‘మా’ను సరికొత్తగా తీర్చిదిద్దుతా..’ మ్యానిఫెస్టో విడుదల చేసిన సీవీఎల్

మా ఎన్నికలు ఎప్పుడు జరిగినా రాజకీయ ఎన్నికల తరహాలోనే సంచలనం రేపుతూంటాయి. వచ్చే నెలలో జరుగబోతున్న ఎన్నికలు కూడా టాలీవుడ్ ని ఇప్పటికే హీటెక్కించేశాయి. అభ్యర్ధుల పోటీ, ఒకరిని ఉద్దేశించి మరొకరు వ్యాఖ్యలు.. ఇలా ఆసక్తి రేకెత్తిస్తున్నాయి. ఈనేపథ్యంలో పోటీలో ప్రకాశ్ రాజ్, మంచు విష్ణు మాత్రమే నిలుస్తారని భావించగా నటుడు సీవీఎల్ నరసింహారావు కూడా బరిలో దిగుతున్నారు. జీవిత, హేమ కూడా పోటీ చేస్తారని భావించగా వారిద్దరూ ప్రకాశ్ రాజ్ ప్యానెల్ లో చేరిపోయారు.

మా ఎన్నికల్లో ఎప్పుడు, ఎవరు పోటీ చేసినా మా బిల్డింగ్, అసోసియేషన్ కోసమే అని చెప్తారు. కానీ.. సీవీఎల్ మాత్రం మా అసోసియేషన్ లో తెలంగాణ వాదం ఎంచుకున్నారు. అసోసియేషన్ లో ఇంకా ఏపీ అనే పదం ఎందుకు ఉందన్నది ఆయన ప్రశ్న. తెలంగాణ కళాకారుల కోసం ఓ అసోసియేషన్ ఉండాలనేది ఆయన వాదన. ఈమేరకు ఆయన వాదనకు విజయశాంతి కూడా మద్దతు పలికారు. ఈ నేపథ్యంలో సీవీఎల్ ఎన్నికల మ్యానిఫెస్టోను విడుదల చేశారు.

1. 2011లో ‘మా’ అధ్యక్షుడిగా ఉన్న సమయంలో.. 25 ఏళ్ల తర్వాత వచ్చినవారికి కూడా సంక్షేమ పథకాలు అమలు చేయాలనే ఆలోచనతో కొన్ని రిజల్యూషన్స్ పాస్ చేసాం. నేను అధ్యక్షుడైతే వాటిని అమలకు కృషి చేస్తాను.
2. హీరోయిన్ ప్రత్యూష కన్నుమూసిన సమయంలో జయసుధ చైర్ పర్సన్‌గా ‘ఆసరా’ అనే ఆర్గనైజేషన్ స్థాపించాం. మీడియాలో, సినిమాలో ఉండే మహిళలపై అత్యాచారాలు, లైంగిక వేధింపులు జరిగితే ఆదుకునేందుకు ఈ ఆర్గనైజేషన్ ఏర్పాటు చేశాం. దీన్ని మళ్లీ యాక్టివ్ చేస్తాం.
3. తెలంగాణ ప్రాంత నటులను మరిచిపోతున్నారు. దాదాసాహెబ్ ఫాల్కే అవార్డు గ్రహీత పైడి జైరాజ్, కాంతారావు, ప్రభాకర్ రెడ్డి వంటి నటలును మళ్లీ గుర్తు చేస్తా.

4. ‘మా’ సభ్యత్వం పొందేందుకు లక్షల్లో ఫీజు చెల్లించాలి. వాటిని FNCCలో భాగంగా నామ మాత్రపు రుసుముతో ఇచ్చేలా ప్రయత్నం చేస్తా.

5. ‘మా’లో సభ్యత్వం లేని ఆర్టిస్టులు సినిమాల్లో నటిస్తే.. ఆ సినిమా నిర్మాతే సభ్యత్వం కట్టి వారిని సభ్యులుగా చేయాలనే నియమం పెట్టాలనుకుంటున్నాం.

6. ’మా’ ఎన్నికల ఓటింగ్ విధానంలో పలు మార్పులు తీసుకొస్తాం.
7. విరాళాల కోసం ‘మా’ సభ్యులు విదేశాలకు వెళ్లే సమయంలో ఫేస్ వాల్యూ ఉన్నవారే కాకుండా.. చిన్న ఆర్టిస్టులను కూడా తీసుకెళ్లే అవకాశం ఇవ్వాలని కోరిక.

   8. సమాజంపై కొన్ని సినిమాలు చెడు ప్రభావం చూపుతున్నాయనే ఆరోపణలు ఉన్నాయి. దర్శక, నిర్మాతలు, హీరోలు తమ సినిమాల్లో డ్రగ్స్, హింస సన్నివేశాలు సాధ్యమైనంతగా తగ్గించుకునేలా చేయించాలని కోరిక.

మొత్తంగా సీవీఎల్ కొత్త తరహా విధానాలతో ముందుకు వస్తున్నారు. ఇవన్నీ గతంలోనే ఉన్నా ఇప్పుడు వీటిని ఆచరణలో పెట్టాలనేది సీవీఎల్ కోరిక. దీంతో ప్రస్తుతం బరిలో ఉన్న ప్రకాష్ రాజ్, మంచు విష్ణుల కంటే ఆయన విభిన్నంగా ఆలోచిస్తున్నారు. మరి.. అక్టోబర్ 10న జరిగే ఎన్నికల్లో ఎవరి ప్యానెల్ గెలుపొందుతుందో చూడాల్సి ఉంది.