ఇన్‌సైడ్‌ స్టోరీ: బీజేపీ గాలి టీడీపీ వైపు మళ్ళుతోందట.!

2014 ఎన్నికల్లో టీడీపీ – బీజేపీ కలిసి పోటీ చేశాయి. అటు కేంద్రంలో బీజేపీ, టీడీపీకి తమ మంత్రి వర్గంలో అవకాశం కల్పిస్తే, ఇటు ఆంధ్రప్రదేశ్‌లో బీజేపీకి టీడీపీ మంత్రి వర్గంలో అవకాశం దక్కింది. నాలుగేళ్ళు ఈ రెండు పార్టీల ‘సంసారం’ సజావుగానే సాగినా, చివర్లో తేడా కొట్టేసిన విషయం విదితమే. ప్రస్తుతానికి టీడీపీ – బీజేపీ మధ్య వైరం చాలా గట్టిగానే వుంది.

నిజానికి, టీడీపీని బీజేపీ అస్సలేమాత్రం దగ్గరకు చేరనివ్వడంలేదు. అదీ అసలు విషయం. కానీ, టీడీపీ మాత్రం బీజేపీతో కలిసిపోవడానికే ప్రయత్నిస్తోంది. ఆ ప్రయత్నాలు ఇకపై మరింత గట్టిగా జరగబోతున్నాయట. అదే జరిగితే, జనసేన పార్టీ బీజేపీకి దూరమవడం ఖాయమేనట. రాష్ట్రంలో రాజకీయ సమీకరణాలు అనూహ్యంగా మారనున్నాయనీ, అతి త్వరలోనే టీడీపీ అధినేత చంద్రబాబు, ఢిల్లీ బీజేపీ పెద్దలతో భేటీ కాబోతున్నారనీ ప్రచారం జరుగుతోంది.

అయితే, ఇది టీడీపీ నేతలు తమంతట తాముగా చేసుకుంటున్న ప్రచారమా.? లేదంటే, ఢిల్లీ నుంచే లీకులు వస్తున్నాయా.? అన్నది తేలాల్సి వుంది. ఈ మొత్తం వ్యవహారానికి ‘కమ్మ లాబీయింగ్‌’ కారణమని రాజకీయ వర్గాల్లో గుసగుసలు విన్పిస్తున్నాయి. ‘అబ్బే, అదేం లేదు. టీడీపీతో కలిసి నడిచే ప్రసక్తే లేదు. గతంలో మాకు చాలా తక్కువ ఓట్లు వచ్చాయి. జనసేనతో కలిసి వెళ్ళబోతున్నాం గనుక ఓట్ల శాతం ఖచ్చితంగా పెరుగుతుంది. సీట్లు కూడా వచ్చి తీరతాయ్‌. టీడీపీతో ఇంకోసారి కలిసి నాశనమవ్వాలని అనుకోవడంలేదు.

అసలు టీడీపీకి ఆంధ్రప్రదేశ్‌లో లిఫ్ట్‌ ఇవ్వాలనే ఆలోచనే మాకు లేదు..’ అని బీజేపీ నేతలు న్యూస్‌ ఛానల్స్‌ డిబేట్స్‌లో ఘంటాపథంగా చెబుతున్నా, తెరవెనుక వ్యవహారాలు చకచకా మారిపోతున్నాయట. టీడీపీ అధినేత చంద్రబాబుకి, బీజేపీ పెద్దలతో సన్నిహిత సంబంధాలే వున్నాయి. కానీ, ప్రధాని నరేంద్ర మోడీ, కేంద్ర హోంమంత్రి అమిత్‌ షా.. చంద్రబాబు విషయంలో అంత సానుకూలంగా కన్పించడంలేదట. ఆ ఇద్దర్నీ ఒప్పించే బాధ్యతని పార్టీలో కొందరు సీనియర్లతోపాటు, టీడీపీ నుంచి బీజేపీలోకి వెళ్ళిన కొందరు నేతలు కూడా తీసుకున్నారని సమాచారం. మరోపక్క, ఈ మొత్తం వ్యవహారంపై జనసేన ఆచి తూచి స్పందిస్తోంది. టీడీపీ విషయంలో తమ స్టాండ్‌ మారలేదనీ, బీజేపీ తమతోనే కలిసి నడుస్తుందనే ఆశాభావంతో వున్నామని జనసేన నేతలు చెబుతున్నారు.