ఇన్‌సైడ్‌ స్టోరీ: కరోనా ‘కట్టడి’ అప్పటికల్లా జరిగేనా.?

మానవ జాతికే పెను సవాల్‌ విసురుతోంది కరోనా వైరస్‌. ఇది మనిషి మనుగడకి ‘కంటికి కనిపించని చాలా చిన్న వైరస్‌’ విసురుతున్న సవాల్‌.. అని నిపుణులు అభిప్రాయపడుతున్నారు. కరోనా వైరస్‌ కారణంగా చోటు చేసుకుంటున్న మరణాల సంఖ్య తక్కువే. కానీ, అది సృష్టిస్తున్న విధ్వంసం మాత్రం.. చాలా చాలా ఎక్కువ. ‘మూడో ప్రపంచ యుద్ధం జరిగినా ఇంత స్థాయిలో విధ్వంసం వుండదేమో..’ అన్న అభిప్రాయాలు పరిశీలకుల నుంచి వ్యక్తమవుతున్నాయంటే కరోనా తీవ్రత ఏపాటిదో అర్థం చేసుకోవచ్చు.

తెలంగాణ ముఖ్యమంత్రి కేసీఆర్‌, ‘హెలికాప్టర్‌ మనీ’ అనే ప్రతిపాదనను ఆ మధ్య తీసుకొచ్చారు. అంటే, కరెన్సీని పెద్దయెత్తున అందుబాటులోకి తీసుకురావడం.. తద్వారా జనంలో కొనుగోలు శక్తిని పెంచడం. ఇది చాలా సాహసోపేతమైన చర్య. కేంద్రం ఆ దిశగా ఆలోచన చేస్తుందా.? లేదా.? అన్నది వేరే చర్చ.

పరిస్థితి తీవ్రతని కేసీఆర్‌ మాటలు చెప్పకనే చెబుతున్నాయి. చాలా ప్రపంచ దేశాలు ముందు ముందు ఈ ఆలోచన చేయక తప్పదేమో. మన దేశం విషయానికొస్తే, లాక్‌ డౌన్‌ మే నెల 3వ తేదీ వరకూ పొడిగిచింది కేంద్రం. ఈ నెల 20 నుంచి హాట్‌ స్పాట్స్‌ కాని ప్రాంతాల్లో కొన్ని సడలింపులు వుంటాయి. అయితే, ఆ సడలింపుల తర్వాత పరిస్థితులు ఎలా తారుమారవుతాయోనన్న ఆందోళన సర్వత్రా వ్యక్తమవుతోంది.

తెలంగాణలో నిన్న నమోదైన కరోనా పాజిటివ్‌ కేసుల సంఖ్య 10 లోపే. దాంతో, ‘హమ్మయ్యా..’ అనుకున్నారంతా. అంతలోనే, కేసుల సంఖ్య పెరిగింది. ఈ రోజు ఏకంగా 50 కేసులు నమోదయ్యాయి తెలంగాణలో. అంటే, చాపకింద నీరులా కరోనా వైరస్‌ దేశంలో చాలా చోట్ల విస్తరించేసిందన్నమాట.

దేశంలో 300కి పైగా జిల్లాల్లో కరోనా అస్సలేమాత్రం లేదని కేంద్రం చెబుతుండడం ఊరటనిచ్చే విషయమే. కానీ, అక్కడ జరగాల్సిన రీతిలో కరోనా నిర్ధారణ పరీక్షలు జరిగాయా.? లేదా.? అన్నదానిపై స్పష్టత లేదు. గ్రీన్‌ జోన్స్‌లోనే కాదు.. ఆరెంజ్‌ జోన్స్‌, హాట్‌ స్పాట్స్‌లోనూ.. యుద్ధ ప్రాతిపదికన కరోనా టెస్ట్‌లు చేయాలన్న డిమాండ్లు ఊపందుకుంటున్నాయి.

మరి, ఆ దిశగా కేంద్ర, రాష్ట్ర ప్రభుత్వాలు ఎప్పుడు నిర్ణయం తీసుకుంటాయో ఏమో. పరిస్థితి ఇంత తీవ్రంగా కన్పిస్తుండడంతో మే 3 నాటికి అయినా లాక్‌డౌన్‌ ఎత్తివేత జరుగుతుందో లేదో తెలియడంలేదు.