పెద్దల సభకు కవిత?

పసుపు రైతుల ఆగ్రహంతో లోక్ సభ ఎన్నికల్లో ఓటమి పాలైన మాజీ ఎంపీ కల్వకుంట్ల కవిత పెద్దల సభకు వెళ్లనున్నట్టు సమాచారం. వచ్చే ఏడాది ప్రథమార్థంలో జరిగే రాజ్య సభ ఎన్నికల్లో తన కుమార్తెను బరిలోకి దింపి పెద్దల సభకు నామినేట్ చేయాలని టీఆర్ఎస్ అధినేత కేసీఆర్ నిర్ణయం తీసుకున్నట్టు తెలుస్తోంది.

మొన్నటి లోక్ సభ ఎన్నికల్లో కవితతోపాటు కరీంనగర్ మాజీ ఎంపీ బోయినపల్లి వినోద్ కూడా ఓడిపోయారు. ముఖ్యంగా ఎన్నికల్లో ఓటమి తర్వాత కవిత బయట ఎక్కడా కనిపించలేదు. పార్టీ కార్యక్రమాలు సహా ఏ సందర్భంలోనూ బయట కనిపించడానికి అంతగా ఇష్టపడలేదు. ఈ నేపథ్యంలో కవితను రాష్ట్ర మంత్రివర్గంలోకి, వినోద్ ను రాజ్యసభకు పంపించాలని కేసీఆర్ భావించినట్టు ప్రచారం జరిగింది.

అయితే, అంతకుముందు నిజామాబాద్ ఎంపీగా పనిచేసిన కవిత జాతీయ స్థాయిలో గుర్తింపు పొందారు. పలు అంశాలపై లోక్ సభలో రాష్ట్ర వాణిని బలంగా వినిపించగలిగారు. ఈ నేపథ్యంలో కవితను రాష్ట్ర మంత్రివర్గంలోకి తీసుకోవడం కంటే రాజ్యసభకు పంపించడమే మంచిదని గులాబీ బాస్ నిర్ణయానికి వచ్చినట్టు సమాచారం.

దీంతో వినోద్ ను కేబినెట్ హోదాతో రాష్ట్ర ప్రణాళికా సంఘం ఉపాధ్యక్షుడిగా నియమించారు. దీంతో కవితను పెద్దల సభకు పంపించడానికి లైన్ క్లియర్ అయింది. ఈ నేపథ్యంలో కవిత సైతం ఇటీవల మళ్లీ క్రియాశీలకంగా వ్యవహరిస్తున్నారు. త్వరలో రాజ్యసభకు వెళ్లడం ఖాయమైనందున ఆమె పార్టీ వ్యవహారాల్లో చురుగ్గా పాల్గొంటున్నారని చెబుతున్నారు. మొత్తానికి త్వరలోనే కవిత పెద్దల సభకు వెళ్లడం ఖాయంగా కనిపిస్తోంది.