అందరి నోటా అదే మాట..!

‘కరోనా వైరస్ చిన్నపాటి జ్వరం వంటిదే. వస్తుంది.. పోతుంది. ఎవరికైనా ఇది వస్తుంది. రేపు నాకు కూడా రావొచ్చు. ఇది ఎప్పటికీ పూర్తిగా తగ్గే పరిస్థితి లేదు. కరోనాతో మనం కలిసి జీవించాల్సిందే. కొన్ని జాగ్రత్తలు తీసుకుంటే నయమవుతుంది’ – ఇవీ ఏపీ సీఎం గతవారం చేసిన వ్యాఖ్యలు. దీంతో నెటిజన్లు జగన్ ను సోషల్ మీడియాలో ఒక రేంజ్ లో ట్రోల్ చేశారు. ఇక ప్రతిపక్షాలైతే తీవ్రంగా విరుచుకుపడ్డాయి. కరోనా వైరస్ నియంత్రణలో జగన్ చేతులెత్తేశారని దుయ్యబట్టాయి. పాలన చేతకుంటే తమకు అప్పగించాలని సెటైర్లు వేశాయి.

అంతకుముందు కూడా కరోనా చిన్న జ్వరమని, పారాసిటమాల్ వేసుకుంటే సరిపోతుందని జగన్ చెప్పడంతో చాలామంది విస్తుపోయారు. పారాసిటమాల్ కే తగ్గిపోతే ప్రపంచం అల్లకల్లోలం కావడానికి కారణాలేంటి? ఎన్నో వ్యయప్రయాసలకోర్చి లాక్ డౌన్ విధించుకోవాల్సిన అగత్యమేంటని ప్రశ్నలు సంధించారు. కరోనాతో సహజీవనం చేయాల్సిందేనని సీఎం స్థాయి వ్యక్తి చెబితే ఎలా అని నిలదీశారు. అయితే, కరోనా విషయంలో ప్రస్తుతం పలువురి అభిప్రాయం ఇదే విధంగా ఉండటం విశేషం.

ప్రపంచ ఆరోగ్య సంస్థ నుంచి తాజాగా తెలంగాణ సీఎం కేసీఆర్ వరకు ఇదే చెప్పారు. సుదీర్ఘ లాక్ డౌన్ మంచిది కాదని ఆర్బీఐ మాజీ గవర్నర్ రఘురాం రాజన్ పేర్కొనగా.. కరోనాతో కలిసి సాగాల్సిందేనని ఇన్ఫోసిస్ వ్యవస్థాపకుడు నారాయణమూర్తి తేల్చి చెప్పారు. కరోనా అనేది ఇప్పటికిప్పుడు తగ్గిపోయేది కాదని పలువురు వైద్య నిపుణులు కూడా స్పష్టంచేశారు. వ్యాక్సిన్ వచ్చే వరకు దాంతో కలిసి జీవించక తప్పదని పేర్కొన్నారు.

రెండు రోజుల క్రితం ఢిల్లీ సీఎం కేజ్రీవాల్ కూడా ఇదే వ్యాఖ్య చేశారు. తెలంగాణ మంత్రి కేటీఆర్ సైతం ఇదే అభిప్రాయం వ్యక్తంచేశారు. తాజాగా సీఎం కేసీఆర్ ఇదే విషయాన్ని తనదైన స్టైల్లో చెప్పారు. ‘‘ఈ సమస్య రేపో, ఎల్లుండో సమసిపోయేది కాదు. కరోనాతో కలిసి బతకాల్సిందే. ఇది మనల్ని వేటాడుతూనే ఉంటుంది. ఇప్పటివరకు మనల్ని మనమే రక్షించుకున్నాం. ఇక ముందు కూడా మనల్ని మనమే రక్షించుకోవాలి. కొంచెం తెలివి కావాలి. ఉపాయం ఉన్నవాడు అపాయం నుంచి బయటపడతాడు. ఉపాయంతో బతకాలి. ఆ తెలివి మనం సంతరించుకోవాలి’’ అని వ్యాఖ్యానించారు.