరిగా స్థానం సంపాదించారు. తనదైన నటన, స్టయిల్ తో ప్రత్యేక అభిమాణగణాన్ని పొంది నాగేశ్వరరావు పేరు ప్రతిష్టలు నిలబెట్టారు. అమెరికా చదువు పూర్తయ్యాక స్వదేశానికి వచ్చిన నాగార్జునను సినిమాల్లో హీరోగా పరిచయం చేశారు నాగేశ్వరరావు. తొలి సినిమా విక్రమ్ తో నటుడిగా పరిచయమైన నాగార్జున క్రమంగా తనకంటూ ఓ స్టయిల్ ఏర్పరచుకున్నారు.

కొత్తవారిని ప్రోత్సహిస్తూ..

నాగార్జునను హీరోగా మంచి మార్కులు సాధించిన సినిమా కలెక్టర్ గారి అబ్బాయి. ఈ సినిమాలో నటనతో విమర్శలకు చెక్ పెట్టారు. అంతకుముందు సినిమాలకు ఈ సినిమాలో నటనకు నాగార్జున పరిణితి చెందారు. తర్వాతి రోజుల్లో నాగార్జున అంటే టాలీవుడ్ హ్యాండ్ సమ్ గా ఎదిగారు. అమ్మాయిల కలల రాకుమారుడిలా ఇమేజ్ సాధించారు. నాగార్జున హెయిర్ స్టయిల్ ఓ సెన్సేషన్. యూత్ ఆరాధ్య హీరోగా నాగార్జున రాణించి నాగేశ్వరరావు సినీ వారసత్వాన్ని ఘనంగా నిలబెట్టారు నాగార్జున.

కాలేజీ కుర్రాడిగా సినిమాల్లో నాగార్జున ఓ ట్రెంట్ సెట్టర్ అని చెప్పాలి. క్రమంగా సినిమాలపై, నటనపై పట్టు సాధించిన నాగార్జున కెరీర్లో ఎన్నో సూపర్ హిట్లు, బ్లాక్ బస్టర్ హిట్లు సాధించారు. కెరీర్లో కొత్త టెక్నీషియన్లను ప్రోత్సహించడం.. కొత్త అవకాశాలను కల్పించి వారిని పరిశ్రమలో నిలదొక్కుకునేలా ప్రోత్సాహం అందించడంలో నాగార్జున మొదటి వరుసలో ఉంటారనడంలో సందేహం లేదు.

అక్కినేని లెగసీని కొనసాగిస్తూ..

తెలుగు సినీ పరిశ్రమలోని పెద్ద కుటుంబాల్లో ఒకటిగా అక్కినేని వంశం ఒక మహా వృక్షంగానే నిలిచింది. నాగేశ్వరరావు లెగసీని అంతేస్థాయిలో కొనసాగించిన వారసుడు నాగార్జున. ఓదశలో వరుస హిట్లు నాగార్జున కెరీర్ గ్రాఫ్ దూసుకుపోయింది. మళ్లీ వరుస ఫ్లాపులు.. మళ్లీ వరుస హిట్లు.. ఇలానే కొనసాగింది ఆయన కెరీర్. ఘనమైన వారసత్వం ఉన్న నాగార్జున ఎప్పుడూ హద్దు దాటి ప్రవర్తించలేదు.

తన స్టయిల్, మేకోవర్ తోనే అభిమానులను సంపాదించుకుని పరిశ్రమలో సుస్థిర స్థానం సంపాదించుకున్నారు. మాస్, క్లాస్ సినిమాలే కాదు.. తన జనరేషన్ లో, ప్రస్తుత జనరేషన్లో ఎవరూ టచ్ చేయలేని భక్తిరస చిత్రాలు చేసి తానెంత ప్రత్యేకమో చాటిచెప్పారు.