జగన్‌ రెడ్డి వర్సెస్‌ పవన్‌ నాయుడు.. వాట్‌ నెక్స్‌ట్‌.?

‘పాలన చేతకాక.. కాపు నేతలతో తిట్టిస్తారా.? ముందు ప్రజలు ఎదుర్కొంటున్న సమస్యలను పరిష్కరించండి.. ఆ తర్వాత నా మీద ఫోకస్‌ పెట్టండి.. నాకేమీ సమస్య లేదు. మీరు వైసీపీ కార్యకర్తలా కాకుండా ఆంధ్రప్రదేశ్‌ ముఖ్యమంత్రిలా వ్యవహరించండి..’ అంటూ జనసేన అధినేత పవన్‌ కళ్యాణ్‌, సూటిగా ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డిని ప్రశ్నిస్తే, పవన్‌ ఊహించినట్లే.. కాపు నేత వైసీపీ తరఫున, వైసీపీ ప్రభుత్వం తరఫున, ముఖ్యమంత్రి వైఎస్‌ జగన్‌ మోహన్‌రెడ్డి తరఫున మీడియా ముందుకొచ్చి, పవన్‌ కళ్యాణ్‌పై ఎడా పెడా విమర్శలు చేసేశారు.

‘పవన్‌ నాయుడు’ అంటూ ఎద్దేవా చేసేసిన ఆ వైసీపీ నేత ఎవరో కాదు, మంత్రి పేర్ని నాని. ఒక్కసారి కాదు, ఒకటికి వందసార్లు పవన్‌ కళ్యాణ్‌ని ఉద్దేశించి ‘పవన్‌ నాయుడు’ అంటూ సంబోదించారాయన. వైఎస్‌ జగన్‌ మోహన్‌రెడ్డిని వైఎస్‌ జగన్‌ అనీ, జగన్‌ అనీ, జగన్‌ రెడ్డి అనీ అనడం కొత్తేమీ కాదు. పవన్‌ కళ్యాణ్‌ మాత్రమే ‘జగన్‌ రెడ్డి’ అనకూడదని బహుశా వైసీపీ కొత్త రాజ్యాంగంలో రాసుకున్నారేమో.

నిజానికి, పవన్‌ కళ్యాణ్‌ ఎప్పుడూ తన పేరు చివర్న ‘నాయుడు’ అని పెట్టుకోలేదు. రాజకీయాల్లో ఇలాంటివన్నీ మామూలే గనుక, పేర్ని నాని, పవన్‌ కళ్యాణ్‌ని ‘పవన్‌ నాయుడు’ అని ప్రస్తావిస్తే అందులో తప్పుపట్టడానికేమీ లేదనుకోండి.. అది వేరే విషయం. ‘పవన్‌ నాయుడు’ అనడానికి మాత్రం పేర్ని నాని చాలా కష్టపడాల్సి వచ్చింది. పవన్‌ ప్రెస్‌మీట్‌ ఇలా అవగానే, పేర్ని నాని.. అలా మీడియా ముందుకు దూసుకొచ్చారంటే, వైసీపీ అధినేత, ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డి ఎంత పక్కాగా ఆదేశాలు జారీ చేశారో అర్థం చేసుకోవచ్చు.

ఇంతకీ, ఇసుక కొరత కారణంగా ప్రాణాలు కోల్పోయిన భవన నిర్మాణ రంగ కార్మికుల మాటేమిటి.? తెలుగు మీడియంపై చిన్న చూపు వద్దంటూ ఆవేదన వ్యక్తం చేస్తోన్న భాషాభిమానుల మాటేమిటి.? మంత్రి స్థాయిలో పేర్ని నాని.. ఈ ప్రశ్నలకు మాత్రం సమాధానం చెప్పలేక చేతులెత్తేశారు. అవును మరి, వైఎస్‌ జగన్‌ ఆయన్ని పురమాయించింది పవన్‌ కళ్యాణ్‌ని ‘పవన్‌ నాయుడు’ అని ప్రొజెక్ట్‌ చేసేందుకే. పవన్‌ కళ్యాణ్‌కి ముగ్గురు భార్యలు.. పవన్‌ నాయుడు.. నెక్స్‌ట్‌ ఏంటి.? వైసీపీ ఇంకో కొత్త ప్రస్తావన వెతుక్కోవాలేమో పవన్‌ కళ్యాణ్‌ని విమర్శించేందుకు.