సూపర్‌ ట్విస్ట్‌: మోడీ వద్దకు చంద్రబాబు రాయబారం.?

తెలుగుదేశం పార్టీ అధినేత నారా చంద్రబాబునాయుడు మరో ‘యూ టర్న్‌’ తీసుకోబోతున్నారా.? ఇంకోసారి బీజేపీతో జతకట్టేందుకు సమాయత్తమవుతున్నారా.? అంటే, అవుననే అభిప్రాయాలు టీడీపీ శ్రేణుల్లో విన్పిస్తున్నాయి. రాష్ట్రంలో తాజా రాజకీయ పరిణామాల్ని కేంద్రంలో అధికారంలో వున్న బీజేపీ చాలా నిశితంగా పరిశీలిస్తున్న మాట వాస్తవం. పైకి మాత్రం ‘రాష్ట్ర ప్రభుత్వ నిర్ణయాలతో కేంద్రానికి సంబంధం వుండదు’ అని చెబుతున్నా, వాస్తవ పరిస్థితులు అందుకు భిన్నంగా వున్నాయి.

కేంద్ర ప్రభుత్వ పెద్దలకు సంబంధించి ఎప్పటికప్పుడు సమాచారం తెప్పించుకుంటున్న టీడీపీ అధినేత చంద్రబాబు, ఢిల్లీలో తనకు అత్యంత సన్నిహితులైనవారిద్వారా ప్రధాని నరేంద్ర మోడీతో రాయబారానికి ప్రయత్నిస్తున్నారట. ఓ వైపు నరేంద్ర మోడీతోనూ, ఇంకో వైపు అమిత్‌ షాతోనూ రాయబారానికి చంద్రబాబు ప్రయత్నిస్తున్నారంటూ ఏపీ రాజకీయాల్లో ఒక్కసారిగా గుసగుసలు గుప్పుమంటున్నాయి. మాజీ కేంద్ర మంత్రి సుజనా చౌదరి, ఇంకొందరు ఈ మొత్తం ప్రక్రియను పర్యవేక్షిస్తున్నట్లు తెలుస్తోంది.

ఢిల్లీ పెద్దల నుంచి ఏ మాత్రం సానుకూలత కన్పించినా, హుటాహుటిన చంద్రబాబు ఢిల్లీకి పయనమవుతారట. ఈ మొత్తం వ్యవహారం సోమవారం లోపే పూర్తవ్వాలనే ఆలోచనతో చంద్రబాబు వున్నట్లు సమాచారం. అయితే, తెలుగుదేశం పార్టీని ఇంకోసారి పంచన చేర్చుకోవడం ఏమాత్రం మంచిది కాదని ఏపీ బీజేపీలో చంద్రబాబు వ్యతిరేక వర్గం అధిష్టానానికి ఇప్పటికే స్పష్టం చేసేసిందనుకోండి.. అది వేరే విషయం. అదే సమయంలో, ఢిల్లీ స్థాయిలో చంద్రబాబు చేస్తున్న లాబీయింగ్‌పై ఆ వర్గం, వైఎస్సార్‌ కాంగ్రెస్‌ పార్టీని కూడా అప్రమత్తం చేసినట్లు చెబుతున్నారు.