Tillu Square: ‘టిల్లు పాత్ర మనందరి జీవితాల్లో భాగమైంది. ఈరోజు టిల్లు మన ఇంట్లో తిరిగే మనిషి. అద్భుతమైన పాత్రని క్రియేట్ చేసినందుకు హ్యాట్సాఫ్ సిద్ధు (Siddhu Jonnalagadda)’ అని కొనియాడారు జూనియర్ ఎన్టీఆర్ (Jr Ntr) అన్నారు. హైదరాబాద్ లో జరిగిన టిల్లు స్క్వేర్ (Tillu Square) సక్సెస్ మీట్ లో ముఖ్య అతిధిగా పాల్గొన్న ఎన్టీఆర్ మాట్లాడుతూ.. ‘నేను నవ్వడం మొదలుపెడితే ఆపుకోలేను. అలాంటిది నేనింక నవ్వలేను బాబోయ్ అనేంతగా నవ్వించాడు. సిద్దు ఇంకా అద్భుతమైన పాత్రలు క్రియేట్ చేయాలని కోరుకుంటున్నాను. ఒక బ్లాక్ బస్టర్ చిత్రానికి సీక్వెల్ తేలికైన విషయం కాదు. సినిమాని అద్భుతంగా తెరకెక్కించిన మల్లిక్ రామ్ గారికి హ్యాట్సాఫ్’ అన్నారు.
త్రివిక్రమ్ మాట్లాడుతూ.. ‘100 కోట్ల క్లబ్ లో చేరిన సిద్ధుకి కంగ్రాట్స్. డీజే టిల్లు డైరెక్టర్ విమల్, ఇప్పుడు మల్లిక్.. టిల్లు తప్ప వేరే పని లేనట్టు పనిచేశారు. అందుకే ఇంత పెద్ద సక్సెస్ కనిపిస్తోంద’ని అన్నారు.
విశ్వక్ సేన్ మాట్లాడుతూ.. ‘చెప్పి కొట్టడంలో కిక్ ఉంటుంది. సిద్ధు చెప్పి మరీ విజయం సాధించాడు. టిల్లు స్క్వేర్ ను సిద్ధు ఎంత నమ్మాడో నాకు తెలుసు. టిల్లు పాత్ర ఎప్పటికీ నిలిచిపోతుంది. చిత్ర బృందానికి నా శుభాకాంక్షల’ని అన్నారు.
హీరో సిద్ధు జొన్నలగడ్డ మాట్లాడుతూ.. ‘సినిమా విజయానికి కృషి చేసిన చిత్ర బృందానికి, సినిమాకి ఇంతటి విజయాన్ని అందించిన ప్రేక్షకులకు నా కృతఙ్ఞతలు. టిల్లు క్యూబ్ తో మిమ్మల్ని మరింత అలరిస్తాన’ని అన్నారు.
కార్యక్రమంలో హీరోయిన్లు అనుపమ, నేహా శెట్టి, దర్శకుడు మల్లిక్ రామ్, నిర్మాతలు తదితరులు పాల్గొన్నారు.