జస్ట్‌ ఆస్కింగ్‌: రాష్ట్రంలో కమ్మ, రెడ్డి కులాలు మాత్రమే వున్నాయా.?

దేశంలో ఎక్కడా లేని ‘కుల జాడ్యం’ ఆంధ్రప్రదేశ్‌లోనే కన్పిస్తుంది. 2009 నుంచి 2014 వరకూ రాష్ట్రంలో ‘కమ్మ’ పాలన సాగిందంటూ అప్పట్లో వైఎస్సార్సీపీ విమర్శించింది. ఇప్పుడేమో, రాష్ట్రంలో ‘రెడ్డి’ పాలన కొనసాగుతోందని టీడీపీ విమర్శిస్తోంది. అటు వైసీపీ చెప్పిందీ నిజమే.. ఇటు టీడీపీ చెప్పిందీ నిజమేనేమో.!

చంద్రబాబు హయాంలో ‘కమ్మ’ సామాజిక వర్గానికి అన్ని రంగాల్లోనూ పెద్ద పీట వేసిన విషయాన్ని ఎలా మర్చిపోగలం.? కాంట్రాక్టుల దగ్గర్నుంచి.. ఉద్యోగాలదాకా.. ‘కమ్మ’టి ‘కోటా’ అమలయ్యిందన్నది ఓపెన్‌ సీక్రెట్‌. ఇప్పుడు అదే విధానం వైసీపీ పాలనలోనూ అమలవుతోందట.. అయితే, చిన్న తేడా ఏంటంటే.. ఇప్పుడు ‘రెడ్డి’ కోటా కింద ఆయా పదవుల్ని భర్తీ చేస్తున్నారంతే.

ప్రభుత్వ ఖజనా నుంచి వేతనాల్ని అందుకుంటోన్న ‘సలహాదారుల’ లెక్క తీస్తే, అందులో ‘రెడ్డి’ సామాజిక వర్గానికి ఏ స్థాయిలో పెద్ద పీట వేస్తున్నారో అర్థం చేసుకోవచ్చు. ఈ క్రమంలో తమ ‘కోటా’ తగ్గుతోందని ‘కమ్మ’ సామాజిక వర్గం గుస్సా అవుతోంది. మాజీ ఎంపీ రాయపాటి సాంబశివరావు తమ్ముడు కుమార్తె, అమరావతి మహిళా జేఏసీ నేత రాయపాటి  శైలజ, తాజా పరిణామాలపై ఆసక్తికరమైన వ్యాఖ్యలు చేశారు.

‘చంద్రబాబు హయాంలో కమ్మ సామాజిక వర్గానికి పెద్దగా అవకాశాలు దక్కలేదు’ అని చెబుతున్నారామె. ‘అందరూ కమ్మోళ్ళనే తీసుకుంటున్నారనే విమర్శలు వస్తాయని.. అప్పట్లో చంద్రబాబు కమ్మ కులానికి తగిన ప్రాధాన్యతనివ్వలేదు. ఇప్పుడేమో, కమ్మ సామాజిక వర్గంపై వైఎస్‌ జగన్‌ ప్రభుత్వం ఉక్కుపాదం మోపుతోంది. సిగ్గూ శరం వుంటే వైసీపీలోని కమ్మ ప్రజా ప్రతినిథులు పార్టీ నుంచి బయటకు రావాలి..’ అంటూ సంచలన ఆరోపణలు చేశారామె.

అంతే కాదు, ‘కమ్మ సామాజిక వర్గం అంతా ఒక్క తాటిపైకి రావాలి..’ అని అల్టిమేటం కూడా జారీ చేసేశారు శైలజ. ఇదెక్కడి పైత్యం.? అటు కమ్మ సామాజిక వర్గం.. ఇటు రెడ్డి సామాజిక వర్గం.. రాష్ట్రంలో ఈ రెండే వున్నాయా.? మిగతా కులాల సంగతేంటి.? మతాల మాటేమిటి.? కుల మతాలకతీతంగా పరిపాలన చేస్తామని వైఎస్‌ జగన్‌ చెబుతూ వస్తున్నారు. కానీ, చేస్తున్నదేంటి.? రెడ్డి సామాజిక వర్గానికే ఎందుకు ‘అగ్ర తాంబూలం’ దక్కుతోంది.? అన్న ప్రశ్నకు స్వయానా ముఖ్యమంత్రి సమాధానం చెప్పాలి.

పార్టీలో ఆయన ఎవరికైనా అవకాశాలిచ్చుకోవచ్చు. కానీ, ప్రభుత్వంగా.. ప్రజలందర్నీ ఒకేలా చూడాలి కదా.! సంక్షేమ పథకాల పేరుతో పబ్లిసిటీ స్టంట్లు ఓ పక్క చెయ్యడం.. ఇంకోపక్క, తన సామాజిక వర్గానికి పెద్ద పీట వేయడం.. అస్సలేమాత్రం సమర్థనీయం కాదు. కమ్మ – రెడ్డి వివాదంతో అయినా, రాష్ట్ర ప్రజానీకం కళ్ళు తెరవాలన్నది రాజకీయ విశ్లేషకుల మాట.