అంశం ఏదైనా.. రంగు పడాల్సిందే!

అగ్గిపుల్ల, కుక్కపిల్ల, సబ్బుబిళ్ల.. కాదేదీ కవితకనర్హం అని శ్రీశ్రీ అన్నారు. ప్రస్తుత పరిస్థితులు చూస్తుంటే రాజకీయాలకూ దీనిని వర్తింపజేయొచ్చనిపిస్తోంది. ఏ అంశం దొరుకుతుందా.. దానికి రాజకీయ రంగు పులుముదామా అని చూడటం ఎక్కువైపోయింది. తాజాగా టీమిండియా జెర్సీ రంగుపైనా కొన్ని రాజకీయ పార్టీలు రాజకీయాలు మొదలుపెట్టాయి. ఆ రంగు వెనుక బీజేపీ ఉందని ఆరోపణలు గుప్పిస్తున్నాయి.

ప్రధాని మోదీ దేశం మొత్తాన్ని కాషాయమయం చేస్తున్నారని దుయ్యబడుతున్నాయి. ప్రస్తుతం ఇంగ్లండ్ లో ప్రపంచకప్ క్రికెట్ టోర్నీ జరుగుతున్న సంగతి తెలిసిందే. టోర్నీలో పాల్గొనే ప్రతి జట్టుకూ ఒక ప్రత్యేకమైన జెర్సీ ఉంటుందన్న విషయం కూడా మనకు తెలుసు. టీమిండియా జట్టు జెర్సీ బ్లూ కలర్లో ఉంటుంది. అందుకే మన జట్టుకు మెన్ ఇన్ బ్లూ అని కూడా పేరుంది. ఇంగ్లండ్ జట్టు జెర్సీ కూడా నీలమే. మనది ముదురు నీలం అయితే, వారిది లేత నీలం రంగు. టోర్నీలో భాగంగా ఈనెల 30న భారత్, ఇంగ్లండ్ జట్ల మధ్య మ్యాచ్ జరగనుంది. ఈ మ్యాచ్ లో భారత జట్టు జెర్సీ రంగు మార్చుకోవాలని అంతర్జాతీయ క్రికెట్ మండలి (ఐసీసీ) సూచించింది.

ఆతిథ్య జట్టు అయిన ఇంగ్లండ్ కు వారి జెర్సీతోనే ఆడేందుకు అనుమతి ఇచ్చిన ఐసీసీ.. టీమిండియా మాత్రం మరో రంగు జెర్సీలో బరిలోకి దిగాలని పేర్కొంది. టోర్నీ ఆరంభానికి ముందే ప్రతి జట్టూ రెండు రకాల జెర్సీలతో రావాలని స్పష్టంచేసింది. ఈ నేపథ్యంలో టీమిండియా కూడా తమ రెగ్యులర్ జెర్సీతో పాటు ఆరెంజ్ కలర్ జెర్సీతో టోర్నీకి వెళ్లింది. సరిగ్గా ఇక్కడే రాజకీయం మొదలైంది. కాషాయ రంగులో ఉన్న ఆ జెర్సీ వెనుక బీజేపీ ఉందంటూ కాంగ్రెస్, సమాజ్ వాదీ పార్టీలు యాగీ చేస్తున్నాయి.

ఎస్పీ ఎమ్మెల్యే అబు అసీమ్‌ అజ్మి మీడియాతో మాట్లాడుతూ.. దేశం మొత్తం కాషాయీకరణ చేసేందుకు బీజేపీ ప్రయత్నిస్తోందని విమర్శించారు. జెండాలో మూడు రంగులు ఉంటే ఆరెంజ్‌ను మాత్రమే ఎందుకు తీసుకున్నారని ఆయన ప్రశ్నించారు. అయితే, విపక్షాలు చేస్తున్న ఆరోపణలను ఎన్డీఏ పక్షాలు తోసిపుచ్చాయి.

ఆ రంగు ధైర్యానికి, విజయానికి ప్రతీక అని, దీనిపై ఎవరికీ ఎటువంటి సమస్య ఉండకూడదని కేంద్ర మంత్రి రాందాస్ అథవాలే పేర్కొన్నారు. ప్రభుత్వాన్ని విమర్శించడానికి ప్రతిపక్ష పార్టీలకు ఏ విషయమూ కనపడట్లేదని అందుకే ఇలాంటి చౌకబారు ఆరోపణలు చేస్తున్నారని శివసేన విరుచుకుపడింది. కాగా, జెర్సీని ఎంచుకునే స్వేచ్ఛ ఆయా జట్ల ఆటగాళ్లదేనని, ఇందులో తమ ప్రమేయం ఏమీ ఉండదని ఐసీసీ స్పష్టంచేసింది.