‘వాల్తేరు వీరయ్య’ ప్రమోషన్స్ పై.. మెగా ఫాన్స్ కీలక సమావేశం.

మెగాస్టార్ చిరంజీవి తాజా చిత్రం ‘వాల్తేరు వీరయ్య’ ఈ సంక్రాంతికి ప్రేక్షకుల ముందుకు రానున్న సంగతి తెలిసిందే. జనవరి 13న ‘వాల్తేరు వీరయ్య’ వస్తుండగా, ఒక్క రోజు ముందు నందమూరి బాలకృష్ణ సినిమా ‘వీర సింహా రెడ్డి’ విడుదలవుతోంది.
రెండు సినిమాల్నీ ‘మైత్రీ మూవీ మేకర్స్’ సంస్థ నిర్మిస్తోంది. అయితే, ‘వీర సింహా రెడ్డి’ ప్రమోషన్స్ విషయంలో చూపుతున్న శ్రద్ధతో పోల్చితే, ‘వాల్తేరు వీరయ్య’ ప్రమోషన్స్‌లో ‘మైత్రీ’ సంస్థ తగినంత శ్రద్ధ చూపడంలేదన్న విమర్శలు వినిపిస్తున్నాయి.
ఈ వ్యవహారం మెగాభిమానుల్ని ఒకింత ఆందోళనకు గురిచేస్తోంది. ఏ కారణం వల్ల ‘వాల్తేరు వీరయ్య’ సినిమా ప్రమోషన్లను ‘మైత్రీ మూవీ మేకర్స్’ లైట్ తీసుకుంటోంది.? అన్న దిశగా అభిమానులు మల్లగుల్లాలు పడ్డారు. ఉభయ తెలుగు రాష్ట్రాలకు చెందిన మెగాభిమానులే కాకుండా, పొరుగు రాష్ట్రాల నుంచి కూడా మెగాభిమాన సంఘాల తరఫున ముఖ్యులు నిన్న హైద్రాబాద్‌ హరిత ప్లాజా హోటల్ ప్రత్యేకంగా భేటీ అయ్యారు.

ఈ సమావేశానికి మైత్రీ మూవీ మేకర్స్ నిర్మాతల్లో ఒకరైన రవి కూడా హాజరయ్యారు. నిర్మాత యెదుట మెగాభిమానులు పలు ప్రశ్నలుంచారు. తెలుగు రాష్ట్రాల్లో మెజార్టీ థియేటర్లు ‘వీర సింహా రెడ్డి’కి ఇచ్చి, ‘వాల్తేరు వీరయ్య’కు తక్కువ థియేటర్లు కేటాయిస్తున్నారన్న సమాచారం తమకుందని అభిమానులు పేర్కొన్నారు.

మరోపక్క, మంచి థియేటర్లను ‘వీర సింహా రెడ్డి’కి ఇస్తున్నారనీ, ‘వాల్తేరు వీరయ్య’ విషయంలో మాత్రం మంచి థియేటర్లు ఇవ్వడంలేదని, సింగిల్ థియేటర్ వున్న చోట్ల పూర్తిగా ‘వాల్తేరు వీరయ్య’ను పక్కన పెడుతున్నట్లు తమకు అనుమానాలున్నాయని అభిమానులు అసహనం వ్యక్తం చేశారు. అయితే, నిర్మాత రవి మాత్రం.. అలాంటి అనుమానాలకు తావు లేదనీ, రెండు సినిమాలకూ సమ ప్రాధాన్యత ఇస్తున్నామనీ, ఎక్కడా ఎలాంటి వివక్షా లేదని అభిమానులకు నచ్చజెప్పే ప్రయత్నం చేశారు.

అంతకుముందు ఈ ఫాన్స్ సమావేశంలో నాగబాబు పాల్గొని.. ఫాన్స్ ను ఉద్దేశించి.. దిశా నిర్దేశం చేశారు.. చిరంజీవి సినిమాలకు ప్రమోషన్ చేయటం తో పాటు, చిరంజీవి సేవా కార్యక్రమాలను, ఆశయాలను ముందుకు తీసుకెళ్లాలని కోరారు. ఫాన్స్ కోసం మెగా ఫామిలీ ఎప్పుడూ అండగా ఉంటుందని చెప్పారు. ఫాన్స్ అంతా ఐక్యంగా వ్యవహరిస్తూ.. కొత్త తరాన్ని కూడా ప్రోత్సహించాలని కోరారు.. చాలాకాలం తర్వాత చిరంజీవి ఫాన్స్ ముఖ్యులతో ఇంత భారీ సమావేశం ఏర్పాటు చేసుకోవటం పట్ల ఇది శుభ పరిణామం అని ఫాన్స్ నాయకులు ఆనందంగా ఉన్నారు.