సుజనా లక్ష్యంగా జగన్ స్కెచ్

రాజ్యసభ సభ్యుడు సుజనా చౌదరి లక్ష్యంగా ఏపీ సీఎం వైఎస్ జగన్ మోహన్ రెడ్డి పావులు కదుపుతున్నారు. ఆయన్ను ఇరికించేందుకు ఉన్న అవకాశాలపై దృష్టి సారించినట్టు తెలుస్తోంది. అయితే, కేంద్రంలోని బీజేపీ సర్కారు అండ ఉన్న సుజనాను దెబ్బతీయడం సాధ్యమయ్యే పనేనా అన్న సందేహాలు వ్యక్తమవుతున్నాయి. ఇటీవల తెలుగుదేశం పార్టీ నుంచి బీజేపీలో చేరిన తర్వాత ప్రత్యక్ష రాజకీయాల్లోనూ సుజనా క్రియాశీలంగా ఉంటున్న సంగతి తెలిసిందే.

కార్యకర్తలతో సమావేశాలు నిర్వహించడంతోపాటు పలు అంశాలపై వైఎస్సార్ సీపీ సర్కారుపై విమర్శలు గుప్పించారు. పోలవరం, అమరావతి నిర్మాణాలు ఆగిపోవడం, రివర్స్ టెండరింగ్ ప్రక్రియ చేపట్టడం వంటి అంశాలపై తీవ్ర స్థాయిలో ధ్వజమెత్తారు. ఈ నేపథ్యంలో వైఎస్సార్ సీపీ సైతం ఆయనపై ఎదురుదాడి చేసింది. గత ప్రభుత్వ హయాంలో అమరావతిలో సుజనా చౌదరి ఇన్ సైడర్ ట్రేడింగ్ కు పాల్పడ్డారని ఆరోపణలు గుప్పించింది. దీంతో తనకు అమరావతిలో భూమి ఉంటే నిరూపించాలని సవాల్ చేశారు. ఈ వ్యవహారంలో మున్సిపల్ మంత్రి బొత్స సత్యనారాయణ, సుజనాల మధ్య మాటల యుద్దం జరిగింది. ఈ క్రమంలో ఇదీ సుజనా, ఆయన బినామీల భూముల జాబితా అంటూ కొన్ని వివరాలు బయటపెట్టారు.

తనకు అమరావతిలో ఎలాంటి భూములు లేవని, తన కుటుంబ సభ్యులకు ఉన్నా.. అవి రాష్ట్ర విభజన జరగక ముందువేనని సుజనా తెలిపారు. దీంతో వైఎస్సార్ సీపీకి ఆయనకు మధ్య వివాదం మరింత ముదిరింది. ఈ వ్యవహారంలో తొలుత ఆరోపణలు గుప్పించిన బొత్స కంటే సుజనా సవాల్ ను సీఎం జగన్ సీరియస్ గా తీసుకున్నారు. అంతే.. సుజనాపై దృష్టి సారించి సీఐడీ, విజిలెన్స్, రెవెన్యూ అధికారులను రంగంలోకి దించారు. రాజధాని ప్రాంతంలో సుజనాకు లేదా ఆయన కుటుంబ సభ్యులకు ఎక్కడెక్కడ భూములున్నాయి? వాటి క్రయ విక్రయాలు ఎప్పుడు జరిగాయో ఆరా తీసి రెండు వారాల్లో నివేదిక ఇవ్వాలని ఆదేశించారు.

దీంతో వారు అమరావతి ప్రాంతంలో గ్రామాలన్నీ జల్లెడ పడుతున్నారు. సుజనా కేంద్రంలోని అధికార పార్టీలో ఉన్నందున బీజేపీతో వైఎస్సార్ సీపీ సంబంధాలపై ఈ అంశం ప్రభావం చూపే అవకాశం ఉందనే వాదన వినిపిస్తోంది. ఇప్పటికే రెండు పార్టీల మధ్య విమర్శలు, ప్రతివిమర్శలు సాగుతున్న నేపథ్యంలో ఈ విషయం ఎక్కడకు వెళుతుందో చూడాలి