నల్ల ‘నోట్ల కట్టల పాముల’ కోరల్లో దేశ ఆర్థిక వ్యవస్థ.!

కొందరి చేతుల్లోనే సంపద.. మిగతా వాళ్ళకి మాత్రం సంక్షేమ పథకాల పేరుతో బిచ్చమేయడం.. దేశ ప్రజాస్వామ్యం గురించి ఇంతకన్నా గొప్పగా చెప్పుకోవడానికేముంది.? ‘భారతదేశం అభివృద్ధి చెందుతున్న దేశం..’ అని దశాబ్దాలుగా చెప్పుకుంటూనే వున్నాం.

నిజానికి, భారతదేశం పేద దేశం కాదు.. భారతదేశంలో మెజార్టీ ప్రజలు పేదలు. దేశ ఆర్థిక వ్యవస్థ బలంగానే వుంది.. కానీ, దాన్ని నల్ల కుబేరులు బలహీనం చేస్తున్నారు. పేదలు మరింత పేదలుగా, డబ్బున్నోళ్ళు మరింత డబ్బున్నోళ్ళుగా మార్చేలా ప్రభుత్వాలు పనిచేస్తుండడమే ఈ దుస్థితికి కారణం.

దేశంలో రాజకీయ అవినీతి దేశ అభివృద్ధికి పెను శాపంగా మారుతోంది. రాజకీయ నాయకులు, వారి సన్నిహితుల సంపద క్రమక్రమంగా పెరుగుతోంది. అదే సమయంలో దేశం అప్పుల కుప్పగా మారిపోతోంది. చంద్రబాబు హయాంలో శేఖర్ రెడ్డి అనే వ్యక్తి మీద బోల్డన్ని ఆరోపణలు వచ్చాయి. అలా ఆరోపించిన వైసీపీ, తాము అధికారంలోకి వచ్చాక.. తిరిగి ఆయనకు అగ్రతాంబూలమిచ్చింది టీటీడీలో. ఇది జస్ట్ ఓ ఉదాహరణ మాత్రమే.

రాజకీయాల్లో కాంట్రాక్టర్లదే రాజ్యం. వాళ్ళకి అన్ని పార్టీలతోనూ సంబంధాలుంటాయ్. ప్రాజెక్టులూ అలాంటివారికే దక్కుతాయ్. చిన్నా చితకా కాంట్రాక్టర్లు రోడ్డు మీద పడి బిచ్చమెత్తుకునే పరిస్థితి వస్తుందేమోగానీ, బడా కాంట్రాక్టర్లకు ఆ సమస్య వుండదు.

తాజాగా హెటిరోపై ఐటీ సోదాలు జరిగితే, పెద్దమొత్తంలో నగదు బయటపడింది. ఆ డబ్బుని లెక్కించడానికే రెండు రోజులు పట్టిందట. బీరువాల్లో డబ్బు, అల్మరాల్లో డబ్బు.. ఈ నోట్ల కట్టలు చూసి జనం ముక్కున వేలేసుకుంటున్నారు.

ఆంధ్రప్రదేశ్ ప్రభుత్వం ప్రతి నెలా అప్పులు చేయక తప్పని పరిస్థితి. ఉద్యోగులకు జీతాలివ్వాలన్నా అప్పులు చేయాల్సిందే. అదే సమయంలో, ప్రభుత్వ పెద్దల్లో కొందరు పెద్ద పెద్ద డీల్స్ సెట్ చేసుకుంటున్నారు తమ వ్యాపార విస్తరణలో భాగంగా. ఎక్కడ తేడా జరుగుతోంది.

ఒక్క ఆంధ్రప్రదేశ్ అనే కాదు, దేశంలోని అన్ని రాష్ట్రాల్లోనూ దాదాపు ఇదే దుస్థితి. అప్పు చేసి ప్రజలకు సంక్షేమ కూడు పెడుతున్నాయి ప్రభుత్వాలు. అలా పంచిన సొమ్ము తిరిగి, బడా బాబుల జేబుల్లోకి వెళుతోంది. ఇదో తెలివైన రాజకీయ నేరం.. అని అంటారు ప్రజాస్వామ్యవాదులు.

అంబానీ ఆదాయం పెరిగిందట.. ఇంకో వ్యాపారవేత్త ఆదాయం అదుర్స్ అట.. అని నిస్సిగ్గుగా మీడియా ప్రచారం చేస్తోంది. మరి, సామాన్యుడి భవిష్యత్తేంటి.? సగటు భారతీయుడి ఆర్థిక దుస్థితి ఏంటి.? నోట్ల కట్టల పాములు విషం చిమ్ముతోంటే, దేశం ఆర్థికంగా దివాళా తీయక.. ఏం జరుగుతుందేంటీ.!